買屋記(7) - 買保險

喺英國買屋，未拎到鎖匙已經要買保險，只要一exchange咗contracts就要有保險cover。

律師，agent同朋友都有提醒我哋記得買保險。

我哋係去comparemarket度買嘅。

https://www.comparethemarket.com/

買保險當然又有D問題要答，有D選項要揀喇。

第一樣先揀嘅就係買building定contents，building即係間屋嘅結構及裝修，contents就係其他冇入牆嘅野。

buildings cover一定走唔甩㗎喇，至於contents就睇自己需要喇。

買保險除咗問間屋有幾房，幾廳幾廁外，仲會問外牆同屋頂係咩材料，有冇平嘅屋頂，屋附近有冇10米高嘅大樹，會唔會好近水，呢D資料喺surveyor report同律師嘅報告都會搵到。

跟住就要決定墊底費幾多，仲有需唔需要其他額外covers(Accidental Damage，Home Emergency，Legal Assistance，Replacement Locks & Keys。

仲會問埋大門屬於邊種鎖，有冇其他後門，有冇burglar alarm，smork detector。大門嘅鎖第一次睇屋時係唔會留意嘅，所以我哋喺surveyor出咗report之後，都專登做咗次2nd view，特別去睇吓surveyor report有提及要注意嘅地方，同埋去睇吓個鎖係咩類型。

另外，仲要話俾保險公司知，間屋係咪主要居所，係咪長期有人，答完一大輪問題後，就會見到唔同公司嘅quotes，朋友教我哋揀大公司中最平嗰間就OK，而且要記得每年要review，轉吓公司，否則自動續保會好貴。

買完保險，下一步就係等收鎖匙喇。

買屋記(6) - exchange of contracts

當律師出咗報告之後，就去到買屋另一高潮，就係exchange of contracts，落訂喇。

去銀行過數都要攪成個鐘，本來可以用電話理財攪嘅，但講電話真係有理說不清，好彩揀咗落分行。

去到銀行，排咗輪隊，最先埋咗櫃位，櫃位姐姐話唔係喺佢度攪，叫搵職員，搵咗職員，職員又話用電話理財，夾硬喺佢office打電話理財，點知電話嗰邊又話分行做好D，well......咁樣都已經過咗半個鐘。

分行職員其實都好好禮貌嘅，咁佢焗住幫手攪過數喇。先嚟過身份核對，地址電話電郵......對一輪，跟住又問做咩過咁大筆數？過俾邊個？買屋？有冇睇過現樓？真係滿意間屋？地址係邊？之後又問戶口D錢邊度嚟㗎？佢甚至好仔細度問，邊年邊月邊日有幾多錢入戶口，跟住邊年邊月邊日又入多幾多，然後又問點解有筆數入戶口？咁解釋完一輪，話佢知係賣晒家鄉嘅家當，而家嚟擁抱大英，總算接受咗"D錢邊度嚟"嘅解釋。

跟住又要繼續答，過錢俾邊個？有冇見過真人？有冇上過佢office？佢點俾個account number你，by mail？先前有冇曾經過數俾呢個律師，過咗幾多錢？有冇同佢confirm收唔收到？電話confirm？個電話邊個俾你㗎？by email定上網搵定點呀？

好彩，好彩萬母都曾經上過律師樓一次，拎過張卡片，其實lockdown過後，律師所有野都係經email，真係未見過真人㗎。

被審問完一輪之後，總算成功過數去律師樓，再由律師代為落訂，跟住就係exchange of contracts，exchange咗contracts之後就冇得縮沙㗎喇，而且exchange of contracts都會講明完成交易(Completion)嘅日期。

exchange of contracts之後有一樣野要即做嘅，就係買保險喇，待續。

https://www.gov.uk/buy-sell-your-home/transferring-ownership-conveyancing

買屋記(5) - 律師報告

先前講到萬能家俾錢律師查自己家宅，但其實除咗查自己，律師都仲有好多野要查嘅。

到後段，律師係send咗份10頁紙嘅報告，再連埋14份文件俾萬母。

報告內容包括：

Drainage and Water Search - 會講埋附近邊度有下水道，污水站呀，嗰D資料

Local Authority Search - 會查到間屋有冇planning or building regulation entries，喺唔喺某D control zone入面

