遊公園 - 賞櫻花，餵松鼠

英國嘅公園真係可以用風景如畫嚟形容，大草地有大草地嘅青翠，天鵝湖有天鵝湖嘅優美，仲要有好多會郁嘅動物。D動物完全唔怕人，可能係俾人餵慣，D鴿係咁圍住人轉，嚇到萬母好驚驚，小妹們卻好開心，話下次要帶提子去餵鵝咁話喎。

唔覺意路過賞左櫻，松鼠為食到唔驚人。

廢話少講，去相。

#這是天父世界

#天佑義人

#萬母英遷

#英遷生活點滴

睇屋記 (4)

呢間又係新裝修嘅盤，3房4廁，面積1152呎嘅semi-detached house，已做晒extension，全新裝修。

地下有廚房同客廳，再加客廁。一樓係兩房兩廁(其中一間係套房)，二樓全層係套房(連埋浴室)，呢間屋嘅水缸收左喺二樓嘅儲物室。呢間屋同先前嗰間豪裝builder屋都一樣有天窗，但就因為日久失修，生晒青苔。(見圖2)

呢間屋嘅格局同大細非常啱我哋心水，每層都有廁所，而且價錢非常實惠，平過晒先前睇過嗰D。

但一到現場就明白點解咁正咁平都賣唔出，首先佢係喺一個大迴旋處旁邊，雖然隔離仲有一間建築物擋一擋，但條馬路交通都好繁忙吓，有細路仔真係要諗清楚，一出門口就係大馬路，其實都好危險吓。

間屋有driveway嘅，但driveway前有棵大樹，要泊車先要同大樹玩個氹氹轉先，真係有driveway都冇咩作為。

呢間屋仲有個死穴，係隔離間建築物其實係個類似波樓嘅娛樂場所，可以想像如果唔係lockdown嘅話，人流都會幾雜吓，而且個主人房嘅窗仲要對正人哋嘅出入口，拎黎監視就啱晒，但拎黎住就麻麻喇。或者喜愛熱鬧嘅人會好鍾意呢度。

間屋嘅花園都算幾細，不過佢就有後門(見圖1中間)，呢樣未必間間屋有，特別係排屋，花園後門有咩用呢？就係萬一花園要做工程，所有物資都可以經後門出入，唔需要經過室內地方，唔駛攪到室內污糟晒。

就係咁，我哋又學左野喇，真係要實地考察先得，始終自住嘅地方要求要高D。不過我哋亦開始明白自己對floor plan嘅要求係點。

睇屋記 (3)

呢間屋係為左學嘢而去睇嘅，呢間係1117呎嘅semi-detached house，4房2廁，已做extension。

地下有一個開放式廚房連客飯廳，另外有一間睡房同浴室，一樓有兩間睡房同一間浴室，二樓係由閣樓改建而成嘅睡房。

呢間屋我哋主要係去睇佢個閣樓睡房，呢間閣樓睡房係冇門嘅，一上樓梯已經係間房嘅中心，好開放咁，而且上二樓嘅樓梯好直好斜，唔好話剛剛瞓醒好易叉錯腳，就算清醒地行都覺得一步一驚心，再者二樓又冇廁所，所以呢間閣仔房頂多可以當書房用，睡房真係唔多合適，但現手業主放咗好多張床喺度。

呢間屋係冇driveway嘅，即係門口冇泊車位，本來某D屋都仲可以向council申請將門前花園改做driveway，但呢間直情係冇門前嘅空間，所以有車嘅話只能泊街，呢個又係另一concern。

我哋去睇呢間屋其實係想預計一吓如果要自己整loft conversion有咩要留意，朋友提醒過要留意吓個樓梯點攪，睇完呢間屋發現原來閣仔房未必可以整到想像中咁理想，仲有個樓梯位都要計過數先得，失敗左就會好似呢間屋咁，見過某D floorplan係要犧牲一樓一間房先開到個樓梯上二樓，如果係咁嘅話，錢就用左，但其實實用面積唔係多左好多，唔多化算，所以最後我哋都唔敢自己攪loft conversion，怕花錢買難受同失望。

圖為閣仔房同樓梯，因為廢事公開人哋屋企嘅傢俬，所以做左特別效果。

#萬母英遷

#尋找安樂窩

收貨奇遇記

濕平能令人愉悦，雖然online濕平冇親身濕平咁有快感，仲總好過冇嘅。

英國呢邊都幾興online shopping，特別係lockdown左，更加多上網買野，買完野一係就送貨，一係就click and collect。

先前買傢俬已經遇到好多唔準時或怪事，買其他貨品都一樣怪事重重。

最正常嘅送貨照道理係送到門口，敲門，收貨，咁樣好正常吖。

我哋亦試過對講機響完，開定門等貨到，點知一路都唔出現，最後發現件貨被安置喺地下大堂。

又試過一打開門，有件貨喺門口唔知擺左幾耐。

最奇異嘅一次，係我哋出完街返屋企，經過一樓，見到有件貨放左喺一樓樓梯嘅欄杆上，起初以為係一樓鄰居嘅貨，好彩萬能生眼利，發現係我哋嘅，點解唔係喺地下，又唔喺二樓，放喺一樓欄杆架呢？真係諗極都諗唔明。

今個星期瘋狂濕左好多野，小妹們心急地等緊佢哋嘅貨到，萬母就要mark住究竟買左D咩，收左D咩，因為有時買得太多會唔記得自己買過咩。

圖為屋外嘅樓梯，每次出門小妹都會快步落樓，然後喺樓下望番上嚟，咁都可以玩一餐，就係細路喇。

Boiler打柴了 - 下集

上回講到我哋個boiler(熱水爐)打柴了，冇熱水沖涼，冇暖氣，等到Day 5都未有人嚟整。

agent同外判engineer公司推都唔多郁，應承左會嚟整，最後又話配唔到零件唔嚟，但又畀唔到任何action plan我哋。

我哋實在太嬲，上網search睇吓有冇咩法例保障租客，結果搵到：

Under the Landlord and Tenant Act (1985) 業主有責任維修the dwelling for the supply of water, gas, electricity and for sanitation (including basins, sinks, baths and sanitary conveniences), space heating and heating water

冬天無暖氣或熱水算係emergency repairs, emergency repairs應該要喺24小時內進行維修。

https://www.thetenantsvoice.co.uk/advice_from_us/heating-and-hot-water/

https://hamiltonfraser.co.uk/knowledge/landlords-legal-boiler-heating-responsibilities/

https://www.anthonygold.co.uk/latest/blog/how-long-does-a-landlord-have-to-repair-your-home/

咁Day 1個engineer拎左兩隻暖風機上嚟，可能已經當support左，已經唔係emergency，但熱水問題一直冇解決到，個senior manager所提議嘅自己煲水沖涼，根本就係廢噏。

由於Day 5被甩底，又冇收到正式通知，Day 6(星期五)我哋再聯絡agent，直接同senior manager個上司聯絡，因為如果星期五都唔攪掂，星期六日只能自生自滅，更加唔會有人嚟維修，斡旋咗一整日，得出結論係： 業主唔肯換新boiler，話因為太貴，所以堅持等已停產嘅零件。

我哋既無奈又憤怒，emergency repairs應該要喺24小時內攪掂架嘛，但阿上司話冇零件所以攪唔掂，無辦法，但真係完全唔知要等到幾時，最後我哋要求提供alternate accommodation，又傾左一輪之後，上司話業主會出錢租3晚酒店，叫我哋book左酒店再俾張單佢，費用上限係6日租金，星期一(Day 9)應該會有人嚟整。

