英國雪糕車

英國雪糕車係冇"藍色多瑙河"嘅，要避要靠嘅唔係敏銳嘅聽覺，而係"有遠見"嘅視覺，喺細路未見到雪糕車之前，運路走。

不過避到一時，避唔到一世，最低消費多謝£2。

洋蔥豬扒

呢D家常小菜，由細食到大，但從來冇諗過究竟點整。好彩而家互聯網發達，想知咩，上網查就得。

1. 醃豬扒

2. 煎豬扒，備用

3. 爆香洋蔥條，加入豬扒，調味料(生抽，茄汁，糖，水)

4. 炒熟晒，汁夠濃就上碟食得

因為萬母太心急，D汁都仲係稀lung lung咁，但味道都唔錯嘅。

萬母記低呢D BB班食譜，一來方便自己下次再煮時記得點整，二來可以鼓勵無飯主婦們，事在人為，只要醃得夠，煮得熟，就食得。

爆呔記

萬能家又遇著新考驗喇，今次係玩爆車呔，好彩唔係出出吓街爆，不過就攪到成個weekend冇得去街街囉。

星期五路過架車時發現爆呔，萬能生即刻上網訂新呔，新呔要等3日先有貨，而要星期二先有timeslot換呔，所以一個weekend就冇車用喇。

萬能生格價後，揀咗Kwik Fit，換一對呔盛惠£130。朋友提醒揀車房時要小心，格多幾間價先好決定。

https://www.kwik-fit.com/

今次好彩係未出發已發現問題，但難保下次都咁好彩，所以我哋都係搵定breakdown service provider，以備不時之需。以下兩間係教車師傅推介嘅。可以一早揀定breakdown cover，亦可以有緊急狀況先call佢哋，但緊急就當然會貴D喇。

https://www.theaa.com/

https://www.rac.co.uk/

#出入要平安

Topic Day

又係D乜Day物Day，不過今次呢個Topic Day唔係全國性，只係校內舉行嘅。

英國嘅小學採用主題式學習，整個星期/時段，所有科都係圍繞同一主題學習，咁老師會定某一日做Topic Day，小朋友可以唔著校服，著有關主題嘅服裝返學，如果唔想買costume就唯有自己諗辦法。

小妹們呢排嘅主題分別係Dinosaurs!同Anglo Saxons。

恐龍主題除咗扮恐龍之外，仲可以扮explorer，咁小妹就揀咗做explorer，佢話著啡色/黃色/白色就可以，結果摷勻成屋，搵到件淺啡色外套，帶埋支望遠鏡，就成個探險家咁喇。

Anglo Saxons就真係考起喇，好彩老師附埋圖，都係D啡啡灰灰嘅colour tone，咁萬母唯有又摷喇，結果摷到自己件灰色衫，俾小妹當裙著，又過到關喇。

每個學期都有Topic Day，次次都唔同，朋友講笑咁話，要建議未寄家當嘅朋友，考慮寄一set彩虹衫嚟，即係紅橙黃綠青藍紫啡灰黑白，咩都有件，咁就咩topic都夾到喇。不過冇都唔緊要嘅，其實著咩老師都唔會話嘅，只要開開心心返學就得。

講開寄家當，D just fit嘅童裝童鞋，真係唔好嘥心機運過嚟，尤其係船運，運到嚟都已經唔啱著，變成食之無味，棄之可惜。

Coursera

嚟到英國，萬母轉職專業"土地測量師奶"，時間的確比喺香港時充裕咗，咁除咗上網煲劇，其實萬母都有好好學習嘅。

萬母搵到coursera有好多免費courses讀，好多唔同科，總有一科啱心水，而且仲可以練吓英文。

https://www.coursera.org/

萬母上咗個Supporting children with difficulties in reading and writing，萬母喺呢個course知道，原來讀障細路，寫撩草會好過寫正階，因為寫撩草時，D筆劃接住去，唔需要成日拎起支筆，而且撩草可以好明顯咁分到一個個詞語，唔會好似寫正階時因為冇隔手指位而連埋晒一串，唔知點分D字。

