半緊急糧水

上星期分享咗萬母響應政府呼籲，稍為儲咗D糧，主要都係camp food，水，藥物同衛生用品。

其實除咗呢D應急物資，我哋仲儲咗D半緊急糧水，點解叫佢做半緊急呢，皆因呢D平時都會食，只係一邊食一邊入貨，令到屋企稍為有D存貨，因為呢D食品冇camp food擺得咁耐，所以要貨來貨去。

其中一樣就係juicy water，第一次飲呢隻innocent嘅juicy water係喺burger king，覺得驚為天人，解渴之餘仲有少少果汁味，唔會太甜又唔會太膩，試過之後我哋就買返屋企喇，喺超級市場間唔時會搵到，但我哋索性喺網上成底買返嚟，有D口淡淡又會飲，真係急時又可以當水飲，但應該未到緊急情況已經會畀人飲曬。

呢個牌子嘅juicy water其實有幾種口味，我哋試過曬，都係覺得apples and mangoes最好飲，而且雪凍風味更佳。

除咗juicy water, cereal bar都係另一種半緊急糧，小妹平時會拎嚟當早餐，下午茶食，但萬母會一次入幾盒，邊食又邊買，必要時又可以當糧食充吓飢。

仲有冇D咩嘢，好食好飲，平時又可以食，緊急情況又用得㗎呢？

https://www.yourcoca-cola.co.uk/p/innocent-kids-apples-mangoes-juicy-water-30-x-200ml/17028287/

囤糧again

英國政府又再呼籲國民囤糧喇，今次係怕惡劣天氣同網絡攻擊。

其實兩年幾前已經囤過一次，今次趁機更新吓，先前囤落嘅藥物，罐頭，大部份已經過咗期，要換過一批。

今次我哋唔再囤罐頭意粉喇，因為太難食，臨過期前本來想食咗佢，唔好嘥，點知實在太太太難食，無人肯食。

所以今次我哋揀咗囤camp food，上次去完露營覺得D camp food都唔錯，今次就入咗一批當緊急糧食，但因為要用熱水浸，所以另外再配咗個gas爐，同再囤多少少水。

除咗糧食，水同藥物，衛生用品都換咗批，濕紙巾，乾紙巾，衛生巾，漱口水。另外政府話要嘅收音機，現金都收妥。

除咗呢D，大家仲諗到有咩值得放入呢個緊急救命箱呢？

EasyJet爆唿體驗

今次去葡萄牙係我哋第一次坐EasyJet，其實EasyJet畀我嘅感覺都唔錯，可以提早30日check in，check in時又會自動編埋一齊坐，唔會好似壞人航空咁，專登打散，迫你畀錢買位。

今次去程時，我哋有隻唿撞爆咗，一落地未出禁區，我哋已經喺機場櫃檯備案，拎咗個reference number，然後要喺7日內上網登記，登記完之後，佢嘅選項係以唿換唿，之後就係漫長嘅等待......

回程時，因為唔肯定機場有冇包件服務，所以我哋喺超級市場買咗保鮮紙，合三人之力，將個唿包到木乃唿咁，最後佢同佢肚入面嘅嘢都能夠安全回家。感恩感恩!

返到屋企，等咗1個月，阿新唿終於到喇，牌子係skyflite london，個唿望落去都唔錯，唯一唔好處係冇extendable，喺英國賣好似比較少見到有得extend嘅唿，anyway，有唿就用住先喇，有得去旅行就得㗎喇。

Aqualand 水上樂園

去得葡萄牙南，玩水就少不了，未出發前同好朋友AI傾過行程，佢推介咗幾個唔同嘅水上樂園，包括好出名嘅Slide & Splash同Aquashow Waterpark，但最後我哋都冇揀到AI推介，因為小妹話唔想去太刺激嘅水上樂園，所以我哋就揀咗個比較local，又可以話係比較山寨嘅Aqualand，入場費比前面提到嘅兩個平，人流亦較少，大部份設施都唔駛排隊，或者只係排一陣，如果只係想小試水上樂園嘅，可以考慮呢個，不過整體感覺就真係比較山寨，冇咩特別安全措施，亦無特別安全指引，咩都要靠自己。

https://www.aqualand.pt/en/

Benagil Cave @葡萄牙

暑假除咗本地遊，其實我哋都有出走嘅，地點係葡萄牙南部。

行程前半部係resort hea遊，後半部就去吓景點遊，其中一個就係Benagil Cave(貝納吉爾海蝕洞)

//Benagil Cave 的中文名稱為貝納吉爾海蝕洞，也有人稱它為貝納吉爾洞穴或浪漫地稱為「上帝之眼」、「天堂之眼」。 

地理位置：位於葡萄牙南部的阿爾加維（Algarve）海岸、拉戈阿（Lagoa）小鎮的貝納吉爾村旁。

自然奇景：這是長年經大西洋海浪與風力侵蝕而成的天然石灰岩海蝕洞。天窗奇觀：洞頂上方有一個巨大的圓形開口（天窗），陽光與藍天可以直接灑落進洞內的隱密沙灘與碧藍海水中，景色極美。 