過左一個每日執野去浴堂(酒店)沖涼嘅weekend，等到星期一(Day 9)晏晝深先有消息話會late afternoon/early evening嚟整，再等到7:30p.m.話會9:00p.m.嚟整，其實我哋都打定輸數，預左又要再斡旋，結果9:45p.m.，阿enginner終於帶埋零件上嚟，佢話呢件零件係搵專人訂造，唔知work唔work，唔work就唯有排隊換新boiler，要排2星期咁話，攪左45分鐘，好彩最後成功咗，等左9日，終於整番好個boiler喇，有暖氣，有熱水沖涼，有正常生活過喇。

事後諗/感：

萬母諗，如果事情發生喺香港，第一時間就返左娘家沖涼，甚至返去借宿幾宵，但嚟到英國，無左娘家支援，好彩仍有朋友。所以結論係，盡可能住近朋友，仲係容許你去打攪佢嘅朋友，否則真係會覺得孤立無援而沮喪嘅。

雖然遇著麻煩，但萬母都感恩嘅，第一樣當然感恩有朋友喺附近，借出暖爐同浴室，再感恩過左一日雪櫃生活後，之後幾日氣溫回暖，上番10度附近，仲有就係小妹買左盒鈎織怪獸，萬母喺boiler壞左嗰幾日都忙住鈎怪獸，唔得閒為個boiler而心煩。所以，上天安排隻怪獸嚟係有佢嘅美意。

同期聽到有幾單壞boiler嘅消息，都係1-2日好快攪掂，係我哋攪咁多日，都唔知係業主問題，agent問題，定engineer公司問題喇。

如果下次聽到/睇到/feel到個boiler有異樣，一定要早D report/處理，我哋聽到個boiler we we咁叫左2日，但因為唔知咩事，無處理，結果就大件事。

如果買屋，地下要有shower room，方便朋友嚟沖涼。

無論係邊個國家/地區嘅agent，都唔可以盡信嘅，leave it to me只係一句笑話。

#圖為engineer放低嘅兩隻暖風機

Boiler打柴了 - 上集

Boiler可以理解成熱水爐，我哋屋嘅boiler打柴了，咁有咩影響呢？

第一，全屋冇熱水用，冇熱水沖涼，冇熱水洗手。

第二，全屋冇暖氣，因為熱水爐壞左，冇熱水走全屋，所以冇暖氣。

其實係非常大件事！

事情發生喺星期六半夜(Day 1)，萬能生已經即刻打去agent熱線救助，得出嘅回應係"聽日搵人覆你"。

雖然萬母仲未知情，但瞓到半夜已經feel到唔對路，平時間房好暖，嗰晚就出奇地凍，好彩張被夠暖，將D手手腳腳收晒入被係足夠嘅。

第二朝星期日(Day 1)朝早再打電話救助，攪左一輪終於搵到個engineer喇，經過whatsapp問症，阿engineer話應該係底板壞左，再等星期一朝早先睇吓訂唔訂到零件。

仲要等多日？！呢日嘅氣溫只係得-1至3度，喺屋入面冇暖氣，雖然已經著晒外套，著埋兩條褲，但都越坐越凍，感覺好似喺雪櫃坐緊一樣。

雖然遇著麻煩事，但感恩仍有朋友喺附近，朋友聽到我哋嘅情況，即刻借出暖爐一個，以解燃眉之急，起碼唔好凍僵先。

星期日全日，萬能生都嘗試去拯救個boiler，又reset，又repressurise，但最終都係唔成功，到黃昏時再向engineer救助，佢可能係覺得我哋太煩，或者驚我哋會凍C，所以專登上門睇左個爐，仲帶左兩個暖風機上嚟。

咁有3個暖爐，間屋的確唔再似雪櫃嘅，咁唯有等星期一再聯絡agent。

到咗星期一(Day 2)，再來來回回電話聯絡agent同外判engineer公司，外判engineer公司第一個回應係要等到Day 11先有得整，丁頁，唔係馬，10日都冇熱水冇暖氣？可能係我哋反應太大，之後又話等到即Day 5搵人嚟整，佢不停解釋嗰日阿enginee本身已經好多jobs喇，下刪幾百字，但我哋都表示我哋屋企有細路，冇可能咁多日冇熱水用。

當我哋再同agent嘅senior manager講時，佢話阿engineer已經放低左兩隻暖風機，暖氣嗰度算support咗架喇，至於熱水呢，無辦法喇，叫我哋考慮煲水沖涼，講笑咋嘛，重回坐月時代，仲要全家一齊坐月？呢個manager答應咗再同外判公司傾吓，睇吓有冇得早D整爐，仲叫我哋放心，leave it to him, 仲答應即日會覆我哋，結果佢係完全冇回音，之後幾日仲失聯埋添！

我哋本身唔想再打攪朋友，但最後忍到Day 3，變晒爉鴨之下就去左朋友屋企借浴室沖涼。

我哋一直好耐心咁等待，等到Day 5晏晝都仍然冇消息，唯有再聯絡agent同外判engineer公司喇，外判engineer公司嘅人只係重覆一句"我哋安排左senior engineer嚟整，佢嚟之前會打電話俾你"，之後講講吓仲cut我哋線，agent嗰邊搵唔番個manager，但接電話嗰個都算helpful，最後得出個結果係配唔到零件，所以未有得整住，咁當然我哋再追問點解泱喇，我哋由Day 2已提議可唔可以換新boiler，個manager就推說話換boiler仲耐過換零件，但等到Day 5都未有任何進展，實在令人好氣餒同氣憤。

故事實在太長，欲知後事如何，請看下回分解。

註： 喺出post呢刻，問題已經解決咗，所以唔駛擔心我哋嘅安全，但如果你隔住個mon都聞到酸宿味就忍一忍喇，我哋今日會沖涼架喇。

#圖文不符

祂未曾應允天常蔚藍，

也未曾應許花兒常開，

祂卻恩許祂的慈愛常在。

準備車牌筆試

英國官網其實都好詳細講解點準備筆試嘅，有3本書要讀，分別係：

1. The Highway Code

https://www.gov.uk/guidance/the-highway-code

2. Know your traffic signs

https://assets.publishing.service.gov.uk/government/uploads/system/uploads/attachment_data/file/519129/know-your-traffic-signs.pdf

3. Driving-the essential skills

https://www.safedrivingforlife.info/shop/product/official-dvsa-guide-driving-essential-skills-book-book-0

萬母用左個幾月時間睇左The Highway Code(道路使用者守則)，感覺同香港嘅差唔多，亦慶幸早幾個月喺香港睇左中文版，因為唔知點解，中文版隻隻字都識，但成句就睇唔明講咩，要反反覆覆睇幾次先明，到英文版仲大穫，直情要一路睇一路查字典，所以萬母係慶幸自己曾經睇過中文版，起碼明左D概念，再去理解英文版嘅，咁呢，呢個好可能係萬母嘅理解能力出問題，其他人可能冇事嘅，唔駛俾萬母嚇親。

Know your traffic signs就主要講路牌，只要唔太懶，一星期內可以睇得完。至於Driving-the essential skills，暫未搵到online版，考慮緊買hard-copy定直接溫mock test算。

筆試分兩部份，第一部份有50題選擇題，其中3條問題係要睇片作答嘅，D片可以喺限時內重覆睇嘅，限時57分鐘，要答啱43題先算pass。

第二部份叫做hazard perception test，要睇14條片，D片係關於日常嘅路面情況，每條片都有一個developing hazard(潛在危機)，其中一條片有2個，要得分就要盡快指出個潛在危機，每個潛在危機最高可得5分，想攞高分就要反應夠快，見到潛在危機就即click，click錯係唔會扣分嘅，但如果不停喪click係會冇分嘅。每條片只得一次機會，冇得翻睇。呢部份總分75分，拎到44分就pass喇。

pass左筆試係會個pass certificate number，拎住呢個number可以去報路試，之但係，筆試合格紀錄有限期2年，如果pass筆試2年內考唔到路試嘅話，就要重考筆試，所以呢，萬母打算學車學到有信心pass路試時先去報名考筆試，廢事辛辛苦苦pass筆試然後就過期冇用咁喇。

