失敗乃成功之後母 ~ 年糕篇

其實除咗焗椰汁年糕同傳統年糕之外，萬母今年都試咗焗朱古力年糕，但加咗朱古力粉之後，成舊野硬咗好多，由煙煙韌韌變咗掟死狗咁款。

玩得蒸糕bell，當然唔少得瘋狂洗版嘅蘿蔔糕，因為明知自己唔多掂，所以都冇買咩貴料，索性整無料扮四條嘅齋蘿蔔糕，整呢舊糕期間真係有D混亂，最後加咗幾多粉同幾多水都唔係好記得，但最後萬能生竟然話OK喎，下次考慮就咁開粉漿蒸畀佢食就算喇。

就係咁，年糕之亂就告一段落喇，下年再見喇。

#如果生活將你擊倒 #那就先躺下

#失敗乃成功之後母

#樂觀地悲觀係我嘅價值觀

傳統年糕

先前整咗個焗年糕，既然屋企仲有材料剩，就試埋傳統年糕。

1. 煲125毫升水，煮溶125克brown sugar，倒入40毫升椰汁同15克菜油攪勻，攤涼備用。

2. 將100克糯米粉同35克澄麵粉撈勻，過篩，逐少加入糖水中，一邊加粉一邊攪勻，直至完全混合。

3. 將麵糊倒入糕盤中，隔水蒸60分鐘。

4. 攤涼後放雪櫃。

5. 切片蘸蛋汁落鑊煎至軟身。

呢種傳統年糕其實都唔算難整，只係將材料混合再加熱，有D似讀書時做化學實驗咁。

出嚟嘅成果都算成功，煎到軟軟，幾好食，可惜屋企冇咩人識欣賞，所以應該每年出一底，節日限定。

焗椰汁年糕

年又過年，今年係第二年喺英國過年，舊年傻吓傻吓，未企定就過年，好彩有朋友接濟，叫做有舊糕過年。

今年就決定自己試喇，幾十歲人第一次整年糕，第一款揀咗個非傳統年糕。

1. 將2隻蛋同100克砂糖打勻

2. 將125毫升椰汁同125克糯米粉加入蛋汁中攪勻

3. 將粉漿倒入焗盤中(可先用baking paper墊底)，180度焗50-60分鐘，用牙籤插入年糕中，冇粉漿黐住就熟。

呢款年糕焗出嚟個面脆卜卜，中間有D煙煙韌韌，小妹冇投訴，算係大成功。

M and m direct網店

開心買鞋，唔開心買鞋，好天買鞋，落雨買鞋。

其實買鞋唔需要藉口，想買就買，要買就買。

舊年暑假幫小妹買咗對超市平價波鞋，玩咗一個學期就報廢，唯有再買過。

M and m direct網店買滿£75先免運費，而且退貨要收約£3運費，所以要計清楚先化算。

不過M&M除咗鞋，衫褲襪都有嘅，所以要買夠£75真係唔難。

今次小妹除咗買返學波鞋，仲買咗閃燈波鞋，閃燈波鞋好似幼稚咗D，但只要少主開心就夠。

阿媽教落，正月唔好買鞋，所以過年前要瘋狂買個夠。

https://www.mandmdirect.com/

Vertbaudet網店

萬母時不時都撩小妹傾學校野，雖然成日都慘食檸檬，但有時都會收到D料。

萬母問小妹小息玩咩，問問吓發現小妹放小息時冇著外套，起初佢話唔凍，再追問吓發現佢嫌件外套太貼身，郁動唔方便。

聽到呢到，萬母已經知道下一步要做咩，就係要買新外套，問咗一輪客戶需求，最後就揀定喇。

今次去Vertbaudet網店，兩小妹各買咗一件冬天外套，買滿£49免運費，唔啱仲可以免費退貨。

小妹一試著，第一件事就係試吓紮辮，今次件外套買大咗一個碼，方便小妹入面著學校fleece，著住仲舉到手，跑到步。

放學返嚟，兩小妹都話有同學讚佢哋件外套好靚，真係多謝同學們咁善心，而家唔怕小妹唔著外套去放小息喇。

https://www.vertbaudet.co.uk/

學習感恩生活中嘅小確幸。

蛋撻 ~ 手殘版

本來想買酥皮整腸仔酥，點知買錯咗撻皮。

睇完一大輪都冇咩信心可以整到建議嘅食物。

唯有用呢D撻皮試整蛋撻，撻皮用現成，只要專心整蛋汁就得。

1. 將砂糖70克同熱水150毫升攪勻，等D糖溶晒就攤涼備用