Environmental Report - 有冇咩污染，水浸，氡（鐳衰變時形成的一種氣體放射性元素，在大自然中存在於岩石和土壤中），地陷危機

Mining and Subsidence - 過去有冇採礦，會唔會有坍塌

另外仲會同賣家提問，包括肯定賣家有權賣屋，住喺入面所有18歲以上嘅住客都同意交易，有冇曾經被爆格，同鄰居有冇出過咩爭執，要求業主提供boiler同電嘅certificate，根據searches資料，問吓業主所住期間有冇出過咩問題，包括水浸嗰類等等。

仲會有份清單列明，收樓時會包埋D咩，例如：爐頭，焗爐，窗簾，燈飾等等，有D物品業主亦可能會出個價問新買家買唔買，例如：我哋業主有問我哋買唔買佢嘅洗衣機，雪櫃，餐檯，總之個清單都幾詳盡，建議要認真咁睇。

http://www.suremove.uk.com/downloads/Law%20Society%20Fittings%20and%20Contents%20TA10.pdf

所以話呢，律師提供嘅資訊其實好豐富嘅，亦都會令人有D吃不消，但無論點，律師費都係抵俾嘅。仲要俾心機睇報告。

買屋記(4) - First time buyer?

好多人都係變賣所有香港家當，以無殼蝸牛嘅身份嚟到英國，咁樣究竟喺英國屬唔屬於first time buyer，stamp duty有冇優惠呢？

答案係：唔算數！

萬母問過律師，得到嘅回覆係：只要自己/伴侶曾經喺世界任何地方擁有過住宅物業，無論現時仲係唔係持有，都已經唔再算係first time buyer，冇咗£300,000樓價以下免稅優惠。

不過~~如果而家買嘅英國屋係主要居所，stamp duty都仍然會比買第二間屋平嘅。去下面個網址，輸入資料+屋價，就可以知道要交幾多stamp duty喇。

https://www.tax.service.gov.uk/calculate-stamp-duty-land-tax/#/intro

簡單D講，曾經有殼嘅蝸牛，就算而家冇殼，變咗做鼻涕蟲，都一樣唔算係first time buyer。

有關first time buyers嘅講解，可以睇下面嘅文件。

https://assets.publishing.service.gov.uk/government/uploads/system/uploads/attachment_data/file/759714/Stamp_Duty_Land_Tax_relief_for_first_time_buyers_-_guidance_note.pdf

First time buyers嘅免稅安排。

https://www.ownyourhome.gov.uk/scheme/stamp-duty-land-tax/

買屋記(3) - 委託律師Solicitor

喺英國買屋，同香港一樣都係要搵律師幫手嘅，曾經聽人分享，唔好用agent介紹嘅律師，因為驚佢哋扯貓尾。

咁人生路不熟嘅我哋當然就跟朋友喇。下面就係除咗樓價同stamp duty之外，律師收嘅費用，其實有好多都係做searches嘅實報實銷駛費。每項係咩就唔細講喇，有興趣就㩒link去了解多D，只係俾個參考，除咗樓價同stamp duty(跟樓價計算)之外，仲要預其他駛費。

咁萬母覺得我哋個律師點呢？都幾有效率，email好多次都係秒覆，有次佢問萬母做邊種Property Searches，俾咗兩款揀，但其實萬母都唔知係咩，唯有覆email問喇，45分鐘內來來回回共6個email，跟住就解決咗喇。所以萬母都幾欣賞佢夠快手。

另外，律師查家宅都查得幾仔細，律師要查萬能家喺英國嘅銀行戶口，點解會有幾條數存入，又會問D錢點得嚟，要俾文件證明係賣香港家當所得，又查埋香港銀行戶口嘅單，證明D錢真係由自己戶口過自己戶口。好彩萬能家身家清白，問咗幾次就已經解除律師嘅疑慮。建議大家要保留D能夠證明資金來源嘅文件，咁就簡單快捷可以解釋得到喇。

