好人新年平安

第一次唔喺香港過年，的確有D冷清，大年初一仍要上堂，對於萬母同小妹們都係第一次呢。萬母本身喺香港都冇話特別去辦年貨嗰D，但過到黎，為左承傳呢個傳統節日，點都要做少少嘅。

我哋專登喺過年前去左轉亞超，諗住睇吓有咩賣，點知除左一大堆白蘿蔔之外，都唔係太多年貨，可能太遲先去喇。想買揮春同利是封，但實在太娘喇，最後只係勉為其難地買左1包利是封，亞超仲有年糕，糖冬瓜，瓜子呢D年貨，但本身我哋唔好嘅，以往都係做女兒賊，喺娘家拎，喺全盒放完都係掉嘅，所以今年我哋都冇特別買，蘿蔔糕可能賣晒，或者呢邊係興自己整喇，所以都係買唔到，但朋友可能能夠read our minds，知道我哋想食蘿蔔糕，所以整左分俾我哋，我哋一家的確係蒙恩典嘅。

萬母最鍾意嘅新年習俗，除左係細個時逗利是之外，就係用碌柚葉洗邋遢，因為除左可以奉旨玩水，仲好鍾意嗰陣清香嘛，但呢邊唔覺有碌柚葉賣，可能係萬母唔識搵喇，萬母要認真考慮吓自己種番棵碌柚樹先得(萬能生喺旁邊鬧痴線)，咁就隨時都可以有碌柚葉沖涼喇。

喺亞超辦唔到年貨，反而我哋喺超市買左個紅色嘅食物盒，拎嚟當全盒用，仲買左D鍾意食嘅朱古力, 糖同開心果，放滿個全盒，等新正頭有多D甜頭同開心。

包利是封除左拎嚟封利是俾小妹外，本來想緊金魚掛飾，但呢邊嘅利是封好厚料，摺到手指痛，所以摺左一隻就算喇。

萬母以往都係靠媽媽嘅水仙花嚟點綴家居，增添新年氣氛，今年冇得靠阿媽，只能靠自己，本身超市都見到有類似水仙花嘅花賣，但實在太瘦太醜樣，萬母買唔落手，最後就買左棵蘭花，萬母同小妹攬住棵蘭花排隊俾錢時，前面個伯伯係咁同我哋搭訕，問我哋"Japanese? Philippines?"，當我哋話係Hong Kong時，佢仲講左句"Welcome"，而且仲用普通話講左句"你好"，再解釋自己唔識講廣東話，最後佢見我哋只買一樣野，仲專登要我哋排先，感謝我哋係異鄉遇見天使，佢唔單止歡迎我哋呢D外邦人嚟英國，佢仲知道香港係講廣東話而非普通話，感謝天使為我哋喺寒冬增添一點暖，好人新年平安，好人一生都要平安！

💰💰超市行情：💰💰

利是封 £3/20個@亞超

湯圓 £1.95@亞超

蘭花 £8

紅色食物盒 £1.5

小貼士：

趁仲係新正頭，喺香港買定D靚靚揮春利是封，之後跟家當寄運，否則嚟到只能用娘爆款式。