Coursera嘅course如果只係旁讀，真係免費，如果想拎cert放入CV，就要俾£35。

其實都仲有好多野想學，營養學呀同心理學呀，趁有時間增值吓自己，話唔定讀吓讀吓讀出條新出路都唔定。

如果你都悶悶哋，又想增值吓，就reg個account讀吓書喇。

芝士大蝦麵

小妹好鍾意食芝士龍蝦伊麵，嚟到英國由萬母出手。

龍蝦實在太麻煩，所以用蝦球代替。

冇買到伊麵，所以用蛋麵代替。

1. 煮麵，隔水備用。

2. 煎蝦球，備用。

3. 煮雞湯，加芝士煮溶。

4. 再加入蝦球。

5. 麵加芝士醬，食得。

結果芝士龍蝦伊麵就變咗芝士大蝦蛋麵，都食得落口，止到痕嘅。

圖2係蛋麵，萬母都幾鍾意呢款蛋麵，煮4分鐘就食得，懶惰又唔想食即食麵時，蛋麵都係好選擇。

💰💰超市行情：💰💰

Sharwood's Egg Noodles 340g £1.00 (正價£1.75)

Raw Jumbo King Prawns 225g £4.50

定期物業檢查Periodic Property Inspection

喺英國，業主出租物業之後，係有權定期入屋檢查間屋嘅情況嘅，大約3-6個月一次，當然喇，如果已經係長期租客，業主又放心嘅話，物業檢查就會隔耐D先做一次喇。

我哋喺住左3個幾月時，就收到agent通知要檢查，其實agent都幾好嘅，會問咩時間方便，我哋就揀咗小妹們返咗學嘅時間。

又係因為個肺炎，檢查時，我哋就係企出門口等，而檢查人員就入屋巡個圈，影吓相，大約5分鐘左右就完成。

見D網站寫檢查完會有報告睇，點知等咗成個月都唔見，唔知係agent問題定係咩喇。但好彩檢查時家當未到，間屋算係簡潔，好過而家一屋都係紙箱。過咗咁多都冇俾人warn，應該都算pass咗個inspection嘅。

https://www.your-move.co.uk/blog/periodic-checks-why-do-they-happen-and-what-do-they-involve

#圖文不符

飯可以唔煮，劇唔可以唔煲

萬母嘅煲劇年資比小妹仲要大，D咁資深嘅嗜好當然唔可以受地域限制，去到地球嘅另一端依然要煲到底。

1. Netflix

呢個應該好多人知，不過萬母遇著嘅問題係D韓劇名會變咗英文，要諗諗先知係邊套劇，但Netflix仍然係煲劇首選。

2. VPN

有D劇喺Netflix冇得睇，但喺英國又開唔到某D亞洲網站，呢個時候，唯有用VPN駁返香港，再上網煲劇，為咗煲劇，真係可以去到好盡。

3. ViuTV World

萬能生唔講都唔知，原來ViuTV有個youtube頻道，世界各地嘅觀眾都可以睇到ViuTV嘅自家作品。 萬母就喺離開咗香港之後，煲番"全民造星"同"男排女將"，而家已經分到MIRROR 12子喇，唔喺香港反而仲睇多咗香港嘅電視節目，真係有D諷刺呢。

https://www.youtube.com/channel/UCsjdSKkAqo9xiK8fOqZliOA

不過呢個youtube頻道比官網上架得慢D嘅，所以當好心急好心急時，都係要用VPN返官網睇，我哋而家日日VPN返香港睇"考有feel"同"學神出沒注意"，為咗睇電視，真係咩都得。

網上港式超級市場

喺英國，少不免都要去吓亞洲超市，買吓米呀，豉油呀咁。

我哋亦會去韓式超市，韓超除咗有韓國野賣，都有中式醬料賣，仲會播韓文歌，一邊買野一邊聽歌，實在令人心情愉快。

今次講呢間華南行，係一間網上超級市場。舖頭背景可以睇下面嘅新聞報道。

https://www.thestandnews.com/tag/%E8%8F%AF%E5%8D%97%E8%A1%8C/

https://hk.appledaily.com/local/20210420/7EHY644CFNGC5CX4TQEFTKL4ZE/

下面係華南行嘅網站。

https://www.wanahong.co.uk/zh/

咁講番今次嘅幫襯經驗，我哋星期五落單，買咗好多野，主要係米，調味料，紫菜，湯包。 星期三收到速遞公司話會送貨，咁就等喇，點知速遞公司之後話我哋冇人喺屋企，所以送唔到貨，但明明我哋全日都有人喺屋企，如是者，之後四日都係相同情況。嘗試聯絡速遞公司，但只有網上機械人回答，答咗等於冇答，個聯絡電話又寫明只供寄件人用，咁我哋唯有聯絡番華南行，請求協助，結果經華南行向速遞公司查詢，我哋即日晏晝就成功收到貨喇。