咁有冇咩野唔好呢？就係最後份合約打錯名，好彩萬母睇到，要求佢改，如果唔係簽咗錯名嘅合約就真係唔知點收科喇。

總言之： 好多野都係靠律師查，包括查自己，查對家，查間屋，返嚟D文件都真係幾新穎嘅，好多野學，但又學唔晒咁喇。

以下數目只供參考，下次再講從律師嗰邊收到D咩資訊。

Legal Fee 律師費 £1800

AML (Anti-money laundering) Search 反洗錢調查 £6 per person

https://www.infotrack.co.uk/services/people/aml-identity-checks/

Lawyer Checker Fee 對家律師調查費 £14.4

https://www.samconveyancing.co.uk/news/conveyancing/what-is-lawyer-checker-5476

Telegraphic Transfer Fee 電匯費用 £48

https://beestonshenton.co.uk/solicitors-fees/

Property Searches £441.67

https://www.coseyhomes.co.uk/news/searches-buying-house/

Bankruptcy Search £2

https://www.gov.uk/search-bankruptcy-insolvency-register

Land Registry Search Fee 土地查冊費 £3

https://www.gov.uk/get-information-about-property-and-land/search-the-register

Land Registry Registration Fee 土地註冊費 £270

https://www.gov.uk/registering-land-or-property-with-land-registry

買屋記(2) - 搵Surveyor驗樓

喺香港買樓，通常都唔駛動勞到Surveyor，但喺英國就要喇，因為D屋閒閒地都幾十歲，近百歲，所以就要搵人驗樓喇。

咁幾時要搵人驗樓呢？就係當accept咗offer後就要即做，因為萬一間屋有咩事，都仲可以縮沙唔去馬。

咁因為驚睇唔明份報告，又驚聽唔明，所以我哋專登搵咗個香港人Surveyor，咁收到報告之後都仲可以用廣東話問吓問題。

我哋做嘅係HomeBuyer Report，費用係£600，同市價差唔多。

份報告成60頁，主要內容係形容吓屋企同周圍環境，要會分3個levels講間屋嘅elements.

Level 3 係Elements that require urgent attention

Level 2 係Elements that require attention but are not serious or urgent

Level 1 係Elements with no current issues

Surveyor會去遠眺吓屋頂，睇吓D內外牆，去水喉，雨水喉，門窗，天花，供暖，火爐，廁所，等等。每項都會有段description同suggestions，最後仲會有佢對間屋嘅估價。

下面條link有解釋呢個RICS homebuyer services係咩東東。

https://www.rics.org/globalassets/rics-website/media/upholding-professional-standards/sector-standards/building-surveying/homebuyer-report-survey-valuation-description-and-standard-terms-of-engagement-rics.pdf

咁好喇，如果Surveyor發現間屋有結構上問題，買家可以停止交易，如果係D小問題，例如有小滲水，買家就可以同賣家傾，一係減價一係就整好先交易，咁如果冇問題就當然最好喇，可以繼續進行交易喇。

所以，請Surveyor呢舊錢又係唔慳得嘅。

喺搵Surveyor驗樓嘅同時，其他另一邊箱已經要委託律師去做野，下次再講律師嗰邊又攪咩。

https://www.rics.org/uk/upholding-professional-standards/sector-standards/building-surveying/home-surveys/

買屋記(1) - 出offer

當睇啱間屋之後，第一樣要做嘅就係出offer。咁點出呢？最簡單就係同agent講，想出offer，出幾多錢。亦有D agent會要求black & white咁出offer，send whatsapp/email，甚至要填申請表。

咁出offer最難在於咩呢？咪就係出一個自己安心又令業主開心嘅價囉。家家要求唔同，能力都唔同，好難一概而論。但亦可以參考過去同區/同街嘅成交價，咁當然喇，有D街幾年先出一次盤，D價都未必好update，只能作參考。下面嘅網站連結，輸入postcode可以知道過去嘅成交價。

https://www.zoopla.co.uk/house-prices/

https://www.rightmove.co.uk/house-prices.html

最重要知道自己嘅承受能力，如果要做mortgage嘅話，可以早D拎定pre-approval。如果唔駛做mortgage，即係cash buyer，某程度上都有優勢嘅，因為cash buyer可以直接拎cash完成交易，唔需要等賣咗舊居先有資金，咁樣亦都算係chain-free buyer，會較為受歡迎少少嘅。

喺英國買樓，成日都聽到property chain，chain-free之類嘅terms。咁究竟property chain即係咩呢？可以咁理解，A君賣屋A，B君要先賣B屋再買A屋，C君再先賣C屋再買B屋，DEF君如此類推，一單扣一單，就會形成一條chain，如果中間其中一單交易唔成事，前前後後嘅都會攪唔掂，咁條長長嘅chain直接幾時先完呢，就係有人唔駛先賣屋才買屋，即係第一次買屋嘅first-time buyer或是cash buyer喇。或係某屋係新屋/吉屋/業主已有地方住，可以隨時搬出嘅，即chain-free seller。

property chain其實真係好難避，而且長chain未必唔成事，短chain都未必一定掂，唯有問清楚條chain究竟有幾長再自己衡量吓風險。

萬能家出offer時，有講明想喺stamp duty holiday完之前完成交易，當時業主都答應就算未買到新屋都先租地方住，佢用嘅terms係break the chain。