咁如果肥左筆試，佢會話你知邊part衰左嘅，最快3個工作天後可以重考。考筆試盛惠£23。

其實官網有mock test可以練嘅，但如果想一take過，當然要練習多D，希望遲吓可以搵到多D mock tests資料。

https://www.gov.uk/take-practice-theory-test

睇The Highway Code睇到好悶，但有一剎成個人笑醒左，嗰段係叫D司機當經過停定嘅車時要小心駕駛同慢駛，特別係雪糕車，因為細路關心雪糕多過交通情況，佢真真實實係咁寫，萬母睇到忍唔住gee一聲笑左出嚟，叫做睇到悶悶地有D笑話咁喇。

😂冇獎問答遊戲：

萬母有8成機會pass筆試，2成機會pass路試，問最後拎到車牌嘅機會率係幾多？🤔

學神出沒，注意！

喺香港，萬母從來都冇諗過要學揸車，因為巴士地鐵夠發達，再唔係伸伸手就有的士停低，做咩咁辛苦，咁花精神自己揸車呢？

但當計劃離開香港時，萬母不得不考慮要去學揸車，喺香港報左名，好努力咁讀道路使用者守則同做mock paper，俾萬母一take過過到筆試(其實筆試應該冇咩人唔係一take過嘅)，但未開始學車同考車，萬能家就已經飛左喇。

拎住香港個學神牌，喺英國係無用嘅，必須要再考筆試，同埋要申請張provisional driving license(學神牌)，申請英國學神牌比用香港牌換英國車牌簡單好多，除左去郵局拎D1 form填之外，上網填表都得，上網嘅申請費仲要平D添，online申請只要£34，paper-based要£43，所以萬母極力建議上網申請學神牌，一來唔駛去兩次郵局，兩來唔駛支票，三來申請費又平D。

呢個車牌可以當有相嘅身份證明文件用，所以就算冇咁快打算學車，都可以考慮拎左先算。

去下面網站就可以申請學神牌。

https://www.gov.uk/apply-first-provisional-driving-licence

咁上網填表都係填下D個人資料，再問吓健康情況，只要如實作答就可以，填完表就等佢寄留張已預填嘅D1 form上門核實地址，BNO holder真係好方便，唔駛寄本passport出去，仲有唔駛搵人核實身份/副簽張相，只要授權佢查資料就得，D1 form上面只要再填一次passport number, 簽名，貼相，用佢提供嘅回郵信封寄番返去就得。先前都有提過，有幾種郵寄方式嘅。

最平嘅係2nd class, 郵費£0.66, 2-3個工作天到

其次係1st class, 郵費£0.85，第二日到

1st class同2nd class都可以加錢做signed掛號(2nd class £2.06, 1st class £2.25)

想穩陣可以揀Guaranteed next day UK deliver, 有簽收，但郵費就要£6

等大約3個星期左右，學神牌就會寄到府上。

萬母第一次收到張學神牌時，發現個出生地點寫錯左某國，唔知係手殘喺網上click錯，定職員攪錯，但呢個錯萬母接受唔到(如果佢寫火星，可能萬母都仲接受得到)，咁萬母唯有寄番張車牌返去連埋封cover letter講番出左咩問題，請求更改，結果再等多3星期，更正左嘅學神牌再次來臨喇。

拎住個學神牌就可以去學車喇，喺英國，除左可以跟師傅學揸車之外，仲可以喺經驗司機(21歲以上及持有3年或以上相關車牌)傍住嘅情況下，就可以去練車。

當萬母將呢個情況講解左俾小妹們聽之後，小妹們係好驚恐嘅，佢地已經聯想到萬母正拎住學神牌，屋企有車牌嘅經驗司機只得萬能生一人，如果我哋兩個去左練車，佢哋就必須要坐喺後座，兩小妹都不約而同咁話，太危險喇~~~

其實萬母都覺得好危險，對於控制機器真係無咩信心，我驚一路揸一路嗌，或者緊張到完全唔識反應。

Any肥，拎左個學神牌，買埋個紅L(學神要喺車頭車尾貼一大個紅L，表明身份嘅，而呢D紅L，網上好多有得賣，£2左右已有交易)，下一步可以做嘅係讀書準備筆試同搵師傅學車，兩樣可以同時進行嘅。

學神牌有效期10年，如果10年內都考唔到車嘅話，就證明上天覺得保障其他道路使用者安全比萬母有車牌更為重要，咁萬母都應該要接受現實嘅，況且，10年後小妹們都夠稱自己考牌(17歲就可以拎學神牌)，咁就算萬母無車牌都唔緊要喇，係咪？(唔係都唔得喇)

下次分享點樣準備筆試，歡迎同路人一齊研究討論。

慣唔慣呀？

 英遷咗兩個月，究竟習慣未呢？

又慣又唔慣咁喇。

起初一入屋好唔慣間屋暗暗咁，結果我哋自己買過晒D燈膽換晒佢(業主嘅舊燈膽就收入櫃，等退租時畀番佢)，仲買左幾盞座地燈同檯燈，咁樣間屋嘅光度先覺得舒服D。

之前好唔慣度大門有塊大玻璃，透晒光，本來想搵布/紙皮封左佢，但後尾發現原來鄰居就係班主任，就作罷了，廢事佢覺得我哋想避開佢咁喇，而家慢慢都慣左塊透光玻璃。

個大門有個入信位(見圖)，有D似以前公屋嘅門咁樣，不過就有個不鏽鋼奄喺出面，郵差上門派信時都會整到個奄好嘈好大聲，第一次，萬母係嚇左一大跳，以為有人爆門入屋，之後已經開始習慣，知道呢D聲即係有信。

嚟左兩個月，lockdown足2個月，已經習慣左lockdown嘅生活，日日都宅喺屋企，一星期一次出去入貨。每日唔係煮就係洗，開始有D撚手小菜，因為煮嚟煮去都係嗰幾味。不過等lockdown完之後，應該要再適應另一種生活模式。

天氣同日照時間都越嚟越慣，以前喺香港一聽到10度，會嚇到傻左，將D衫褲著晒上身，而家10度出街會話今日暖左好多喎。初初到步時，下午4點已開始天黑，一天黑就覺得夜喇，要瞓喇，但其實6點都未夠，而家日照時間長左，亦都慣左天黑唔等於夠鐘瞓覺。

最唔慣就係同香港嘅時差，個時差問題唔係影響瞓覺，係影響通訊，我哋喺英國起身時，已經係香港嘅下午接近黃昏，當英國呢邊準備天黑時，香港已經夜深喇。變左每日只係大約8個鐘時間可以直接同香港嘅親友對話，其他時間只能留低message等覆，咁當D message唔係即時回應時，交流嘅次數就會相對地少左。

好多時，喺英國天黑後會覺得有D空虛，有D寂寞同有D凍咁喇。因為想搵人傾計都冇人覆，始終到左步嘅朋友唔多。

所以，萬母想講咩呢？朋友們，快D過嚟陪我傾計喇。

禾等著你過來，禾等著你過來。

廁紙女王揀廁紙

萬母因為有個壞左嘅鼻，所以同廁紙形影不離，就算床頭都放左卷廁紙喺度，準備隨時邊瞓邊擤。由於同廁紙關係密切，萬母對廁紙都有D要求嘅，舊年香港曾經發生廁紙荒，當時全城缺紙，萬母被迫用一隻MIC牌子嘅廁紙，望落去白雪雪靚靚咁，點知一擺埋鼻就出事，成陣化學味，個鼻越擤越壞。後來萬母喺香港係用越南製嘅北極熊牌，非常好用，又實淨又足料，為起上黎都只係HK$3.5/卷。