可能係我哋件貨太重，速遞唔想處理喇，但點都無理由屈我哋冇人收貨架嘛。

下次，我哋仍然會經華南行訂貨，希望速遞生生性性，好好送貨喇。

搵師傅學揸車

lockdown期間，所有駕駛學院同教車師傅都冇得開工，所以一直都等4月中開放番先有得學車。

下面係官方連結，輸入postcode可以搵到附近有咩教車師傅。

https://www.gov.uk/find-driving-schools-and-lessons?step-by-step-nav=e01e924b-9c7c-4c71-8241-66a575c2f61f

下面有一D駕駛學院嘅網站，都係網友或者本地fb group推介嘅，入去先輸入postcode，再揀棍波定自動波，就會出價錢，自動波大約係£30-32/hr。

https://www.theaa.com/driving-school/

https://www.learnerdriving.com/

http://www.dieseldriving.co.uk/

https://engage-driving-school.business.site/

https://www.instagram.com/premierdrivingschool_/?utm_source=qr

咁萬母自己又點呢？因為萬母實在太驚嗰架機械，好擔心舞佢唔掂，所以搵咗個識廣東話嘅教車師傅，希望初期聽廣東話指示，舞掂架車先，之後再轉台聽英文。

學咗第一堂，師傅話左右不分嘅萬母有潛質，well，唔通佢話"你無得救架喇，都係慳番D學費喇"咁咩？！

呢條學習之路，真係長路遙遙。

#圖文不符

#小妹傑作

必勝海鮮寬條麵

萬母苦練幾個月，終於有少少成果，因為小妹話好想食pizza黑嘅海鮮寬條麵，所以萬母又嚟挑戰，今次連醬汁都自己整。

1. 煲水煮麵，煮海鮮

2. 細火煮牛油(30g)，加麵粉(30g)，離火攪到無粒粒

3. 加牛奶(200ml)攪勻

4. 開細火邊攪邊煮至杰杰地

5. 加入忌廉(200ml)攪勻，落鹽調味

6. 加入熟嘅海鮮同麵，攪勻

7. 加芝士入爐焗

味道同賣相都過得去架，家人話萬母係"被事業耽誤的廚師"，萬母覺得自己本來應該係"天才小廚師"，而家被耽誤成"亂來老廚師"。

💰💰超市行情：💰💰

急凍雜錦海鮮 £5.00/300g

假期功課

喺香港嘅長假期，條假期功課list長過水蛇春。

喺英國呢個復活節假期加term break，小妹只有一樣假期功課，就係整個Anglo-Saxon shield。

Anglo-Saxon即係盎格魯-撒克遜，係個統稱。形容喺中世紀初期住喺英格蘭嘅民族。

想了解多D，可以去下面網站自修。

https://www.bbc.co.uk/bitesize/topics/zxsbcdm

西史萬母真係唔多曉，希望小妹學識咗返嚟會教吓萬母。

講番個盾，我哋用紙皮做，然後兩姐妹合作用水彩油，都總算整得唔錯吖，做完呢樣功課，就輕輕鬆鬆咁現足成個假期喇。

聽日終於都返學喇！Yeah！

阿茂整包

嚟到英國，真係試咗好多未試過嘅野，今次嘅新嘗試係焗麵包。

喺tesco買包預拌麵包粉，只要加水就得，啱晒懶人。

小妹們搓呀搓，本來想搓造型麵包，最後搓咗好多篤野。

雖然其貌不揚，但新鮮出爐時味道唔錯，小妹加朱古力醬食到停唔到口，萬母則覺得口感有D似法包，外皮脆脆哋。

搓麵包都不失為一個好嘅term break活動，仲可以訓練感統，而且一包粉價錢好平，呢6篤野用咗四分一包粉，只值£0.2125。

💰💰超市行情：💰💰

Tesco Crusty Wholemeal Bread Mix 500G £ 0.85

睇屋記 (13)