出咗offer之後，agent有時會回覆，問呢個係咪final offer，會唔會追價，喺呢D情況，即係有人出較高offer，咁追唔追價真係好睇自己能力，唔能夠麻木咁去追。

咁如果offer accepted就當然高興喇，就算唔accepted都可以了解到樓市嘅近況有幾熾熱，知道下次再出offer時應該點出。

offer accepted之後，agent會出個Memorandum of Sale，會講明間屋嘅地址，協議嘅價錢，雙方資料同代表律師，預計交易日期。

呢步只係起點，仲有漫漫長路，待續。

英國買樓程序

上上上回講到有間屋見到佢上架，落架，再上架，咁究竟係咩回事呢？就要先了解英國嘅買樓程序。

1. 搵樓 (rightmove，zoopla)

2. 睇啱就出offer

3. 如果賣家OK嘅話會accept offer，否則此刻止步

4. offer accepted之後就開始交律師處理，會出個memorandum of sale(可以理解成臨時買賣合約，但英國同香港嘅買樓程序唔同，就算出咗memorandum of sale都未有任何錢銀瓜葛，退出都唔會蝕錢)

5. 搵surveyor驗樓，處理mortgage，搵律師做property searches

6. 如果過程中出問題，例如surveyor發現間屋有大問題，或是買家借唔到mortgage，有機會就要終止程序，已俾嘅支出，例如survey費，律師費就係潑出去嘅水

7. 亦有另一個可能，就係賣家遇到個更高價嘅買家，咁都可以終止交易，買家俾咗嘅survey費，律師費都係化為烏有，而間屋就需要再上架

8. 如果一切順利，就到exchange signed agreement，俾deposit，過咗呢個階段再pull out就會有法律責任要負，要賠償對方損失

9. exchange signed agreement嗰刻就要買定家居保險喇

10. 最後就係completion，拎鎖匙，大功告成

咁因為一日未exchange signed agreement，一日都唔需要負法律責任，賣家可能有更高offer會決定pull out，買家又可能survey結果，或者資金問題，或者見到間更啱心水嘅而決定終止交易都唔奇，所以我哋只係睇咗十幾間屋，但都有幾間係上架，落架再上架嘅盤。

但係都提一提，雖然pull out唔駛賠錢，出offer前都要諗清諗楚，牙齒應該係要當金駛嘅。

https://www.gov.uk/government/publications/how-to-buy-a-home/how-to-buy

下回繼續分享萬能家嘅經歷。

準備車牌筆試 - 英國與香港之異

話說萬母喺香港已經考過車牌筆試，但嚟到英國都係要重頭嚟過。

咁英國嘅車牌筆試同香港嘅有咩大分別呢？

其實真係好似，話晒香港嗰套都係N年前喺英國抄返嚟。

咁有咩係萬母覺得最難明/記，就係D crossings。

喺香港主要都係分斑馬線同行人過路處，但英國除咗斑馬線，仲有另外幾種動物線，初時萬母真係傻傻攪唔清，最後唯有key埋張動物相落去記，先分到究竟幾種crossings有咩分別，呢個應該就係坊間所講嘅圖像記憶法喇。

塘鹅線，海鸚線，巨嘴鳥線，飛馬線，痴晒線~~

入錯密碼三次~~

喺英國用debit card買野，只要係£45以下(遲D會加大銀碼到£100)都可以用contactless payment，拍卡就俾到錢，好方便。但其中一次，可能係太耐冇入過密碼，萬母俾錢時，部機要求插卡同入密碼，點知喺呢個時候，萬母又突然失咗憶，入咗3次都錯，當時瘀到想搵窿捐，又驚店員以為盜用卡，好彩當時店員只要求萬母喺收據上簽名，就放咗萬母走。

一踏出店鋪門口，萬母又突然清醒番，記得起自己個密碼。所以萬母又嘗試去另一舖頭買野，睇吓張卡攪成點，點知去到另一間店，一拍卡已經要求簽名，連一次機會都唔俾萬母入密碼。