雖然萬母已經塞左兩卷廁紙入喼，但黎到英國第一次去超級市場，必買嘅都係廁紙，當時望住一架廁紙，萬母揀左熟悉嘅狗仔牌，諗住雖然貴，但起碼會穩陣，狗仔牌的確好穩陣，好實淨，唔會攪到一面或一屁股都係紙碎，但就比較貴，有特價時都要£0.5/卷。咁作為精明嘅師奶，當然又要睇吓有冇其他更抵用架喇，我地試過Tesco嘅Luxury Soft(white)，雖然佢話自己係Luxury，但其實係薄切切，對於萬能家絕對唔可取。

好彩係超級市場廁紙嘅包裝分幾類，4卷裝，9卷裝，12卷裝，16卷裝，或者唔係成日見到嘅24卷裝。要試廁所可以先買4卷裝，試啱先上貨。試完Tesco嘅Luxury Soft(white)唔OK，我地就試貴少少嘅Tesco Luxury Soft Toilet(Quilted)，呢隻唔錯，冇狗仔咁厚，但又唔會甩紙碎，每卷平均£0.39。

英國嘅廁紙係冇獨立包裝嘅，即係開左個膠袋，就會見到幾卷光脫脫嘅廁紙，咁樣其實比較環保，但如果用量較少嘅家庭就要好好保存，避免受潮。

平時買野會覺得越大包裝，應該會越抵，但原來未必架喎，有時細包裝特價會更抵，不過英國超市有樣野萬母係好欣賞嘅，就係佢嘅價錢牌除左標明價錢，仲會寫住unit price，即係廁紙會寫住每100張為起上黎即係幾錢，洗潔精每100ml即係幾錢，咁樣就方便格價，唔駛自己搵計數機計數喇。Tesco嘅會員證有時都幾抵，時不時有D貨會有會員價，如果啱用，見到會員價就可以上貨喇。

💰💰超市行情：💰💰

Tesco Luxury Soft Toilet Tissue 9 Roll White  £ 3.00

Tesco Luxury Soft Toilet Tissue 9 Roll Quilted £ 3.50

Andrex Toilet Tissue 9 Roll Quilts £5.50 (Clubcard價£4.50)

唧唧復唧唧，萬母當戶織。

 唧唧復唧唧，萬母當戶織。

不聞機杼聲，惟聞母嘆息。

經過四日三夜嘅努力，犧牲咗兩隻手指，怪獸終於誕生了！

上回講到小妹喺超級市場買咗盒鈎針手工藝，萬母打算俾小妹消磨half-term break，點知人算不如天算，盒野變左消磨萬母嘅half-term break，本來仲打算趁呢個星期溫吓書，煲吓劇，自娛一吓。

終於用左四日三夜，整斷左一支釣針，起左兩個繭，呢隻高20cm嘅怪獸出生了。

萬母真係好佩服我自己，從未鈎過野，竟然鈎得出一隻怪獸，不過都要多得youtube，冇youtube教學應該攪唔掂。

萬母同小妹講，呢隻係傳家之寶，要代代相傳，阿女俾阿孫，阿孫俾阿塞，結果換來小妹一個白眼。

幸好呢隻係怪獸，就算兩面唔對稱，手腳又大又細，塊面生晒豆皮同粒粒，佢都仍然係一隻怪獸，如果呢隻係一個公主，就大穫鳥，佢只可以係一個受輻射感染嘅公主。

其實萬母花左大半個half-term break去鈎怪獸係天父嘅美意，至於點解咁講，遲吓再解釋。萬母要去享受埋所剩無幾嘅half-term break喇。

拯救萬母嘅youtube連結，呢位老師講得好清晰。

https://www.youtube.com/watch?v=X_S1EvWMZzY

https://www.youtube.com/watch?v=ujs5bMN2IyE

睇屋記 (2)

由於唔想花太多心力去攪擴建同裝修，所以我哋主力搵一D唔駛大執嘅盤去睇。

呢間1755呎4房4廁嘅semi-detached house(半獨立屋，即係一個建築物分成左右兩間屋)係新裝修盤，全屋已做盡extension，地下rear extension擴建左，二樓loft conversion都做埋。全屋新豪裝，非常吸引。

地下全層已裝地熱，開放式廚房連飯廳，個煮食爐放正廚房中間個大island(圖2)，前面夠晒位放食材，仲有位放camera拍住煮食情況，絕對可以拎嚟拍煮食節目，可惜萬母係地獄煮神，唔會有人想睇萬母煮野食，廚房仲連住個洗衣房，system boiler同水缸都安置好喺入面，地下除左飯廳，仲有一個大客廳同客廁。

一樓有兩間房，但竟然有三個浴室，一樓嘅套房都好大，其中一間仲望住小學個操場，如果小妹們返左學，萬母係可以喺窗口望住佢哋。圖1就係我哋睇緊操場嘅同學放小息。

二樓都有兩間房，一大一細，細房竟然有埋天窗，所以形容呢間屋係豪裝絕對唔過份。

呢間屋做晒extension，又新裝修，仲要咁近學校，啱晒我哋要求，但間屋其實都有缺點，就係佢係ex-council house，council house可以理解成香港嘅公屋，咁呢間靚屋原本係間公屋，不過後尾賣斷左，現手業主(估計係builders)一年前低價買入，豪裝後就高價賣出。

如果計番呎價，其實間屋算超值嘅，不過本身呢個地段係council house，所以估唔足價，只係佢裝修得好靚所以個價賣得高左，但係將來如果要再賣出去，未必可以到番呢個價，而家呢刻俾呢舊錢其實係買屋+買裝修，但裝修唔保值架呢。

而且間屋嘅二樓有兩間房，但冇廁所，即係唔多適合拎嚟做睡房，因為如果瞓到濛濛鬆鬆仲要行樓梯去廁所，其實都幾危險嘅，咁間屋咁嘅格局就限制左D房嘅用途。

間屋門口對住一個大草地，本身綠油油好靚，但可惜係一個烏鴉樂園，成地超過40隻烏鴉，雖然烏鴉唔係咩大騷擾，鴉不犯我，我不犯鴉，但萬母望住咁密集嘅動物都會毛管戙，到最後我哋都係同靚屋無緣。

下面網站輸入postcode可以做到網上估價。

https://www.zoopla.co.uk/home-values/

下面個網站可以check到好多資料，包括該區嘅人口調查結果，以往嘅買賣紀錄，犯罪紀錄等。

https://www.streetcheck.co.uk/

睇屋記 (1)

我哋第一間睇嘅係面積1134平方呎3房2廁嘅排屋(Terraced House)，排屋顧名思義係一排嘅屋，即係間屋左右兩邊都貼住隔離屋嘅，一排過，長長嘅。

呢間屋總共有3間睡房，全部喺一樓，地下喺廚房，飯廳同客廳，全屋總共有2個浴室，分別喺地下同一樓。

間屋用combi boiler，即係即煲即熱，唔駛要水缸儲水，但我哋喺一樓嘅浴屋發現安裝左electric shower，懷疑係因為combi boiler唔夠力供水去兩間浴屋，所以要加個electric shower去增加水壓先沖到涼。

間屋已做rear extension，即係已經向花園伸展左出去，整左個飯廳嚟用，廚房同飯廳係新裝修，裝埋地熱，係間屋嘅賣點之一。

permitted development即係唔駛申請就可以做嘅工程，rear extension係其中一種，屋仔可以向後園伸展最多3米(獨立屋就4米)，但不能超過戶外空間嘅一半，建築材料要同原本間屋類同，高度限制係4米(如果係花園邊界2米內嘅範圍，高度限制係3米)，extension除左可以拎黎擴建個廚房，仲有好多人會整conservatory room(玻璃屋)，萬能生話好鍾意conservatory room呢，但萬母只問一句，點抹呀？亦有人簡單D喺花園加個shed(類似儲物室嘅屋仔)，甚至summerhouse，呢D喺花園加嘅建築物可以當儲物室用，或者home office，playroom，只要個花園夠大，係可以有無限嘅可能。