呢間係1828呎4房3廁嘅排屋。

地下一層有兩個廳，長長嘅廚房同客廁。

一樓有三房一浴屋，二樓有一房一浴室。

間屋面積好大，所以好寬敞，已做loft conversion，所以二樓有套房，但一樓上二樓條梯係開喺其中一間房嘅門口，所以個layout有點怪怪地。

地下未做extension，但只係地下一層已有7百幾呎，大過香港好多屋。

個花園都好大，放咗summerhouse之外，仲有好多位，可以放埋乒乓球檯。

呢間屋嘅賣點係喺熱門學校門口，根據就近入學原則，呢間屋嘅地理位置超強。

但喺學校門口其實都有缺點，就係返放學時間會超塞車。

咁呢間屋有咩缺點呢？就係超殘同超貴，買咗呢間屋嘅話一定要花錢裝修先住得。

其實呢間屋喺我哋初到步時見佢第一次上架，當時未安頓好，再覺得佢好貴，所以冇睇到，之後過咗幾個月見佢又再上架，就決定去參觀吓喇。

下回再解釋點解佢上架，落架，又再上架。

單色西炒飯

飯煲嚟咗，可以試多D唔同嘅菜式，第一樣挑戰嘅係西炒飯，因為屋企冇人食三色豆，所以變成單色西炒飯。

1. 炒蛋碎，備用

2. 炒香腸粒，蕃茄粒，煙肉粒，備用

3. 炒白飯，2-3分鐘

4. 加入所有配料，蕃茄醬同糖，攪勻，上得碟

好彩小妹們都俾面，讚好食，有人欣賞先有動力繼續架嘛。

💰💰超市行情：💰💰

蛋 £ 2.05/12隻

腸仔 £ 2.20/10條

蕃茄 £ 0.75/6粒

煙肉 £ 1.50/300g

白米 £ 14.17/10kg @亞超

Credit Score 信貸評分

喺香港從來都冇擔心過自己嘅信貸評分，但嚟到英國，所有野從頭reset。

萬能生初到步時，向英國獅子銀行申請信用卡，結果被拒，講緊係香港獅子銀行已用幾十年，但原來所有紀錄都帶唔到英國。問獅子銀行點攪，佢只答等多3個月再試吓。

以下係英國獅子銀行建議查自己Credit Score嘅網站。

www.experian.co.uk

www.myequifax.co.uk

www.callcredit.co.uk

萬母check過自己嘅credit score，連777都唔到，只得689，屬於poor，正宗poor guy。呢個credit score連想申請網友介紹，專俾人build up credit嘅信用卡都唔合資格。

信用卡

www.capitalone.co.uk

網頁有介紹點樣提升自己嘅credit score。

1. 登記做選民

當登記咗做選民之後，喺選民登記冊度就有你資料，咁就可以證實真有其人。登記網址： gov.uk/register-to-vote

2. 建立信貸紀錄

其中一種方法係申請信用卡，準時交卡數。但問題係credit score太低，連信用卡申請唔到。

3. 唔好一次申請太多信用卡

每次申請信用卡，都會有個紀錄喺自己個credit report度，短時間內太多紀錄，會俾人覺得好等錢駛。

4. 用eligibility checker

用eligibility checker可以喺未申請信用卡前估到會唔會獲批，夠分先去申請就唔會被reject咁多次。

5. 準時找數

呢點好易理解，拖數就會被人記住，網頁話最少記6年。有人話設立direct debit(類似自動轉帳)都可以提升自己嘅credit score，但前提係戶口要夠錢過數。

6. 閂左冇用嘅戶口

有太多冇用嘅戶口都會影響credit score。

後補：

7. 用creditladder報告交租情況

有朋友教萬母可以用creditladder報告交租情況係增加credit score

https://www.creditladder.co.uk/

初到步唯有從低儲起，慢慢嚟，遲多幾個月，睇吓過唔過到777先。

包雲吞

萬能家比較鍾意食餃子，雲吞呢類，初嚟英國時，曾經喺西超買過包餃子，結果係難食到嘔，個皮又厚，個餡又唔好味，小妹咬咗一啖已經唔要，萬母對食要求唔高，但都覺呢隻餃子係訓練毅力，要超強嘅意志同毅力先食得晒。

搵嚟搵去，只有亞超同韓超有好味餃子，但價錢偏貴，£3.69-5.09不等，所以我哋決定自己買雲吞皮，蝦仔，碎豬肉，自己包。

圖1為萬能生同小妹嘅作品，圖2為"毅力牌"餃子嘅終極士多啤梨版，如果有親友嚟英國探萬能家，又有勇氣挑戰士多啤梨餃子，萬母樂意送你一包，不過食完請發表食後感，謝謝！

💰💰超市行情：💰💰

雲吞皮 £2.6/50塊

後補：

//波蘭餃子（波蘭語：Pierogi），其斯拉夫詞根「pir」表示歡宴。「rogi」是犄角(複數形式，單數是「róg」)，取形為名，這和中國餃子的起源「角子」是一樣的。