2. 雞蛋2隻同花奶75毫升，半茶匙雲呢拿香油打勻，加入糖水，攪勻勻

3. 將蛋汁倒入撻皮內

今次先前200度焗15分鐘，再用180度焗15分鐘，結果有D過火，火山爆發咗。

個撻皮偏硬，蛋汁味道唔錯(自己讚自己)，小妹同朋友仔嘅評語係not bad & normal，手殘版蛋撻都算係合格㗎喇，不過個皮應該可以搵更好嘅選擇。

一幽風飛散髮，捐出

 英遷咗一年，萬母都冇剪過頭髮，一來早期lockdown，髮型屋唔開，二來懶惰，三來一早已經留意咗捐髮，知道要留到咁上吓長先捐得。

留咗一年，實在覺得個頭好重，最後雖然唔係成條馬尾都夠長去捐，但都係忍唔住剪咗D煩惱絲佢。

以下youtube有教自己頭髮自己剪，不過一刀剪之後都仲要修修，變相嘥咗一D原本可以捐嘅頭髮，有D可惜。

https://www.youtube.com/watch?v=TDbRPiLR99A&t=635s

當然喇，而家髮型屋已經開翻，出街剪都係可以嘅。

基本上，不理男女老幼，只要D頭髮合資格就捐得。

💇‍♀️最少17cm長，理想係30cm，甚至41cm

💇‍♂️冇染到五顏六色(染啡/黑係可以嘅)

💇‍♀️剪頭髮前要先洗乾淨，唔好落護髮素

💇‍♂️剪頭髮前要吹乾，唔可以剪咗先烘乾

下面就係接受捐髮嘅機構網站，詳情可以去網站睇

https://www.littleprincesses.org.uk/donate-hair

希望下次可以忍耐D，再留長D去捐喇。

如果你都有一頭秀髮，都可以考慮留長後捐咗佢，呢個機構接受世界各地嘅捐髮，而收到嘅頭髮係會用嚟整假髮畀D患病嘅細路。

裝修記(14) - 揀油漆

揀好晒D廚廁地板，去到裝修中期，就係揀牆色。

阿builder極力推薦Jasmine White呢隻色，話10間英國屋，有9間都係油呢種色，我哋要求佢油細細忽做sample，睇完就覺得麻麻地，因為Jasmine White雖然叫White，但其實係米黃色，如果室內光線不足，直情肉眼睇係黃色。

我哋想間屋光猛D，特別係向北嘅房，因為冇咩日光照入屋，更加想幅牆光D，所以就去咗B&Q買tester嚟試。

我哋鎖定Dulux，再喺入面揀(近)白色嘅顏色嚟試。

起初買咗兩隻tester，仲請小妹幫手試色，最後試咗五種先搵到心水色。

強烈建議要買tester嚟試，因為電腦螢幕嘅色板絕不能作準。油漆罐上嘅好少少，但油咗上牆又係另外一回事。唔想油晒成屋先後悔，只好花少少錢買tester試色。

💰💰超市行情：💰💰

Dulux tester £1.79@

蝦仁炒蛋

因為成日被小妹投訴唔夠餸，所以要再開源，發掘多D手殘人士都煮到嘅餸。

1. 用麻油，雞粉醃蝦仁

2. 雞蛋發勻後加鹽調味

3. 蝦仁落鑊炒至8成熟

4. 將雞液落鑊同蝦仁同炒

5. 食得

因為萬能家唔好蔥，所以就走青喇。

呢個蝦仁炒蛋都算易整，D蝦仁未開飯已被偷食。

AA救車記

有D經驗，真係唔係好想擁有，繼而有得分享，但既然"有幸"經歷過，就不妨記低佢。

架車因為揩到路邊石壆，爆咗呔，好彩出事時離目的地不遠，順利去到目的地，但問題係返唔到屋企。

停低架車，見到條呔扁晒，萬能生就即刻決定call AA救援，由於唔知AA要攪幾耐，佢就吩咐萬母嘗試搵朋友嚟執番三個婦孺返屋企。

結果AA救援車半個鐘左右就到咗，幫架車泵翻脹條呔，再用塞塞住個窿，AA哥哥話架車可以勉強揸返屋企(15-20分鐘車程)，但就建議我哋直接揸去車房門口，等第二朝車房開工時可以整，佢解釋個塞只係暫時頂住，頂唔到一晚，所以直接去車房門口就最少後續問題。

