好物推介：Premier Inn

萬母鍾意帶住小妹四圍貢，但對酒店要求其實唔太低，最低要求係要有4個床位，絕對接受唔到一家四口迫喺兩張單人床，就連兩張雙人床都可免則免，皆因小妹唔願孖舖，平時可以嘅話都會揀成間apartment嚟住，有廳有房大家住得舒服D，但如果只係去短trip，我哋就會揀Premier Inn。

Premier Inn係英國連鎖品牌，總有一間喺左近，萬母最喜歡佢嘅係有family room可以揀，而且仲有齊4個床位嘅family room(1大2小床)，雖然間房唔大，但起碼每人都有個位瞓。

可以加錢食早餐，16歲以下小童免費，變相一家四口嘅早餐就好抵喇。

曾經，我哋住過最平嘅係一晚£50有找，當然就唔包早餐喇，有時地點旺D，或者撞正假期就要貴D喇，但因為總有一間喺左近，有時揀偏遠少少，就會平DD，如果係road trip自己揸車其實都可以接受嘅，而且市中心嘅Premier Inn好多時都冇停車場，或者停車場要另外收費，反而離開市中心可以喺酒店免費泊車。

Premier Inn都有幾個Plan:

最平係Standard: 訂房時要即畀錢，冇得退錢，最多只係改期。

中價係Semi-Flex: 訂房時要即畀錢，但入住前3日可以免費取消。

最貴係Flex: 可以揀入住當刻先畀錢，入住當日1pm前都可以免費取消。

其實英國仲有其他類似Premier Inn嘅選擇，我哋曾經住過Holiday Inn，都係有4個床位，但其中一張叫做日式床墊，即係咩呀？即係就咁掉張床墊喺地下畀你瞓囉(見其中一張相)，成晚痴住張地毯嚟瞓，感覺極不良好，試過一次就永不錄用Holiday Inn，都係住返Premier算喇。

如果你都打算喺英國四圍貢，可以考慮吓Premier Inn，真係幾抵住㗎。

https://www.premierinn.com/gb/en/home.html