連瘀兩次，萬母決定收埋張卡2日唔用住，睇吓瞓醒會唔會奇蹟地好番。萬能生曾提議積極嘅解決方法，就係send email去銀行問，但萬母都係決定消極地等一等。

過咗兩日，萬母又再次挑戰張debit card，但挑戰前，萬母決定去櫃員機入一入密碼，睇吓會唔會解鎖得到，結果成功咗，當萬母再拎住張卡去買野時，只係拍卡就得，唔再要求簽名喇。真係瞓兩覺就解決咗喇，Yeah! 符符碌碌又過一關。

#圖文不符

學車記(2) - 正式開始

唔經唔覺，萬母已經學咗10個鐘車，俾咗嘅學費，究竟有咩得著呢？

起初不停咁學開車，停車，左轉，右轉，慢慢就學埋出roundabout，除咗不停兜圈圈，亦正式開始出大路，大路嘅意思係有巴士，多D車嘅路。由揸11 miles上到27 miles。

感覺如何呢？一個字~怯！

每次開車都要先warm up 15分鐘，轉彎轉到差D炒埋牆，再唔係就過晒隔離線，次次都要warm up一輪先叫穩定少少。

揸緊25 miles時怯到不得了，覺得自己似飛車黨，成日都忍唔住去踩個brake。

手腳眼腦仍未協調到，先前兜圈圈時就兜熟咗條路，但一去新路就死晒火，對手轉得盤軚嚟，又顧唔到隻腳去踩制，更惶論去用眼去睇周圍嘅環境，再用腦去決定點行動。

總之就係手腳眼腦有待協調，萬能生話好彩冇去學棍波，否則仲大鑊，呢點萬母200%同意嘅。

但總算有少少進步嘅，叫做~正式開始~出大路，落堂時仲自己揸返屋企，所以呢~萬母嘅鄰居們千萬要小心出入，學車時間，無咩必要都唔好出室外喇。

https://www.youtube.com/watch?v=beugiCFkmVQ&list=PLgFYQFfidPfuimRBpEG1PTUeUbIPW8Ulb&index=25

生咗舊叉燒

香港人冇理由唔識叉燒，但小妹們偏偏唔識，唯有home schooling教"甚麼是叉燒"，同埋"生舊叉燒好過生你"點解。

1. 用叉燒醬，生抽，糖，紅菜頭絲醃2晚

2. 用錫紙包住焗25分鐘

3. 搽蜜糖每邊焗5分鐘

4. 叉燒誕生了

紅菜頭主要係用嚟染色，有攪拌機可以攪碎嚟醃，冇就唯有切絲。

第一次用咗pork shoulder，有D鞋，經朋友提議第二次改用pork belly半肥瘦，滑番D，但D顏色又冇上得咁好。

要努力再鑽研，生多幾舊叉燒先得。

💰💰超市行情：💰💰

pork shoulder £2.99/700g

pork belly slices £2.19/500g

紅菜頭 beetroot £1.39/4個

Topic Day Again

又係每個half-term一度嘅topic day。

睇相就知道今次嘅主題係"埃及"，小妹著住條埃及皇后裙返學，沿途有兩位陌生女子都讚佢beautiful同fantastic，英國人都真係幾友善，又唔吝嗇讚美，真係要多多學習先可以融入文化。