AA哥哥仲話佢會揸車跟尾去車房，確保中途唔會出問題，去到車房門口，AA哥哥仲幫手搵埋車位，佢仲話可以車埋萬能生返屋企，呢個AA哥哥真係好人到爆，仲要全程笑笑口，好好態度。(題外話：AA哥哥個樣有D似電影中嘅耶穌🧔)

萬能生總結今次AA救車記算係好順暢，好滿意AA嘅表現。本來打算保險到期後(仲有一星期到期)就唔續保，而家當然乖乖續保喇，希望唔需要再用得著喇。

🎬🎬幕後花絮： 🎬🎬

當我哋停咗車喺目的地時，隔離車因為電池冇電向我哋求救，我哋車上係有過江龍，但可惜兩車相隔一個車位，條過江龍唔夠長，兩架車又郁唔到，結果就幫佢唔到。而另一架車想過嚟幫忙，但竟然開唔到車頭蓋，正當隔離車司機好無助之際，AA哥哥義務幫忙，出一次call救咗兩架車，真係要畀個"讚"佢。

💖💖特別鳴謝守護天使出車相救，錦上添花易，雪中送炭難； 對於守護天使嚟講可能只係舉手之勞，但對於當事人嚟講，會係從深淵中被救贖嘅感覺，人在異鄉，加倍感恩。💖💖

裝修記(13) - 揀軟水機

相信好多英遷港人都同萬母一樣，對住D硬水擰晒頭，鋅盆一撻撻水垢，水龍頭，浴屏又係，洗完又出，D碗碟乾咗又有水漬，最可怕係有時D深色衫，洗完係有一撻白色水漬，真係望見都頭痛。

為咗唔再受硬水困擾，喺新屋裝軟水機係一個辦法，況且新屋換晒新喉，就更加抵裝軟水機喇。

先講吓軟水機有咩好處先：

1. 防止水垢

2. 軟水較易起泡，令到清潔工作容易D

3. 令到某D家庭電器(例如：洗衣機，洗碗碟機，boiler)壽命長D，亦令佢哋運作時較慳能源

4. 軟水比硬水較少塞住毛孔，對皮膚較好 (係咁講喇，唔知真定假)

5. 洗完嘅衫都軟熟D

6. 用少D洗潔精，沐浴露，慳D駛費 (話同裝軟水機嘅價錢為到皮喎)

咁壞處又係咩呢？

1. 部軟水機要搵位擺，部機嘅size係49.5cm x 20.6cm x 43.5cm，好多人都會放喺樓梯底或洗衫房

2. 有機會要額外駁喉

3. 較嘥水，有報道話會嘥10%水

4. 除咗買機錢，仲有維修費，同埋買鹽費

5. 因為軟水機係用鹽軟化D水，所以有大批鹽要回收，對環境唔好

6. 軟水會由喉管浸出重金屬，而且飲落會有怪味，唔適合直接飲用

我哋當初諗住裝部軟水機，係全屋變晒軟水，但得到builder嘅全力反對，之後自己再睇吓軟水機嘅好處與壞處，就決定skip咗廚房同花園兩條喉，即係廚房同花園水喉仍出硬水。