傳統上，這是在聖誕節及其他重大節日吃的。餃子水煮熟了，可以用洋蔥和奶油煎著吃，或蘸酸奶油吃。

在波蘭克拉科夫有以該食物為主舉辦的餃子節。由於東歐移民的關係，也流行於美國和加拿大。

通常呈半圓形，和中國餃子外觀類似。餡料分三大類，菜餡類、肉餡類、起司餡。以及包括菠菜、馬鈴薯、肉類、起司、蘑菇、德國酸菜。還有種以水果為餡的。以水煮熟為主。也有熟後再烤或煎成金黃色。餃子佐以起司、酸奶油或碎煙燻肉。口味多樣。

波蘭餃子的主保聖人是聖雅青。//

https://zh.wikipedia.org/wiki/%E6%B3%A2%E8%98%AD%E9%A4%83%E5%AD%90

A for apple, B for boy?

細個喺香港學A for apple，B for boy，C for cat，新一代嘅香港學生就學A for Astronaut，B for Barbarian，C for Chimpanzee，嚟到英國又要重新學過。

附圖係NATO Phonetic Alphabet，喺英國通用，咁幾時會用到呢？就係同人講電話時，例如：打去agent，去打報漏煤氣呀，人哋會問你postcode，姓名，電郵地址，除咗串出嚟，仲會用呢個Phonetic Alphabet，例如： MAN，M for Mike，A for Alpha，N for November，咁樣講電話就冇咁易攪錯喇，我哋已經將呢張圖save喺desktop，每次講電話都開出嚟對住。

嚟到英國，真係ABC都要重新學過。

Viennetta千層雪糕

嗱，萬母唔認細細個食過Viennetta架，又唔認佢係童年回憶嚟架。

D洋鬼子真係好可惡，企圖用D特價雪糕，傷害我國人民嘅窈窕身段，實在其心可誅。萬母決定要抵制佢，直至下次特價為止。

當萬母醒起應該同雪糕喺梳化合照時，佢已經被KO了，唯有等下次喇。

💰💰超市行情：💰💰

Viennetta千層雪糕 £1 (正價 £1.65)

睇屋記 (12)

呢間係977呎嘅半獨立屋(semi-detached house)。

由於間屋所有extension都未做，所以面積唔係特別大，而間屋本身亦係屬於細嘅3房house，所以面積唔過一千呎。

地下有打通嘅客飯廳，同細細嘅廚房。

一樓有三房一廁，D房兩大一細，屬於好傳統嘅間隔。

呢間屋由於係喺斜路底，間屋嘅花園係比間屋低一級嘅，廳/廚房對出有個平台，業主放咗D戶外梳化，估計天氣暖時係一個好休閒嘅聯誼空間，平台底有個頗大嘅儲物空間(見圖)。

平台旁邊有石梯落花園，花園設計都算別緻，花園尾有間summerhouse，同另一個"吹水之地"，感覺現手業主應該都幾鍾意同朋友聚會。

咁間屋有咩缺點呢？就係佢咩extension都未做，所以面積唔算大，如果想extend就要自己花心機去攪喇，全屋只得一個廁所，要裝多個廁所可能要諗吓計仔先得，仲要計吓條污水渠點走，萬母曾經好天真咁以為，只要有位就可以加多個廁所，但經朋友一言驚醒，除左要有位，仲要考慮條污水渠點走，獨立屋/半獨立屋就易攪D，條污水渠只要先走出屋外就可以。但呢間屋仔又遇著另一問題，就係佢嘅樓梯係貼住隔壁屋，即係如果喺樓梯底整個廁所，條渠冇得直接走出屋，因為牆外面係人哋間屋。

而且間屋嘅裝修本身半舊不新，估計執吓執吓就會變成大執，咁呢筆數又要計埋先得。

申請圖書證

萬母後知後覺，好遲先醒起可以利用本地圖書館資源，申請圖書證，借電子書同實體書。

雖然圖書館仲係因為lockdown唔開，但可以上網填表申請membership，仲可以即時用到e-library嘅資源，可以借到ebook睇(需要download Adobe Digital Editions)，小妹先前就係用e-library，睇咗本幾本書。

將e-membership upgrade埋去full membership仲可以借實體書，稱為select and collect，雖然萬母一口氣select咗好幾本，但係佢係逐本逐本出email叫去collect，而且而家圖書館每星期只開一日，所以暫時只係帶咗一本返屋企。