呢間屋已經做左rear extension，所以地下嗰層嘅面積已經用盡，但間屋嘅loft(閣樓)都仲可以做extension，如果做loft conversion就有機會可以喺3樓整多間套房出嚟，咁間屋就可以變成4房。

呢間屋嘅地理位置非常合我哋心意，佢離小學只係2分鐘步程，亦喺心儀中學嘅catchment area入面。價錢亦喺我哋預算之內。

但呢間屋都有缺點，就係佢個梯田式花園，萬母睇住呢個花園都有D憂慮，小妹們玩玩吓好易叉錯腳，實在有危機，要整平個花園唔係唔得嘅，花錢咪得囉~

再者，雖然間屋可以再向上extend，但我哋係新手，例又唔熟，恐怕連被人呃都未必知，而且預計價用要£60000，所以最後我哋都係冇下一步行動嘅。

但睇完一間之後，我哋對自己嘅要求清晰咗，知道想搵咩類型嘅盤。

圖為梯田式花園。

放half-term break喇 ，今次捉蟲喇

呢個星期，香港學生放緊年假，英國呢邊雖然冇年假，但咁啱都放緊half-term break。

本身細路放假，作為FTM應該都覺得苦惱，但係而家在家學習，變相係萬母補習社，細路放假，萬母都有得放假，唔駛跟功課！

香港嘅學校假期，主要係7-8月嘅暑假，12月嘅聖誕節，1/2月嘅農曆年假，3/4月嘅復活節假。

英國呢邊除左農曆年假，其他假期都差唔多。一年分開3個學期(term)，每個term中間有個一星期嘅half-term break，呢樣應該就同香港嘅學校唔同。

下面呢個page只要輸入postcode就可以搵到該區嘅學校假期，區區唔同，以下學期時間只作參考。

https://www.gov.uk/school-term-holiday-dates

Autumn Term 由9月初至12月中，中間10月尾有1星期half term break

12月尾至1月初放聖誕假

Sprint Term 由1月初至3月尾，中間2月中有1星期half term break

4月初至4月中放復活節假

Summer Term 由4月中至7月中, 中間6月初有1星期half term break

7月尾至8月底放暑假

去超級市場入貨期間，小妹見到盒手工藝好有興趣，萬母見只係£3.99，諗住俾小妹half-term break時消磨吓時間都好喇，點知，離開超級市場，小妹攬住盒野睇時，就話"媽咪，呢度寫適合14歲以上架"。

萬母當時已經流緊冷汗，心諗"今次捉蟲喇"，只有答"咁不如放到你14歲時先整喇"。

結果，當然不如萬母所料喇，呢盒手工藝唔係消磨小妹嘅時間，變成消磨萬母嘅時間。仲要時不時被催，"你幾時先整好呀？你休息左好耐囉喎，你快D開始繼續整喇！"萬母而家好明白細路被催溫習時嗰種心情，明明已經好努力，只係抖一抖唧，做咩又催。

如果呢隻野有幸完成，萬母將會再出post紀念，否則佢將會成為屋內其中一件被遺忘嘅物品。

圖為努力左一日半嘅成果，萬母其實唔係織女，自從中學針黹堂後都冇再掂過毛冷。好彩係買左盒怪獸，怪獸可以好奇怪都得。

睇屋記 - 前傳 Freehold vs Leasehold

萬母除左鍾意睇學校，其實都好鍾意睇屋，未到步前主攻租盤，到步後就主力睇賣盤。始終初黎報到，唔親眼睇過都唔放心放咁大舊血汗錢落去。

喺香港我哋呢D升斗市民，頂多係買層樓，好少去到買間屋，但英國呢邊除左賣樓，仲會賣屋賣地，所以呢邊嘅賣盤有分Freehold同Leasehold。

Freehold比較易明，就係買橦屋時連埋塊地買，咁就可以做地主喇，以後塊地有咩保養維修都係自己負責。好多house都係用freehold形式放賣，但亦都有D唔係，所以睇盤時要留意。

Leasehold可以理解成向地主租地，通常D apartments, flats, maisonettes(呢個詞萬母曾經唔明白，查字典話係"豪宅"，但原來係指兩層嘅屋，每層分別有自己嘅出入口，嗰種類似apartments嘅住宅)就係以leasehold放售，咁leasehold有咩唔好呢？就係當個地租期滿，地上面嘅建築物都會歸大地主所有，所以如果一間樓嘅租期(length of lease agreement)少過70-80年，就會變得唔值錢，仲會好難做按揭，但leasehold嘅樓又相對平D，易D入門，之但係都要留意，俾左錢買左樓之後，仍然要俾管理費/維修費俾大地主，呢筆數都要計埋，否則好易失預算。

如果買左2年以上嘅話，Leasehold嘅業主係可以向大地主申請延長租期嘅，但當然都係要錢喇。有報導話英國政府正計畫廢除延長租期嘅收費，詳見下面連結。

https://www.ft.com/content/3d56df2f-9dde-4f2b-917d-e082bb2c7e38

攪清楚Freehold vs Leasehold同諗清楚想買咩類型之後，就可以出發去睇屋喇。睇屋時仲有好多野要留意嘅，除左租樓都要留意嘅boiler同double glazed windows之外，門前嘅driveway同間屋嘅擴建潛力都係考慮之一。每多睇一間屋又會學多樣野，實在係睇一屋長一智。

搵盤網站：

https://www.rightmove.co.uk/

https://www.zoopla.co.uk/

萬母覺得香港人住開蝸居，點都會覺得英國嘅樓/屋好大，初嚟報到，住番apartments類會易D適應，起碼唔駛去掃花園同除草先，但點都嚮往住花園大屋嘅，特別係當細路未大時，都希望見到佢哋開開心心咁喺花園玩，但萬母又曾經諗過，如果間屋好大，分佈三層，咁喺地下點同樓上嘅人溝通呢？唔通要整番個"中央廣播系統"，煮完飯就開咪宣佈"唔好意思，阻阻各位，飯已煮完，3分鐘後飯廳集合，宣佈完畢"。

若不是耶和華建造房屋、建造的人就枉然勞力．若不是耶和華看守城池、看守的人就枉然儆醒。(詩篇 127:1)

#圖文不符

#公園一景

萬の髮 開業誌慶

萬母又再次成就解鎖，萬母髮廊正式開業！萬母擁有幾十年(睇人)剪髮經驗，手藝一(加八)流！

離開香港前已專登剪好頭髮，但小妹們嘅前陰已開始篤眼，萬母唯有親自出剪，小妹千萬個不願意，又提醒萬母要小心，唔好剪親佢對眼咁話。

雖然萬母擁有豐富(睇人)剪髮經驗，但操刀前都補補習先。

以下幾條係萬母嘅補習連結。

https://www.youtube.com/watch?v=tSDLRo7t8xQ

https://www.youtube.com/watch?v=olreCpFu5kk

https://www.youtube.com/watch?v=R4_SZx_O14M&feature=youtu.be

今次只係稍為修剪前陰，第一剪重手左少少，好彩都未似個碗蓋，下次再挑戰剪埋後面。

下面條link係教自己剪頭髮，萬母未試，等D頭髮長到忍無可忍時先試吓自己動手。

https://www.youtube.com/watch?v=TDbRPiLR99A

同一個channel仲有一條叫老婆指定髮型，先留起條link，待用。

https://www.youtube.com/watch?v=CvCaPjFxHhw

其實high road都有salon嘅，但因為lockdown無開，路過見到價錢牌最平其實只係£10，所以呢，都唔係無選擇嘅。

好人新年平安

第一次唔喺香港過年，的確有D冷清，大年初一仍要上堂，對於萬母同小妹們都係第一次呢。萬母本身喺香港都冇話特別去辦年貨嗰D，但過到黎，為左承傳呢個傳統節日，點都要做少少嘅。

