哥爾夫球初體驗

抓住暑假嘅尾巴，玩到盡，趁住英國公眾假期(bank holiday)，一班細路湊埋一齊上哥爾夫球興趣班，上2個鐘每個細路盛惠£25，哥爾夫球真係有錢人嘅玩意。

睇吓小妹，就算無實際都有D姿勢㗎，八月天著羽絨，倫敦呢幾日最高氣溫係19度，究竟算係夏天定冬天，媽~~我D季節概念亂晒喇。

Writtle Sunflowers 太陽花園

要抓住夏天嘅尾巴就要抓住太陽花嘅尾巴。英國嘅太陽花花期係8月中至9月，所以趁住仲有得睇就要快。

https://writtlesunflowers.weebly.com/

Writtle Sunflowers係一個家庭式花場，佔地唔大，而且已經季尾，開埋呢兩日就要等出年喇，所以花海唔算好壯觀，估計早1星期去會靚好多。

入面有個太陽花迷宮，D花高過人，入到去真係會迷失，好彩佢都好簡單，跟住條路走一定走得返出嚟，小妹入去迷宮，搵咗張secret picture，之後仲換到份小禮物(朱古力金幣)。

成人入場£4/人，細路免費，第一朿(6支)太陽花£4，第一朿野花都係£4。

喺超市喺花店都見過太陽花，成田嘅太陽花真係第一次見，要剪斷佢需要大較剪先得，太陽花花莖上有小刺，雖然冇玫瑰咁尖，但摸上去都係唔多舒服嘅。

當小妹去剪太陽花時，萬母就去剪野花，一邊剪一邊感嘆大自然嘅偉大，原來採花係會上癮嘅，離開咗農場之後，見到路邊嘅花都有衝動去剪，所以歌仔先會叫人"路邊的野花不要採"。

都仲有其他太陽花田仍開放，如果想睇就真係要抓住個尾巴喇。

下面呢個太陽花田入場費£6.5，大小同價。

https://www.thepopupfarm.co.uk/

#這是天父世界

有朋自遠方來~Alexandra Palace

上次我哋去小鎮探朋友，今次輪到佢哋嚟倫敦探我哋，多謝友人體諒萬母廚勢不佳，簡簡單單野餐攪掂，小妹對友人嘅炒米粉相當有興趣，食完一碗又一碗，萬母真係要好好反省吓，平時係咪餓親小妹。

Alexandra Palace位於北倫敦嘅最高點，可以鳥瞰倫敦市，呢度曾經係英女皇嘅行宮，但已經改建成娛樂中心。

講吓Alexandra Palace有咩玩先，首先佢有go ape(繩網陣)，ice rink(溜冰場)，Pitch & putt(哥爾夫球)，劇院，仲有滑板場，兒童遊樂場，艇仔湖。

https://www.alexandrapalace.com/

餵飽自己之後，細路們就去湖邊餵鵝/鴨/鴿/雀，班禽鳥完全唔驚人，遠遠見到有人停喺岸邊已經排晒隊遊過嚟，班鴿最離譜，完全係進擊的鴿子，掛住食連踩到人隻腳都唔理，萬母對住佢哋，只能不停嘴噏噏"我冇野食㗎，唔好過嚟呀！"，可惜班鴿應該聽唔明廣東話，完全冇理！

唔好以為落咗水就冇事，班鵝喺水入面都會跟住D艇仔搵食㗎，成日用亮晶晶嘅黑眼睛楚楚可憐咁望住人，攪到萬母唔敢同佢四目交投。

一家幾口包隻艇仔玩30分鐘，盛惠£18.95。

獨留兒童在家？

喺香港，好多家庭都有工人姐姐，甚至長老們幫手睇細路，兩公婆要出街返工/拍拖都可以有人幫眼睇仔，但嚟到英國，工人姐姐9成9成冇喇，連大部分長老們都留守香港，屋企冇人幫手睇細路，要出街一係全家一齊出，一係就單拖出，冇得話兩個大人自己出。如果單拖湊細路，仲大穫。