另一小妹嘅主題係"Land, Sea & Sky"，呢個就簡單得多喇，只需要著藍色/綠色衫就得，唔需要特別置裝。

💰💰超市行情：💰💰

埃及皇后裙costume £7.99

焗三文魚

因為未識劏魚，又未識蒸魚，所以唯有食住三文魚先。

平時D滑嘟嘟嘅魚皮，都係萬母獨享嘅，但焗到脆卜卜就變得搶手，未開飯塊魚已經被起皮了。

焗三文魚真係超簡單，傻嘅都應該識。

1. 用鹽同胡椒捽吓舊魚

2. 魚皮向上放入焗爐焗20分鐘

3. 食得

💰💰超市行情:💰💰

三文魚 £2.49/240g

擦鞋水

萬母有個怪癖，就係見到黑皮鞋唔夠黑會覺得好唔順眼。

總係覺得容許細路著對灰濛濛嘅黑鞋係好唔負責任嘅。

但奈何細路總會踢花對鞋，好彩有擦鞋水幫手。

有人話從來唔知有擦鞋水呢樣產品，一直都係用鞋膏擦鞋，well，懶惰嘅萬母讀書時已經係用新潮嘅擦鞋水，遲吓教埋小妹自己擦，再慳多D力水。

💰💰超市行情：💰💰

擦鞋水 £2.75

加雪種

英國嘅天氣開始熱，特別係有太陽曬住嘅時間更加熱，曬住架車感覺似蒸籠一樣，想開冷氣先發現只吹熱風。

冬天買車時完全唔發現架車嘅冷氣有問題，唯有又拎去車房攪攪佢。入雪種盛惠£59.95，一D都唔平，但冇法，唔想做小籠包唯有磅水。

圖為望雪止熱。

哈利波特捉蟲了

Aldi最近做緊Harry Potter產品推廣，有砌圖，圖書，填色簿，文具，card games，手工藝套裝等等，連床單被舖都有。

https://www.aldi.co.uk/search?sort=price-asc&q=harry%20potter%3Aprice-asc%3AtransactionalStatus%3Atransactional%3AtransactionalStatus%3Anontransactional&text=harry%20potter

萬母已經避開D手工藝套裝冇買，但見D card games算平，所以又買咗2副，諗住小妹們自己玩，咁萬母就可以自由喇。

點知，又捉蟲了，小妹捉住萬母一齊玩，係咁考Harry Potter知識，真係被問到口唖唖。

如果屋企有Harry Potter迷又唔介意一齊玩嘅家長，去Aldi睇吓喇，D產品的確幾靚仔㗎。

圖1為card games，每副£2.49，副問題卡有成200題有關Harry Potter嘅問題，阿媽覺得難過會考。

大鄉里搭tube出城

大鄉里第一次搭tube出城，目的地係Marble Arch，倫敦嘅地鐵線都真係幾複雜，朋友提醒要睇清楚轉車嘅月台，因為未必次次一樣。

搭tube好方便，拎張debit card出嚟嘟就得(如果張card係新開嘅，記得先activate，拎去購過物就OK)，11歲以下細路免費搭tube，只要抆住大人衫尾一齊過閘就可以，1個大人最多可帶4個細路。

tube入咗隧道就收唔到電話訊號，所以有咩要處理要趁入隧道前攪好。

Marble Arch嘅Oxford Street真係shopping勝地，諗到諗唔到嘅牌子都有，最後去埋Leiceter Square附近嘅唐人街到此一遊。

天氣清爽，係適合行街嘅好天氣。喺香港，好多野都已經唔做得，能夠生活喺自由嘅土地，更加要珍惜。

#圖為唐人街一景

#為你的心碎而心碎

#但渴望散在天空會不碎

每月駛費

有朋友問萬母，每月嘅支出大約係幾多，下面係萬能家每月嘅主要支出，只供參考。

租金 £1400

council tax £140

電煤 £120

水費 £45

寬頻 £30

電話費 £20 (2人)

TV licence £13

糧食雜項(零售類) £1000

交通(油錢同平均路稅) £50 

學校午餐費 £100　(2人)

學校可以揀自備午餐，唔訂學校飯。學校冇收過書簿費，萬母只係花錢買過校服同訂午餐。

再重申，豐儉由人，家家嘅要求同需求都唔同，以上數字只供參考。

#圖為dandelion

你們這小信的人哪！野地裡的草今天還在，明天就丟在爐裡，神還給它這樣的妝飾，何況你們呢！所以，不要憂慮說，吃什麼？喝什麼？穿什麼？這都是外邦人所求的。你們需用的這一切東西，你們的天父是知道的。(馬太福音6:30-32)

課後運動班

小妹學校有課後運動班，分年級唔同日子上，每星期一堂。

小妹們嘅年級可以揀Multisports或者Dance，本來想叫小妹們揀埋同一班，但兩隻小鬼偏偏要向左走，向右走，一人揀一樣，好彩都係同一日上堂，唔駛攪到阿媽氹氹團，仲賺多每星期一個鐘嘅自由時間。

呢d學校課後班真係好抵上，£10/6堂，就當只係去郁動吓都抵，亦因為平，所以好搶手，小妹都係要排到2nd half term先有位上。

小妹跳完舞返嚟嘅母女對話：

👩： 點呀，今日上運動班點呀？好玩嗎？

👧： 好似跳just dance嘅extreme咁，好快，都幾難跳，同埋好攰。

👩： 攰就早D瞓喇。(暗笑中)

👧： 但係我只係攰，唔係眼瞓喎。

👩： ...... (咩原因都好，早D瞓喇)

