Winter Blues學名係Seasonal affective disorder(季節性情緒失調),通常發生喺日短夜長嘅季節,英國嘅秋冬就啱晒。
症狀包括情緒低落,對日常生活失去興趣,易發嬲,感覺生無可戀,成身無力,攰奶奶,冇精神,渴睡,體重增加等等。
處理方法包括調節生活方式,吸多D天然光,定時運動,控制壓力來源,光療(照特別嘅燈),接受輔導,食抗抑鬱藥,如果發現以自己能力應付唔到,就要睇醫生喇。
日短夜長除咗攪到情緒低落,仲會缺乏維他命D,缺維他命D其中一個症狀都係情緒低落,易攰,容易病,皮膚乾,骨質疏鬆,仲可以容易有心血管病。
唔夠日光照,身體做唔夠維他命D,唯有靠口服補充。舊年冬天英國封城,NHS有免費維他命D畀長期病患,不過今年就冇喇。
剛英遷嘅港人,本身適應新生活已經唔易,仲要應付埋winter blues,更加唔易,有咩唔妥,記得要搵人傾,搵人救,或者睇吓吒咤,睇吓Mirror都可以,總之搵方法令自己開心D。
過咗冬至,日照時間開始每日增長,真正明天會更好呀!
https://www.youtube.com/watch?v=diKHLx1XZlY
沒有留言:
發佈留言