香港嘅法例規定16歲以下兒童不得獨留在家，喺英國又點呢？有冇類似法例呢？

官網：

https://www.gov.uk/law-on-leaving-your-child-home-alone

係有嘅，但就冇一個明確嘅年齡界線，指引咁講：

🐥絕大部份12歲以下兒童未夠成熟自行在家一段長時間

🐥16歲以下兒童不能自行在家過夜

🐥絕不能將嬰兒/幼童獨留在家

有網站會教家長，留細路喺屋企前要有咩準備，例如：細路嘅心理準備，糧食準備等等。

https://www.nspcc.org.uk/keeping-children-safe/in-the-home/home-alone/

萬能家算係好彩，萬能生仍然work from home，暑假期間就算萬母外出買餸，都叫做有個大人喺屋企坐陣，但如果真係冇人睇細路，又唔放心細路獨留在家，唯有睇吓附近有咩褓姆，或者而家越嚟越多香港人英遷，總有一個喺左近，唯有睇吓有冇啱傾嘅街坊鄰里可以幫幫忙喇。

褓姆網站：

https://www.childcare.co.uk/find/Childminders

圖為小妹嘅車上消遣活動。

細路免費驗眼

NHS包咗16歲以下細路同60歲以上老人免費驗眼，NHS網站寫每2年一次，但其實視光師會建議幾耐之後再驗嘅。

https://www.nhs.uk/nhs-services/opticians/free-nhs-eye-tests-and-optical-vouchers/

就係咁，萬母幫小妹約咗去驗眼。

以下係萬母約去驗眼嘅眼鏡舖，其實有好多唔同選擇嘅，萬母只係貪近貪方便唧。

https://scrivens.com/

登記時要出示NHS number，驗完眼如果冇問題，係可以拍拍屁股就走嘅。

有問題就要配眼鏡喇，某D框係NHS包埋，如果揀呢D框連眼鏡都係免費喇。

否則就依價計，小妹揀咗個£15嘅框，另加coating加£15，埋單£30。

大約個多星期就收到電話，通知可以拎眼鏡喇。

合資格嘅朋友真係唔好嘥，每年去驗眼，尤其係細路發育時期兼成日睇電腦，更加要check住對眼。

註：冇問題嘅話，佢真係會話冇問題，唔駛配眼鏡嘅，唔似香港某D眼鏡舖咁係唔係都叫人配，所以可以放心去驗眼。

Costco 批發超市

好多人都介紹過Costco，又話廁紙抵買，樽裝水抵買，肉類抵買。

我哋終於去一睹風采喇。

要入costco觀光，先要成為會員，或者由會員帶領入去。

官網：

https://www.costco.co.uk/

至於點樣成為會員，有咩資格等等，可以上官網睇。入會要畀會費，個人會員每年會費£33.60，都真係唔平㗎，萬能生話當係theme park年票，入去觀光吓，如果唔啱玩下年就唔續會咁話。

好喇，入到去costco感覺佢係一個擺放整齊嘅貨倉，D日常品通常都一pack pack咁賣，例如：4支茄汁，4支果汁，6支牙膏，4條廁紙，如果計單價，係比出面超市平少少嘅，但前題係要啱自己用同埋屋企有位放。

如果未入過去，的確值得入去觀摩吓，至於值唔值得入會，就要睇自己嘅喜好同需要，萬能家都仲搜尋緊costco有咩貨品啱用。

BTW，有朋友喺costco買咗張乒乓波檯返屋企，costco的的確有好多你諗唔到嘅野賣，包括圖中嘅滑梯。

哈利波特影城

哈利波特影城(The Making of Harry Potter)係harry potter fans唔可以錯過嘅景點，雖然入場費好鬼貴，一家四口要£150。

但入面嘅場景真係可以鈎起記憶，強烈建議睇曬D戲先去影城，起初以為佔地唔大，又冇機動遊戲玩，會好快行完，點知最後行咗3粒鐘。小妹拎住本Harry Potter passport不停去蓋印同埋搵golden snitches，唔搵曬唔肯走。

以下係小妹嘅遊後感：

I went to the Harry Potter Studio - it was great! We had to find 16 golden snitches in the studio - some were easy, some were hard. We also had to collect 7 stamps in our Harry Potter passport - you couldn't see the stamps, but you could feel them.

哈利波特影城嘅飛極之難買，當朋友推介時，萬母check過到2022年嘅非返學日子都買唔到飛，點知當7月英國解封時，影城都解封，放咗好多飛出嚟，就係咁萬母就執到暑假檔期嘅飛喇。想去嘅朋友，記住早D買飛喇。

官網：

https://www.wbstudiotour.co.uk/tickets/