圖為萬母幫小妹select嘅書，竟然借書會送埋紙袋，真係好細心。

遲D等lockdown完，小妹仲可以親自去圖書館睇書添。

喺下面連結輸入postcode可以搵到屋企附近嘅圖書館。

https://www.gov.uk/local-library-services

Cervical screening

⚠️⚠️先旨聲明，呢篇又係講女人野，男士請自行迴避，萬母對一切財物損失係唔會負責任架。⚠️⚠️

Cervical screening即係子宮頸細胞檢查(柏氏抹片)，喺英國，25歲以上嘅女性，登記左GP後都會收到邀請去做呢個檢查，朋友話佢哋係收信，而萬母係喺登記GP後2個幾月，直接收到電話邀請。

聽電話時其實聽唔清楚究竟叫去做咩檢查，只聽到係screening，但又唔知點解，萬母心入面一聯想到嘅就係柏氏抹片，好彩最後都估啱咗。萬母又唔知邊度嚟D勇氣，竟然同姑娘討價還價，想早D檢查，方便接小妹放學，姑娘亦好好耐性，問小妹讀邊間學校，幾點放學，最後都改到放學前嘅時間，如果換著香港政府醫院，可能已經俾姑娘鬧爆咗。

去到GP度，登左後等左唔夠5分鐘，已經被嗌名入房，入到房，姑娘循例都會問吓個人資料(姓名，出生日期，地址，電話)，有冇sex partner，係male定female，上次經期係幾時，有冇機會懷孕，用咩避孕方法(contraception)等等，又會問先前有冇做過呢D檢查，萬母答喺香港做過，但就手上冇report，姑娘就話冇喺英國做過就當係first test，佢仲解釋如果驗到唔同嘅菌就要隔幾耐再檢查，萬母聽到HPV，HIV，但因為資訊太多，其實係聽唔晒嘅，加上個腦仲唔多聽話，聯想埋HMV，可能姑娘見萬母個樣有D迷惘，所以都解釋話書面結果會寄去屋企，上面會寫得好清楚嘅。

檢查過程其實好簡單，雖然好多人都話好唔舒服，但萬母覺得姑娘手勢都唔錯，而且算溫柔，當然同香港嘅私家醫生冇得比，私家醫生有特別嘅床，床上面又有腳踏，呢度就只係普通一張可升降嘅床，要自己喺床上曲起對膝頭哥，但如果同香港嘅政府醫生比，英國姑娘就溫柔好多喇，前後唔駛20分鐘已經可以離開診所。

下面條link有講解檢查過程嘅影片，放心，冇真人示範嘅。

https://www.nhs.uk/conditions/cervical-screening/

所以，登記左GP嘅絲打，收到信或電話唔駛驚，係正常程序嚟嘅，放心去做檢查喇。

香港衛生署子宮頸細胞檢驗嘅網頁，有講檢查前嘅準備。

https://www.cervicalscreening.gov.hk/tc_chi/cs/cs_what.php

Brita濾水壺

先前分享洗水垢時，有朋友介紹可以用濾水壺將水過濾，咁就可以少D水垢。

因為個珍貴嘅電熱水壺已經由香港抵達英國，所以為咗保護佢免受水垢侵襲，我哋就專登買咗個濾水壺，先將水過濾，然後再將水倒入電熱水壺煲滾同保暖，希望可以令到個電暖水壺襟用D，你知喇，阿婆冇暖水飲好慘慘架嘛。

呢隻牌子嘅濾水壺喺英國好常見，各大超市有售，要配濾芯用，濾芯大約每個月換一次。

遲多幾個月，萬母再分享吓究竟用咗濾水壺係咪真係少左水垢。

💰💰超市行情：💰💰

2.4L濾水壺 £10 (趁特價時買)

