喺英國用debit card買野,只要係£45以下(遲D會加大銀碼到£100)都可以用contactless payment,拍卡就俾到錢,好方便。但其中一次,可能係太耐冇入過密碼,萬母俾錢時,部機要求插卡同入密碼,點知喺呢個時候,萬母又突然失咗憶,入咗3次都錯,當時瘀到想搵窿捐,又驚店員以為盜用卡,好彩當時店員只要求萬母喺收據上簽名,就放咗萬母走。
一踏出店鋪門口,萬母又突然清醒番,記得起自己個密碼。所以萬母又嘗試去另一舖頭買野,睇吓張卡攪成點,點知去到另一間店,一拍卡已經要求簽名,連一次機會都唔俾萬母入密碼。
連瘀兩次,萬母決定收埋張卡2日唔用住,睇吓瞓醒會唔會奇蹟地好番。萬能生曾提議積極嘅解決方法,就係send email去銀行問,但萬母都係決定消極地等一等。
過咗兩日,萬母又再次挑戰張debit card,但挑戰前,萬母決定去櫃員機入一入密碼,睇吓會唔會解鎖得到,結果成功咗,當萬母再拎住張卡去買野時,只係拍卡就得,唔再要求簽名喇。真係瞓兩覺就解決咗喇,Yeah! 符符碌碌又過一關。
#圖文不符
沒有留言:
發佈留言