參觀方式搭船遊覽：多數遊客會從附近的城鎮（如波爾蒂芒、拉哥斯或貝納吉爾海灘本身）搭乘快艇或觀光船前往。水上活動：也可以選擇租借直立板（SUP）或划獨木舟（Kayak）從貝納吉爾海灘出發靠近洞穴。//

出發前問小妹，坐船定撐獨木舟，小妹揀咗撐獨木舟，既然小姐咁揀，萬母唯有頂住恐懼一齊上喇。

我哋揀咗嗰種團叫做小團(最多12人)，有一個領隊(兼攝影師)，跟指示喺停車場報到，主辦方會提供防水袋入個人物品，不過D防水袋因為用完唔會吹乾就收埋，所以係有陣味嘅，其他非貴重物品(例如替換衫褲)係可以放喺主辦方嘅小巴上，活動完後領回。

由停車場要行一段路去海灘，一路落級，喺海灘會先聽安全簡介，跟住就上艇喇，基本上係兩人一艇，但因為我哋係單數，領隊畀我哋揀3人艇定單人艇，結果我哋揀咗3人艇，坐中間嗰個就可以做free rider喇。

全程大約兩個鐘，先入一D小洞，跟住就入最出名嘅Benagil Cave，老實講，真係幾特別嘅，無啦啦穿咗個窿，撐獨木舟比坐船更加係一個特別嘅體驗。最後領隊帶我哋上咗個無人沙灘，休息/玩15分鐘就回程喇，沙灘上有好多海草，踩落去似海棉，又有好多海鷗，仲有好多海鷗小腳印，好得意。

活動後有感：做free rider真係好正，小妹姨撐到肌肉痛，小妹無話痛，但就話下次都係搭船算喇。所以呢個真係一個獨特嘅體驗。

沙灘係冇任何更衣設施，亦冇水沖身，之但係撐獨木舟又唔會係全身濕，只係上岸時有機會畀海浪打濕，所以換衫與否，或者點樣換衫，要先計畫。

https://brotherootzsup.com/

Southend-On-Sea

繼續暑假遊記，暑假期間，除咗入咗城之外，其實我哋都去咗海邊玩。

Southend-On-Sea(濱海紹森德)雖然係叫south end，但其實佢喺倫敦東面，揸車大約個零鐘可到。係一個海邊旅遊區，有好多arcades同fish & chips店，如果鐘意去冒險樂園嘅大小朋友，應該一日玩唔完，因為保守估計，碼頭邊已經有5-6間arcades。

揀去Southend-On-Sea，最主要係想去坐佢嘅Southend railway，一條小小火車軌延伸去大海中間，坐喺上面，一邊可以見到汪洋大海，另一邊就見到有行人好似喺海上散步咁，好特別嘅風景，好多人話似千與千尋嘅火車，大家可以親自去核實吓。

如果真係好鍾意玩arcades，其實過1晚夜都可以，因為真係玩極都玩唔曬。

//濱海紹森是一個位於英格蘭艾塞克斯郡的城市、單一管理區，位於倫敦以東40英里，處於泰晤士河口北部，是艾塞克斯郡濱海度假勝地。當地的紹森碼頭是世界上最長的休閒碼頭。倫敦紹森機場位於市中心以北1.5海里。2011年人口總計有174,300人。 最初因為處於村莊普里特韋爾南部而被稱為「south end」，後來漸漸化為現名。//

好物推介：Monzo Teens Card

一年容易又開學，真係時光飛逝，歲月如梭。

今年萬母準備咗張debit card畀小妹做開學禮物。

先前小妹出街或者跟學校出trip，一係就拎現金，一係就拎萬母張debit card，見小妹開始大，決定幫佢哋開張debit card，做咗個好簡短嘅research後，決定用monzo，主要原因係免費，如果家長自己有monzo account，就可以免費申請細路debit card，細路card仲有3隻色可以揀，螢光粉紅色，螢光藍同螢光黃。

除此之外，細路仲有個app可以mon住自己嘅錢，可以開saving pot賺利息，monzo個app做得好fancy，如果畀心機用，仲可以分析到駛費種類，老實講，萬母自己就冇咁多心機研究個app，但對於青年人嚟講，應該係好多functions可以用。

最重要嘅係，喺家長個app係可以睇到細路個戶口，即係家長可以mon住，可以即時知道有異樣。最後一樣唔知係好處定壞處，就係細路戶口入面嘅錢，喺法律上係屬於開戶嘅家長嘅，我冇話畀小妹聽呢點，只係同佢講，送張debit card畀你，畀心機好好儲錢，學習理財喇。

下面條link可以睇到多D資料，申請方法非常簡單，喺家長自己個app入面㩒幾㩒就得，連核對身份都唔駛，隔日就已經收到張新卡喇，方便快捷，家有青年人嘅都可以考慮幫佢哋申請張debit card備用。

https://monzo.com/current-account/under-16s