圖為小妹嘅夏天運動服。

💰💰超市行情：💰💰

白色短袖T £3/2件

深藍色薄leggings £7/2條

深藍色外套 £6/2件

英國腸仔

小妹喺香港食開廚師腸，嚟到英國食唔慣D英國肉腸，反而念念不忘廚師腸，搵咗一輪終於搵到類似嘅替代品。

呢隻Frankfurters有幾種味道，個皮脆脆哋，似港式腸仔，係小妹獨愛。

如果同小妹一樣鍾意廚師腸嘅朋友都可以試吓。

超市行情：

Frankfurters熱狗腸 £2.20/10條

GCSE Chinese

GCSE(General Certificate of Secondary Education)即係英國嘅中學會考，好多中學都會要求學生喺會考時讀第二語言，最普遍嘅係法文，西班牙文同德文。

但其實除咗呢幾種外文，仲可以揀其他文，咁當然喇，如果學校冇呢種文嘅老師，就要自修攪掂喇。

對於中學先到英國插班嘅同學仔，要臨急臨忙學多種外語，其實都有D難度嘅，所以可以考慮揀GCSE中文去滿足科第二語文。

GCSE中文份卷本身已有繁體字同簡體字，口試亦可揀廣東話或普通話，咁當然喇，繁體字同廣東話暫時仍係小數。

喺英國，而家只有Pearson Edexcel提供廣東話GCSE考試，咁遲幾年會唔會因為有市場而多D機構提供就唔知喇，希望會喇。下面係官網嘅考試specification。

https://qualifications.pearson.com/en/qualifications/edexcel-gcses/chinese-2017.html

GCSE中文卷都分兩個程度，foundation tier & higher tier，係咪同咸豐年香港會考英文科嘅syllabus A & B有D似呢。

分4份卷，聽說讀寫。

Higher tier

卷一(聆聽)： 45分鐘，10題，滿分50分

卷二(說話)： 評核時間約10-12分鐘，分三部份-角色扮演(10分)，看圖說話(24分)，2個不同主題嘅對答(36分)

卷三(閱讀)： 65分鐘，10題，滿分50分

卷四(寫作)： 85分鐘，題1(2選1，80-110字)，題2(2選1，130-180字)，題3(英譯中)

Foundation tier

卷一(聆聽)： 35分鐘，14題，滿分50分

卷二(說話)： 評核時間約7-9分鐘，分三部份-角色扮演(10分)，看圖說話(24分)，2個不同主題嘅對答(36分)

卷三(閱讀)： 50分鐘，10題，滿分50分

卷四(寫作)： 75分鐘，題1(20-30字)，題2(40-50字)，題3(2選1，80-110字)，題4(英譯中)

想了解多D，建議睇埋模擬試卷：

https://qualifications.pearson.com/content/dam/pdf/GCSE/Chinese/2017/specification-and-sample-assessments/SAMs_GCSE_L1-L2_in_Chinese.pdf

如果喺香港已小學畢業，應該唔難應付GCSE中文考試，只要熟習考試模式就得。

最大嘅問題應該係要自己搵廣東話口試嘅考官，同埋搵繁體字教材嚟溫習，呢兩方面萬母都未有頭緒，如果有資料，歡迎分享。

#圖文不符

換季喇

英國嘅夏天終於都嚟喇，萬母終於都可以放低件羽絨喇。

呢個星期，晏晝都超過20度，早晚就涼DD。

趁放完half-term break，萬母都的起心肝幫小妹換夏季校服喇。

其實學校冇特別日子要求幾時換季，一切都係睇家長，好早前已經見有同學仔換咗季，但怕凍嘅萬母一直都持觀望態度。

圖為小妹嘅夏季校服。

夏天可以揀著藍白格仔裙，亦可著短袖polo shirt加灰色裙，本來都買咗短袖polo，諗住配番條灰色背心裙著就OK，可以慳皮D，但睇睇吓又見條背心裙有晒內裡布，似乎又熱咗D，加上小妹又要求著格仔裙，所以就買多條裙喇。

夏天運動衫係白色T加藍色褲(長/短都可以)，咁多憂慮嘅萬母又專登去搵薄長褲俾小妹。點知小妹最後都係嫌棄套校服冇袋，唔可以袋野。

雖然學校對校服嘅要求好寬鬆，但買起上嚟都比想像中難，啱款唔啱碼，啱碼唔啱價，去實體店摷貨都幾辛苦，乾脆上網買仲爽。

而且因為要求太寬鬆，太多選擇，有時買完先發現原來唔啱心水或者根本唔會著，就好似冬天買咗兩條灰色西褲，諗住著褲會暖D，點知小妹堅持要著裙，條褲只係著咗2日就擺埋咗一邊，件短袖polo又係，著都未著過就決定要著格仔裙喇，但好彩係呢邊嘅校服唔太貴。笨過一次，下年就唔會再亂買。