我哋專登喺過年前去左轉亞超，諗住睇吓有咩賣，點知除左一大堆白蘿蔔之外，都唔係太多年貨，可能太遲先去喇。想買揮春同利是封，但實在太娘喇，最後只係勉為其難地買左1包利是封，亞超仲有年糕，糖冬瓜，瓜子呢D年貨，但本身我哋唔好嘅，以往都係做女兒賊，喺娘家拎，喺全盒放完都係掉嘅，所以今年我哋都冇特別買，蘿蔔糕可能賣晒，或者呢邊係興自己整喇，所以都係買唔到，但朋友可能能夠read our minds，知道我哋想食蘿蔔糕，所以整左分俾我哋，我哋一家的確係蒙恩典嘅。

萬母最鍾意嘅新年習俗，除左係細個時逗利是之外，就係用碌柚葉洗邋遢，因為除左可以奉旨玩水，仲好鍾意嗰陣清香嘛，但呢邊唔覺有碌柚葉賣，可能係萬母唔識搵喇，萬母要認真考慮吓自己種番棵碌柚樹先得(萬能生喺旁邊鬧痴線)，咁就隨時都可以有碌柚葉沖涼喇。

喺亞超辦唔到年貨，反而我哋喺超市買左個紅色嘅食物盒，拎嚟當全盒用，仲買左D鍾意食嘅朱古力, 糖同開心果，放滿個全盒，等新正頭有多D甜頭同開心。

包利是封除左拎嚟封利是俾小妹外，本來想緊金魚掛飾，但呢邊嘅利是封好厚料，摺到手指痛，所以摺左一隻就算喇。

萬母以往都係靠媽媽嘅水仙花嚟點綴家居，增添新年氣氛，今年冇得靠阿媽，只能靠自己，本身超市都見到有類似水仙花嘅花賣，但實在太瘦太醜樣，萬母買唔落手，最後就買左棵蘭花，萬母同小妹攬住棵蘭花排隊俾錢時，前面個伯伯係咁同我哋搭訕，問我哋"Japanese? Philippines?"，當我哋話係Hong Kong時，佢仲講左句"Welcome"，而且仲用普通話講左句"你好"，再解釋自己唔識講廣東話，最後佢見我哋只買一樣野，仲專登要我哋排先，感謝我哋係異鄉遇見天使，佢唔單止歡迎我哋呢D外邦人嚟英國，佢仲知道香港係講廣東話而非普通話，感謝天使為我哋喺寒冬增添一點暖，好人新年平安，好人一生都要平安！

💰💰超市行情：💰💰

利是封 £3/20個@亞超

湯圓 £1.95@亞超

蘭花 £8

紅色食物盒 £1.5

小貼士：

趁仲係新正頭，喺香港買定D靚靚揮春利是封，之後跟家當寄運，否則嚟到只能用娘爆款式。

洗邋遢

就算過左年廿八，有邋遢都一樣要洗嘅。

喺香港，我哋習慣左廚房同浴室都有抽氣扇，仲要裝最勁嗰種，有咩濕氣一抽即掂。但喺英國，唔多見有抽氣扇呢樣野，頂多個浴室頂有個抽氣嘅東東，但絕對唔覺佢有任何效果。

可能係慣左有抽氣扇善後，呢邊個廁所同廚房都好快發現有霉漬，D霉漬終日篤眼篤鼻，實在令人討厭，想用漂白水捽佢，又怕捽爛幅牆，卒之經網友介紹用左呢隻滴X去霉液，噴一噴，等五分鐘，用濕布抹，輕微嘅霉漬一抹即甩，唔駛出力捽，嚴重嘅霉漬噴第二次都甩到，太好喇，幅牆可以靚靚仔仔過新年喇。

呢個廚房無啦啦有個凹位，經常有水氣積聚，仲有古古怪怪地貼左牆紙，所以好易發霉，起初怕會令到牆紙甩色，好彩冇事，下次一見佢出霉就噴，實行同佢鬥快。

雖然呢間屋有D位古古怪怪，但業主喺交吉前已經重新油牆，又清潔左間屋，交到我哋手上都算企企理理嘅，所以我哋都好感恩，話晒呢個係我哋喺英國嘅第一個屋企，能夠好快有個落腳點，令之後settle所有野都順暢好多，所以我哋要同業主實行雙贏政策，雙贏並唔係某國模式嘅連贏兩次，係大家都有得益，佢有租收時，我哋又有舒舒服服嘅屋企住，努力keep住間屋喺個好狀況，佢好我都好。

以上為不專業嘅師奶推介，如果有好嘅家居產品，歡迎介紹俾萬母。

💰💰超市行情：💰💰

滴X去霉液 £ 3.50

咩為之擠迫戶

要申請BNO Visa其中一個要求，就係申請人要有6個月嘅生活費，自己攪掂住宿accommodation，可以係自己俾錢租屋或者親友接濟，但呢個住宿不能overcrowded，但點為之overcrowded呢？

https://england.shelter.org.uk/housing_advice/repairs/check_if_your_home_is_overcrowded_by_law

🌻有兩種計法，第一種以房數計： 所有瞓到人嘅房都計(包括客廳，飯廳，書房)，不限睡房

擠迫戶的定義係： 2個10歲以上不同性別嘅人要瞓喺同一間房(不包括兩公婆)

以2房1廳，最多可住6人，只要同房嘅係同性別就得

🌻另一種計法複雜D，以空間計：

首先要計人頭，10歲以上當1人計，1-9歲當半個，1歲以下唔當係野

跟住就計房間數目同大細： 細過50尺嘅唔算數，睡房或客廳以外唔計

1間房可住2人

2間房可住3人

3間房可住5人

4間房可以7.5人

5間房可住10人

以2房1廳為例： 最多可住5人

或者，以房間大小計

房間大細50-69尺 可住0.5人

房間大細70-89尺 可住1人

房間大細90-109尺 可住1.5人

房間大細110尺以上 可住2人

以2房1廳(都大於110尺)為例： 最多可住6人

🌻簡單D咁講，3人家庭(當全部10歲以上)，起碼1房1廳先唔係overcrowded。4-5人家庭就要2房1廳，但D房唔可以太細。

租屋時，agent問得好仔細，幾人住，細路幾多歲都問得清清楚楚，所以如果大家庭要租屋就要睇清楚幾大先唔算overcrowded喇。

#圖文不符

趁呢幾日持續飄雪，小妹們功課都唔做住，落左街玩雪先，佢地話留個message俾老師鄰居隻貓喎。

Screen Free Day

估唔到學校除左安排網課之外，仲會安排Screen Free Day，老師話唔想佢哋成日對住電腦，叫佢地呢日要離開電腦，唔駛上網課，唔駛做網功，改為幫手做吓家務，睇吓書，玩吓board games，完成後再影相upload俾老師睇。

萬母心諗：其實呢，咁樣即係攪到阿媽架。小妹有個同學仔聽到呢個消息後，即刻同老師講，"唔得架，我阿媽唔俾架"，聽到老師忍住笑咁答，"She will say yes"，哈哈，老師叫到阿媽都冇得say no喇。

萬母現貴為全職書僮，當然要奉陪到底，同小妹們一齊玩轉屋企喇。

小妹分別摺左自己張被，洗左一隻碗，摺左一件衫，睇左一本書，跳左一隻舞，玩左一局dobble，貼左一張揮春，焗左12隻cupcakes，係呀，所有野都係做少少，交左差就算，想叫佢幫手做多DD都唔制。