遊公園 - 尋鹿記

趁住復活節假期，又趁住英國放寬社交限制，而家准許兩個家庭喺戶外聚會，我哋就到公園尋鹿去。

朝早準備出門時，竟然見到窗外飄雪，莫非呢個就係英國版嘅"清明時節雪紛紛"? 好彩只係飄咗一陣就放晴，可以赴約去。

其實呢次係我哋喺英國第一次真正咁同朋友聚會，嚟到英國就好似"斷六親"咁，能夠與認識嘅人一齊圍吓爐，的確會窩心D嘅。

多得地頭蟲朋友指點，我哋一落車就見到鹿，打到卡，仲睇到隻鹿表演wee&poo，算係完成任務，之後再喺湖畔餵鴨，小妹好開心隻鴨肯從佢手上拎食物。

朋友提醒，最好嘅睇鹿時間係黃昏，趁佢哋飲飽食醉返歸時就最易見到，可惜我哋要預回程時間，唔能夠留太晏。

細路們玩吓，追吓，大人們談天說地，房屋，升學，就業，咩都傾一餐，就係同路人嘅共同話題。

期待疫情受控後，可以再同舊雨新知相聚，話唔定可以喺英國攪番個同學會添。

同學們，你哋快D過嚟喇，呢度可以指住隻動物大大聲咁話"佢係一隻鹿嚟架"！

#指鹿為鹿

約克郡布甸 Yorkshire Puddings

萬母起初見到puddings呢隻字，以為係甜品，但原來呢舊Yorkshire Puddings(約克郡布甸)一D都唔甜，佢係用蛋、麵粉、牛奶或水嘅麵糊做成，有人形容佢似油炸鬼。

香香口咁，係幾好食嘅，傳統係同烤肉一齊食，但萬母下廚當然就fusion一吓，即係亂嚟一吓喇。

萬母將佢配咖哩，仲加埋petits pains一齊食，連揀食嘅小妹都話正。

Yorkshire Puddings同Petits Pains都係掉入焗爐就得，值得喺屋企備存，缺糧時可以隨時食。

萬母第一次煮呢隻咖哩磚時，係白痴地落晒成盒，結果鹹到抽筋，而家已經進步咗，拿捏到份量喇。

💰💰超市行情：💰💰

Yorkshire Puddings £ 1.00/12粒

White Petits Pains £ 0.85/6隻

咖哩磚 £ 3.89/盒 (@韓超)

慳家之選 - Poundland & Savers

英國嘅超級市場，真係好好行，要仔細咁行仲好花時間添，英國有好多唔多牌子嘅超級市場，萬母最常去嘅係Tesco同Sainsbury's，原因係近屋企。

Tesco都有分唔同大細： Extras > Superstores > Metros > Express，萬母初到步時，真係攪唔清extra大D定superstore大D嘅。

ALDI出名平，特別係新鮮蔬果，但萬母感覺佢D貨擺得比較迫，只適合單拖入去，唔適合拖男帶女。

ASDA都好大間，D新鮮食品就普普通通，但家品雜物類好多，如果當初萬母一早搵到ASDA，就可以解決好多買小家品嘅煩惱。

Waitrose比較高檔，價錢同裝修都係。

萬母只係井底之蛙，仲有好多店舖未發掘，等lockdown完再慢慢去行街。不過暫時最愛Poundland同Savers，Poundland顧名思義貨品以pound計，大部份都係£1，家居雜物，食物，諗到諗唔到都有機會喺poundland搵到。但poundland嘅貨品都係比較平實，同日本嘅100円店嘅fancy真係冇得比。

https://www.poundland.co.uk/

Savers店如其名，係幫你慳錢咁解喇，主要賣個人護理產品，同家居清潔用品，萬母會形容佢係藥房價。

https://www.savers.co.uk/

萬母試過好幾次喺超級市場買完野，發現poundland/savers平一截，真係揼心口架，所以以後有咩想買，會先去poundland/savers轉個圈，以免揼到變長平公主。

圖為savers貨品，每支£1-2。

睇屋記 (11)

呢間係一間1390呎嘅3房2廁半獨立屋(semi-detached house)。

地下已做wrap-around extension，所以地下面積好大，開放式廚房連住一個飯廳，飯廳再連住一個客廳。除此之外，地下都仲有一個偏廳，同一個連浴室嘅書房，呢兩間room必要時都可以當睡房用。

萬母其實幾鍾意呢間屋嘅layout，地下嗰層夠大，除左客飯廳，仲有小偏廳，小偏廳可以做書房同玩具房，咁一家人就會多D時間留喺地下，唔會各自各入房閂晒門。

地下個廚房有部份係做extension出嚟嘅，天花嗰度裝咗天窗，好處可以採納天然光，壞處係要抹窗。由於個side extension唔係拉直嚟做，所以個廚房嘅形狀有少少三尖八角，但D角位另闢做洗衣房都可以接受嘅。

