家當到埗喇

我哋嘅家當12月初喺香港由搬運公司收貨，12月底上船，本來預計1月底到，但後尾延期至2月初，再延至3月初，最後3月底真係到步喇。

43箱家當(運費連保險共HK$29K)，由1個搬運哥哥搬上樓，去到屋企門口由萬能生接手搬入屋，足足搬咗2個鐘。

起初我哋以為搬上兩層要收附加費，但搬運哥哥話唔駛，見佢搬得真係好可憐，問佢飲唔飲野又話唔駛，唔通驚萬母落迷藥？！

當D家當入屋時，萬母就開住先前執家當時整落嘅excel檔，萬母真係要分享吓我哋mark箱同excel檔嘅小心得，我哋每隻箱都自編號碼，細箱係S1，S2，.....中箱係M1，M2，..... 大箱係L1，L2，..... 每隻箱嘅4邊都搵marker寫咗呢個號碼，方便咩方向都睇到。

而excel檔就寫住S1係小妹圖書，M1係小妹玩具，L1係飯煲，諸如此類，唔係好詳細，但又會令自己記起呢箱大約係咩。

當D箱入屋時，萬母就睇住個excel，入一箱剔一箱，又可以話俾萬能生知，箱入面有咩，駛唔駛好快開箱，定會放埋一邊先，咁樣去安排放屋入面咩位置。

當一路剔時，我哋就發現有一箱冇編號，再睇清楚連箱上個名都係錯嘅，咁我哋就即時退番俾搬運哥哥，起初我哋以為因為調轉咗，我哋會少咗箱野，後來再double check就confirm齊晒，所有家當平安到埗喇。

但其實家當到埗冇預期咁興奮，可能已經習慣咗家徒四壁嘅生活，見到屋企一箱二箱，反而會有D頭痕，而且，諗番轉頭，真係執咗好多無謂野，D箱有一半短期內都唔會開封，只係得個擺字，可能要擺到天荒地老。

圖中只係冰山一角，最先解封嘅竟然係圖書，今回真係執書行頭喇。