超市行情：

藍白格仔裙 £11/2條

白色短袖T £3/2件

深藍色薄leggings £7/2條

深藍色外套 £6/2件

去溫莎堡探女皇

趁住half-term break，又趁住國際遊客未到，我哋決定去溫莎堡(Windsor Castle)探一探女皇陛下。

https://www.rct.uk/visit/windsor-castle

入去要先預約買飛，家庭票(包2大3小)共值£60.50； 只要入場時去蓋個印，張飛就可以變成年票，一年內再無限次去探女皇。St George's Chapel逢星期日都有崇拜，所以唔開放參觀。Queen Mary's Dolls' House都冇開，可以留番下次再去。

睇城堡頂支旗就知道今日女皇喺唔喺屋企，探訪當日係掛住皇家旗，即係女皇喺屋企等我哋呢！

溫莎堡有導賞機可以借用，有好多唔同語文講解，不過暫時未有廣東話，揀Family version仲有隻小飛龍介紹，每個checkpoint仲布spot me小遊戲添，小妹們都聽得興致勃勃。

不過溫莎堡都真係幾大，要預行1.5-2個鐘，室內冇得推BB車，所以小B們家長要三思先行動，仲有室內係唔准影相嘅。

起初小妹嫌遠，唔肯去探女皇，但到步後就驚嘆，真係好宏偉，同故事書見到嘅城堡一樣咁靚，臨走前仲見到換兵儀式，真係不枉此行。

韓式折疊紫菜包飯

萬母睇fb嘅台灣媽媽群組，見到人哋整韓式折疊紫菜包飯好似好好玩咁，就決定一試喇。

煲煲飯，煎豬扒，煎蛋，跟住摺吓夾吓就OK。

人哋嘅範例整得好靚，但手殘嘅萬母就摺到有D古怪，原來係漏咗最尾切嘅動作，好彩小妹都讚煎豬扒好味，都算係執番身彩。

感恩有近鄰

俗語都有話"遠親不如近鄰"，萬能家離開家鄉，嚟到老蓮咁遠嘅英國，起初真係好擔心會斷六親，得番一家四口自生自滅。

但真係好感恩我哋有近鄰，我哋除咗黐住"浴室之家"之外，仲喺到步冇耐就識到一班香港家庭，每日都有機會用廣東話吹吓水，間唔時送咗細路返學，班媽媽仲由9點吹到3點，真係勤力過返學。

趁住half-term break，大家嚟個野餐聚會，俾機會細路放吓電，曬吓太陽。

有近鄰仲可以嚟個短暫託兒，喺香港大家都有強大嘅支援團隊，但嚟到英國只有互相幫助，互相扶持，咁樣先可以喺5+1呢條漫漫長路繼續行落去。

你的朋友和父親的朋友，你都不可離棄。你遭難的日子，不要上弟兄的家去；相近的鄰舍強如遠方的弟兄。(箴言27:10)

港式點心

小妹一直都想食港式點心，終於都蒸咗蝦餃燒賣。

現成買，自己蒸，幾粒野已經幾磅銀，都真係幾貴㗎，有少少肉赤。

講開蒸點心，又提提，不鏽鋼蒸架同蒸碟可以放埋入家當度寄。

呢度反而多竹製蒸籠，不鏽鋼碟選擇唔多。

💰💰超市行情：💰💰

蝦餃 £6.95/16粒

燒賣 £5.95/15粒

Chessington World of Adventure

除咗去畫畫，其實小妹呢個假期都仲有同朋友仔去咗theme park玩。

因為唔夠早去book飛，所以我哋只係買到下午2點入場嘅晏晝飛，玩到7點閂門。

全日飛價值£34/人，晏晝飛£25/人。

呢個theme park其實好大，除咗有機動遊戲，仲有動物園同水族館，一個晏晝其實係行唔晒嘅。

所以佢都有2日1夜嘅package提供。

https://www.chessington.com/

唔打咁多字，睇多D相喇，太耐冇去玩，真係會攰到一個點。