一樓有兩大一細房，再加一浴室，各房都算寬敞，細房都夠放雙人床，成間屋嘅layout係感覺寬敞。

間屋得兩層，如果想向上發展，可以做loft conversion，但就算唔做都夠住有餘。

花園面積唔算大，因為間屋擴建咗，令到花園細咗，但都夠位放summerhouse，但因為做咗wrap-around extension，花園嘅後門就冇咗喇。

呢間屋有咩缺點呢？就係離地鐵站遠，步程超過20分鐘，而且佢喺掘頭路入面，馬路直達唔到屋門口，所以冇driveway，有車嘅話就要泊街。

家當到埗喇

我哋嘅家當12月初喺香港由搬運公司收貨，12月底上船，本來預計1月底到，但後尾延期至2月初，再延至3月初，最後3月底真係到步喇。

43箱家當(運費連保險共HK$29K)，由1個搬運哥哥搬上樓，去到屋企門口由萬能生接手搬入屋，足足搬咗2個鐘。

起初我哋以為搬上兩層要收附加費，但搬運哥哥話唔駛，見佢搬得真係好可憐，問佢飲唔飲野又話唔駛，唔通驚萬母落迷藥？！

當D家當入屋時，萬母就開住先前執家當時整落嘅excel檔，萬母真係要分享吓我哋mark箱同excel檔嘅小心得，我哋每隻箱都自編號碼，細箱係S1，S2，.....中箱係M1，M2，..... 大箱係L1，L2，..... 每隻箱嘅4邊都搵marker寫咗呢個號碼，方便咩方向都睇到。

而excel檔就寫住S1係小妹圖書，M1係小妹玩具，L1係飯煲，諸如此類，唔係好詳細，但又會令自己記起呢箱大約係咩。

當D箱入屋時，萬母就睇住個excel，入一箱剔一箱，又可以話俾萬能生知，箱入面有咩，駛唔駛好快開箱，定會放埋一邊先，咁樣去安排放屋入面咩位置。

當一路剔時，我哋就發現有一箱冇編號，再睇清楚連箱上個名都係錯嘅，咁我哋就即時退番俾搬運哥哥，起初我哋以為因為調轉咗，我哋會少咗箱野，後來再double check就confirm齊晒，所有家當平安到埗喇。

但其實家當到埗冇預期咁興奮，可能已經習慣咗家徒四壁嘅生活，見到屋企一箱二箱，反而會有D頭痕，而且，諗番轉頭，真係執咗好多無謂野，D箱有一半短期內都唔會開封，只係得個擺字，可能要擺到天荒地老。

圖中只係冰山一角，最先解封嘅竟然係圖書，今回真係執書行頭喇。

記開學第4週

點解咁快又記一週？之唔係放假囉！

返咗3個半禮拜學，嚟緊又放2個半禮拜嘅term break，點解返學嘅時間過得特別快？！

每日放學，萬母都會查探吓小妹返學點，通常都係問佢午餐食咗咩，小息玩咗咩，跟住再等佢哋自己表達吓，雖然萬母好想知道佢哋返學學咗咩，但都忍住，唔問出口。

好彩有時小妹心情好，都會講吓俾萬母知學咗咩。

家姐話佢哋要寫信俾MP(Members of Parliament)，向MP建議點樣改善社區，喺寫信之前，老師同佢哋討論過寫咩內容，佢哋有共識，而家姐仲話封信真係會寄出俾MP。

妹妹就輪盡D，佢話唔係好知老師教緊咩，只係好多英文，而且要寫撩草，佢睇唔明亦唔識寫，所以成日要問隔離位同學，同埋睇唔明數學嘅文字題。

萬母聽到其實都有少少擔心嘅，因為妹妹係年頭B，由香港到英國時"跳咗班"，所以中間嘅涵接差DD，起初萬母只留意到同學仔喺Year 2已學咗少少乘數，所以就教妹妹背定乘數表，點知原來同學仔都已學寫撩草，而妹妹係從未接觸過，所以萬母都要教番佢，同埋同佢補補D英文數，教佢睇題目。

起初萬母打算自己出題目俾小妹做，點知發現poundland有好野，一本三十幾頁嘅彩色印刷練習只係£1，花£1就可以慳番好多腦汁同心機，呢£1真係無理由唔花。

下面係幾個撩草工作紙嘅網站，可以免費下載。如果過嚟英國讀Year 3或以上而未學寫撩草嘅，最好學定先喇。

https://kidzone.ws/cursive/#Worksheets

https://www.k5learning.com/cursive-writing-worksheets

https://www.worksheetworks.com/english/writing/handwriting/cursive-practice.html

開始放復活節假喇，小妹有樣假期功課，就係整個Anglo-Saxon shield，well，萬母都唔知係咩東東，唯有一齊上網學喇。