鈎舞獅仔

萬母其實冇偷懶㗎，之前除咗鈎聖誕樹，兔仔同貓仔，其實仲有鈎舞獅仔㗎，而呢批舞獅仔已經散落喺世界各地喇。

萬母專登揀咗個容易D嘅款嚟鈎，所以只係得個波仔，主體連配件都唔難鈎，煩就煩在最後要組合。 

由於人手製作，隻隻都有D唔同樣，仲要唔知點解，同一個pattern都會鈎出唔同大細。

鈎舞獅教學video

https://www.youtube.com/watch?v=gqtZrkHMFUk&t=1104s

鈎兔兔

應小妹要求，鈎一隻可愛公仔，揀咗呢隻可愛兔兔，今次揀咗毛毛冷，比普通冷難鈎，幾經辛苦先完成一件，好在都幾可愛。

鈎兔兔教學video

https://www.youtube.com/watch?v=LAK9EQve_M4&t=2895s

另外小妹仲要求要隻貓貓，搵唔到教學video跟，嘗試將兔兔改裝，結果變成一隻怪怪的貓，尚有進步空間，下次有心機再試。

毛毛冷製成品雖然係靚，但真係會鈎到手痛。

The Cat House @ Norwich

小妹而家嘅指定行程係去cat cafe探貓。

今次去Norwich，貓cafe都係其中一項行程，呢間The Cat House唔算平，一個人要£12，可以留90分鐘。

小妹話呢間The Cat House嘅貓比較文靜，上次去York嗰間就活潑D，所以都係York嗰間好玩D。

但只要有貓，小妹就滿意。

https://www.cathousenorwich.org/

The Horsey Grey Seals Colony

上回講到我哋喺Sheringham坐火車睇燈飾，其實除咗睇燈飾之外，我哋仲去咗Horsey Gap睇海豹BB，

Horsey Gap其實全年都有海豹睇，但係每年冬天11月初至1月底係海豹嘅繁殖季節，所以冬天先有海豹BB睇。

海豹BB一出世係白雪雪嘅，著住白色fur，海豹媽媽會餵養佢哋3個星期，由14kg谷到佢哋40kg，吹到成個波咁脹，之後海豹媽媽就會離開，掉低海豹BB喺沙灘上，海豹BB就靠身體入面儲存嘅脂肪過活3星期，喺呢3星期入面，佢哋身上嘅白色fur會甩掉，由眼面同尾巴開始甩，到最後甩曬就變成灰色防水皮，呢個時間佢哋開始覺得肚餓，就會自己落海捉海食。

Horsey Gap喺海邊，所以都幾大風， 好彩我哋去嗰日天氣都算係咁，戴曬冷帽手套頸巾都頂得住。

因為係繁殖季節，所以拉咗繩，唔准遊人落沙灘，只能遠觀。

離遠睇個海灘一隻隻野攤喺度，真心有D覺得似係屍橫遍野，但間唔時有D又會郁吓，所以都幾過癮嘅，有興趣睇海豹BB可以趁月底前去，否則要等到年底先再有新一批BB出世喇。

https://www.horseygap.co.uk/seals

Horsey Gap附有停車場，泊兩個鐘約£4。