至於用邊個牌子軟水機，我哋都係跟風，見身邊有兩家朋友都不約而同咁用呢個牌子，我哋就慳D腦汁，照跟算喇。

以下為軟水機公司網站，非賣廣告，冇佣收嘅，不過如果打算裝嘅朋友都可以聯絡萬母，因為推介朋友，朋友同自己都可以得到"磚鹽"。

https://www.harveywatersofteners.co.uk/water-softener/

Your Garden Made Perfect

又係電視精時間，睇個名就應該估到，同先前Your Home Made Perfect類同。

今次係講裝修花園，每集都有兩個cases，一個係貴價花園，另一個係平價花園。

老實講，我哋從來未擁有過花園，所以真係唔係好知點攪，暫時都係攪掂間屋再算，不過睇吓節目，知道本地人點睇D花園，同埋有D ideas點攪都係好嘅。攪掂間屋，下一步就處理個花園，小妹話交畀佢喎，究竟可唔可信呢？

都係有TV license就可以用i Player睇。

https://www.bbc.co.uk/programmes/m000ry6w

杏仁豆腐 ~ 低階版

上次用豆漿整咗個豆腐花，今次又試另一樣，用杏仁奶整杏仁豆腐。

1. 用200ml杏仁奶整溶魚膠粉，落少少粉，攪勻佢，再落少少

2. 將200ml杏仁奶同step 1嘅魚膠粉混合物一齊煲

3. 邊煲邊攪

4. 裝碗，雪凍，食得

今次冇咁偷懶，先乖乖攪溶D魚膠粉，所以成碗杏仁豆腐都凝結得比上次實淨。

下次唔好咁心急，切埋粒粒，加埋水果，整靚個賣相引吓小妹先得。

Winter Blues

Winter Blues學名係Seasonal affective disorder(季節性情緒失調)，通常發生喺日短夜長嘅季節，英國嘅秋冬就啱晒。

症狀包括情緒低落，對日常生活失去興趣，易發嬲，感覺生無可戀，成身無力，攰奶奶，冇精神，渴睡，體重增加等等。

處理方法包括調節生活方式，吸多D天然光，定時運動，控制壓力來源，光療(照特別嘅燈)，接受輔導，食抗抑鬱藥，如果發現以自己能力應付唔到，就要睇醫生喇。

日短夜長除咗攪到情緒低落，仲會缺乏維他命D，缺維他命D其中一個症狀都係情緒低落，易攰，容易病，皮膚乾，骨質疏鬆，仲可以容易有心血管病。

唔夠日光照，身體做唔夠維他命D，唯有靠口服補充。舊年冬天英國封城，NHS有免費維他命D畀長期病患，不過今年就冇喇。

剛英遷嘅港人，本身適應新生活已經唔易，仲要應付埋winter blues，更加唔易，有咩唔妥，記得要搵人傾，搵人救，或者睇吓吒咤，睇吓Mirror都可以，總之搵方法令自己開心D。

過咗冬至，日照時間開始每日增長，真正明天會更好呀！

https://www.youtube.com/watch?v=diKHLx1XZlY

雞蛋仔 ~ 低階版

萬能生好掛住香港嘅雞蛋仔，所以專登去買部雞蛋仔機返屋企。

萬母為咗做個賢妻，都專登去買咗包waffle粉返屋企畀佢自己整，1包waffle粉整到8底雞蛋仔，形狀同質感都似嘅，可惜味道較淡，下次要再試其仔材料。

https://www.tkmaxx.com/uk/en/home/kitchen+dining/food-prep+storage/red-bubble-waffle-maker/p/85699017

💰💰超市行情：💰💰

雞蛋仔機 £16.99 (@TKmaxx)

雞蛋仔粉 £1

兒童權益@英國

 喺聖誕假期開始之初，萬母曾經同小妹講，不如趁假期做吓補充練習囉。

點知就得著小妹猛烈回應，佢話要打電話搵警察，原因係萬母侵犯咗佢嘅兒童權益。

小妹仲解釋畀萬母聽，英國兒童擁有以下權益：

1. 生存和發展 

2. 免於暴力，虐待同忽視

3. 發表己見

4. 接受教育

5. 足夠嘅生活水平

而萬母要佢做練習，係屬於虐待，而且小妹嘅意見(唔想做)係應該被聽到嘅。

萬母聽完小妹嘅解釋，只能提醒自己"係自己生嘅，自己生嘅"。

2022年展望，保持情緒穩定。

#激死老母系列

~~~~~~~~~~~~~~~~~~~~~~~~~~~~~

雨後會有彩虹，黑夜後會有黎明。

2022年未必會脫離亂流，但祝你在亂流下仍能平安。