D Peppa Pig cupcakes係小妹先前貪得意買嘅，放左埋一邊冇攪，趁Screen Free Day就拎出嚟焗。

盒面寫住只需一隻蛋及baking tray就得，估唔到真係咁易，全程都係小妹們自己操作，自己睇說明，自己打蛋，雖然攪到檯同地都有，自己攪粉，自己分粉醬，再自己攪icing，最後muddy puddle cupcakes出爐，賣相有點泥，但味道都唔錯架。

既然屋企有焗爐就唔好嘥喇，俾佢哋玩多D試多D，佢地已經買定frozen cupcakes，準備下次再阿茂整餅。

💰💰超市行情：💰💰

Peppa Pig Muddy Puddle Cupcake Mix £ 2.00

解讀Compare School Performance網站(4)

上回睇完GCSE數據，今回嘗試解讀A-level數據。

🌻Progress score and description (A levels)

呢個Progress score都係睇吓學生有幾大progress(進步)， compared to 中五畢業時(end of key stage 4)，個數越大表示班學生跑贏大市，比其他同屆學生進步得多。

🌻Average result (A levels)

呢項係指A levels嘅平均成績，但計法極奇複雜，詳見下面link嘅文件。

https://assets.publishing.service.gov.uk/government/uploads/system/uploads/attachment_data/file/843472/Performance_Points_-_a_practical_guide_to_key_stage_4_and_16_to_18_performance_points.pdf

除左計成績，佢仲考慮埋個課程嘅長短同課程資格，跟住計一大輪數，最後結果係越高分即成績越好。

🌻Percentage of students completing their main study programme

呢個簡單D，有幾多%嘅學生能夠完成佢地嘅高中課程，咁數據越大就即係越少人半途而廢。

🌻Achieving AAB or higher, including at least 2 facilitating subjects

拎到AAB或更好成績嘅比例，但必須最少兩科係facilitating subjects，即係通常入大學要嘅科目，biology, chemistry, physics, mathematics, further mathematics, geography, history, English literature and classical or modern languages.

🌻Grade and points for a student's best 3 A levels

每個學生計成績最好嗰3科A levels，加埋D分再除以3(即係計平均分)，然後再計全級學生嘅平均分，分數越高即係學生平均成績越好。

先前撈出嚟嗰5間中學出嚟，繼續睇埋A-levels成績先，但有兩間學校因為太新或是根本冇開A-levels，所以只得3間有成績比較。

Michaela Community School (2014年先開辦，未有A-levels成績)

The Archer Academy (無開中六/七)

Fortismere School

Preston Manor School

Ark Academy

🌻睇番Progress score，Ark Academy表現最好，先前中五嘅成績就麻麻，但中七又唔錯喎，咁睇番佢嘅Results over time，真係咁啱呢屆中七叻左，屆中五就渣左，咁究竟讀唔讀得過就要書僮自己諗喇。

🌻Average result最好嘅係Fortismere School，咁睇番佢嘅Results over time，中五同中七成績都算穩定，似乎考慮得過。

如果睇Compare School Performance數據揀到心水學校之後，就要再去熟讀吓學校網站，參加入學講座，了解吓要住幾近先有機會入到喇。做書僮除左要揀學校，仲要揀埋樓呢，真係要多才多藝先得架，下回有機會講吓萬能家睇屋嘅紀錄。

以上資訊係由萬書僮上網爬文所得，如有錯漏，歡迎書僮們一齊研究討論。

解讀Compare School Performance網站(3)

先前喺茫茫校海撈左幾間做例子，今次就再用compare school去比較吓。

Michaela Community School

The Archer Academy

Fortismere School

Preston Manor School

Ark Academy

圖1左：如果睇Progress 8 score，Michaela Community School嘅數奇高，可以理解為學生讀左5年中學之後，進步左好多，但都要睇多幾年數據先穩陣。 Ark Academy嘅學生就只係keep住成績，冇咩大進退。

圖1右：Fortismere School同Ark Academy都相對少人讀EBacc，咁樣唔代表學校唔好，可能係提供左其他科目俾學生揀。如果click返入各校嘅頁面，可以見到：

Michaela Community School嘅非EBacc科目只有： Art & Design, Art & Design (Fine Art), Religious Studies

Fortismere School嘅非EBacc科目有： Applied Engineering, Applied ICT, Art & Design (Fine Art), Art & Design (Photography), Business Studies:Single, Design & Technology, Drama & Theatre Studies, Economics, Media/Film/Tv Studies, Music, Music Studies (General), Physical Education/Sports Studies, Sociology, Sports Studies

咁樣睇埋就明白點解Fortismere School嘅Entering EBacc個數咁細，因為佢開左其他科俾學生讀，唔係個個學生都讀EBacc，其實咁樣都唔錯，因為學生可以多D選擇，揀一D佢地自己有興趣又實用嘅科。

圖2右：雖然Fortismere School報EBacc比率唔多，但GCSE英數成績都唔差。

圖3：睇埋Attainment 8 score同EBacc average point score，Michaela，Archer同Fortismere都不相伯仲，呢三間都值得再深入了解。

除左睇GCSE，A-level嘅數據都值得考慮，下回再解讀A-level數據。

再重申，家家有求，個個細路質地都唔同，人地讀得好/覺得好嘅未必啱自己個少主，書僮們除左睇數據之外，都可以上學校網睇多D，參加入學講座，甚至去學校附近睇吓返放學時嘅情況，自己嘅感覺係最真嘅。

以上資訊係由萬書僮上網爬文所得，如有錯漏，歡迎書僮們一齊研究討論。

與UKVCAS玩遊戲

UKVCAS全名UK Visa and Citizenship Application Services，即係申請visa去影相打指模嘅地方。

因為太心急，所以冇等到APPS，衝左上網填visa申請表。

一家四口要填四次表，足足填左4個鐘，最誇張係要填過去10年嘅外遊紀錄，第一次有少少後悔成日身痕去旅行，每次仲要填晒確實嘅日期，睇番本passport唔係齊晒所有出入境印，最後竟然係靠facebook嘅遊記+旅行相去解決，咪以為填完表俾晒錢就攪掂晒，點知好戲在後頭，online申請係要到指定地點影相打指模，原來要book時間去打指模係難過登天架。

第一日我哋見到嘅係滿滿嘅timeslot，只得番幾個要收錢嘅，諗住電腦系統呢家野，應該每日放一堆quota，所以就等多一日，點知第二日更滿，因為新開放嗰日係星期日，星期期唔辦工。打電話熱線問，話未來28日都滿晒，只能明天請早，講個電話都收錢，10分鐘盛惠£3。

無辦法之下唯有再等一日，專登唔瞓，等半夜12點放新timeslot，點知全部都係要收錢嘅，最平£69.9，最貴要£199，一家四口真係好禾味。實在太唔忿氣，擺明掠水，所以萬母咩都冇book，嬲爆爆去瞓覺，仲諗緊點算好，肉隨砧板上，甘願被人生劏，定係withdraw申請再等apps好。

到第二朝9點，萬能生唔忿氣要求再上網站睇，竟然見到免費timeslot！！！ 究竟呢個咩電腦程式，點解收費timeslot同免費timeslot會分開發放？！

最後，我哋終於成功book到免費timeslot去打指模，雖然要等多1個月，但起碼叫做settle左。免費timeslot只限於某幾個core centre，其他咩enchance，咩premium全部都要收錢，仲有好多咩extra services通通都要收錢，呢間公司真係幾識掠水。

如果大家唔太心急嘅話，等apps先申請就可以免欲book ukvcas嘅煩惱。如果必須要同ukvcas斡旋的話，就準時9點在電腦前standby等免費timeslot，祝click路亨通！

https://www.ukvcas.co.uk/home-internal 

解讀Compare School Performance網站(2)

喺compare-school-performance網站可以將學校add to my school list，然後揀右上角嘅My schools，就可以比較唔同學校嘅數據。咁要比較數字，當然要先知道D數據代表D咩先。

🚧🚧警告：D計數方法勁複雜，會悶到嘔泡，萬母已經盡能力去理解，希望冇理解錯誤。如果唔想睇一大埋計數方法，可直接跳到逃生門(小總結)。🚧🚧

先從最簡單嘅入手。

🌻Staying in education or entering employment (2017 leavers)

睇字面已經知道，係指讀完Key Stage 4(即中五畢業之後)，有幾大%繼續升學或就業，2019年嘅數係講緊2年前(即2017年)嘅畢業生。咁呢個%應該越大越好，因為個學生畢左業，又唔繼續升學，又唔返工，即係變左雙失學生？

🌻Grade 5 or above in English & maths GCSEs

呢個數即係有幾多%嘅學生喺GCSE嘅英文同數學科拎到Grade 5或以上。咁Grade 5即係幾好grade呢？即係C。 GCSE 最低分grade 1即係G，grade 2即係F，一路數上去，grade 7即係A，最高分grade 8即係A*。咁都好明顯，呢個%越高即係學校越多學生英數C到。

🌻Entering EBacc

要先理解咩係EBacc先，EBacc(English Baccalaureate)可以當係一個科目嘅組合，係英國政府鼓勵中五學生去應考某幾科GCSE，覺得呢幾科涵蓋夠廣泛，對升學/就業有幫助。

EBacc包括：

- 英文(English language + literature兩科)

- 數學

- 科學(2 Combined science or 3 single sciences from Biology, Chemistry, Physics, and Computer science)

- 地理/歷史

- 語言(ancient or modern foreign language)

Entering EBacc就係間學校有幾多%學生報考EBacc package，萬母覺得EBacc呢個package都幾難，一定要讀理科之餘，又要讀埋地理/歷史，仲要加埋個外文，真係未必人人handle得到，但呢個指標就拎黎評估學校，對多元發展學校黎講其實唔係咁公平，因為有人可能唔係讀書材料，但其他科可以好有天份 。

🌻EBacc average point score

簡單講就係EBacc嘅平均分，計English language或literature(較好成績嘅一科，但學生一定考晒2科，否則唔計數)，數學，2科single science/combined science(計成績較好)，地理/歷史(計成績較好嘅一科)，語言(計成績較好嘅一科)，6科嘅分數加埋再除以6。

如果冇考嗰科就當0分。就咁睇，EBacc average point score越高即係嗰間學校嘅學生學術成績越多，但要留意，呢個score只計EBacc嘅科，如果學生係讀Music/Art/RS/Tourism/Accounting.....嗰D係完全唔計數嘅。

🌻Attainment 8 score

呢個A8 score其實都係用緊EBacc嘅科黎計分，但計法唔同，同埋會考慮埋其他科目。

Attainment 8 score係計數學雙倍分，英文雙倍分(如果考晒English language + literature兩科)，3科EBacc科目，3科其他GCSE科目(亦可係未計數嘅EBacc)或與GCSE睇齊嘅Technical awards。

加埋10科(數同英都double+另外6科)嘅分數就係Attainment 8 score。

Attainment 8 score睇落比EBacc average point score公平少少，因為會考慮埋其他GCSE科目同Technical awards，但如果個學生冇考EBacc，就會好唔抵，因為有幾科都冇得計分。

Attainment 8 score越高分代表學校嘅成績較好。

🌻Progress 8 score

P8 score要用埋A8 score去計嘅，佢假設每個學生有個estimated Attainment 8，呢個估計嘅A8 score係根據學生小學畢業時嘅成績而推斷(個推斷方法好鬼複雜，有興趣可以去下面嘅link睇)，如果當年佢小學畢業時考national tests越高分，咁就估佢到中學畢業時都keep到成績，有番相對應嘅分數。

咁Progress 8 score就係將實際(actual)嘅A8 score減去預計(estimated)嘅A8 score，所以P8 score照道理應該係0分。

咁如果個學生經過5年中學教育，進步左，實際得分比預計得分多，個數就會變左+(positive)，如果退步左就會-(negative)。

呢個Progress 8 score萬母覺得幾有意思，Progress 8 score越高分即係間中學越本事，能夠令學生進步。如果Progress 8 score係負數，即係D學生越讀越差。

以下連結有講點計呢D數。

https://www.naht.org.uk/news-and-opinion/news/curriculum-and-assessment-news/progress-8-an-explanation/

https://assets.publishing.service.gov.uk/government/uploads/system/uploads/attachment_data/file/872997/Secondary_accountability_measures_guidance_February_2020_3.pdf

🏃‍♀️🏃🏃‍♂️逃生門🏃‍♀️🏃🏃‍♂️

小總結：

Progress 8 score 越高代表經過5年中學教育，學生有越大進步

Entering EBacc 越高代表學校越多學生應考EBacc科目

Staying in education or entering employment (2017 leavers) 越高代表越多中五畢業生繼續學業/投入社會工作

Grade 5 or above in English & maths GCSEs 越高代表越多中五畢業生英數成績達C

Attainment 8 score 越高分代表學校嘅成績越好

EBacc average point score 越高分代表學校嘅EBacc科目成績越好

講數講到頭暈，遲吓有機會搵D例子再講。

以上資訊係由萬書僮上網爬文所得，如有錯漏，歡迎書僮們一齊研究討論。

解讀Compare School Performance網站(1)

英國政府有個網站可以比較唔同學校嘅表現，要揀學校，當然要識得解讀個網站。

https://www.compare-school-performance.service.gov.uk/

輸入左postcode，左面就會有filter俾你篩選想睇嘅學校。

Education phase - 教育階段

即係小學(Primary)，中學(Secondary), 高中-中六至中七(16 to 18)

Ofsted rating - 視學報告評級

類似香港學校嘅外評，有督學到學校睇文件，觀課，同校長，老師，學生，家長訪談，報告會列出學校的強項，弱項同需要改善嘅地方。

評級分4級，依次為： Outstanding, Good, Requires improvement, Inadequate

School type - 學校種類

Academy - 中央政府資助，但由academy trust管理運作，academy trust係非牟利機構，負責管理學校同提供專業意見，Academy有較大彈性，可以唔跟national curriculum，又可以自訂term dates。曾經D情況唔多好嘅學校先會被academy trust，但而家越黎越多學校變Academy，不論好壞

College - 通常指高中，除學術課程，都會有職業培訓

Independent school - 私校

Maintained school - 地區政府資助，地區政府管理，可以理解成香港嘅"官校"

Special school - 為SEN學童而設嘅特殊學校

Pupil gender - 學生性別

呢個好易明，Mixed即係男女校，Boys係男校，Girls係女校

選校時要小心D睇清楚，每年都實有烏龍家長幫個仔揀左個女校，或者幫個女揀左間男校

Religious character - 宗教

宗教學校可能有特別的收生準則，例如同宗教嘅優先考慮，通常都要加多份supplementary form，證明兩年內有常返教會，先可以排到"宗教隊"，但呢年幾都爆疫情，教會都冇得返，D學校都會講點處理，詳情就要返學校網站睇喇。

Anglican - 英國國教

Catholic - 天主教

Christian - 基督教

Church of England - 英國聖公會

Hindu - 印度教

Islam - 伊斯蘭教

Jewish - 猶太教

Methodist - 循道會

Muslim - 穆斯林

Orthodox Jewish - 猶太教正統派

Other Christian - 其他基督教

Plymouth Brethren Christian Church - 普利茅斯弟兄會

Quaker - 貴格會

Roman Catholic - 羅馬天主教

Sikh - 錫克教

咁多宗教，唔係個個識，但起碼唔好揀左D同自己理念有衝突嘅，否則有排煩。

下回解讀悶到嘔泡嘅數據。

以上資訊係由萬書僮上網爬文所得，如有錯漏，歡迎書僮們一齊研究討論。

#圖文不符

#花開富貴

#花開平安

#花開家樂