上回買咗D sea bass魚柳返嚟煎，得到各方親朋好友教路，今次決定解鎖新技能，蒸魚去。
1. 洗淨魚柳，加少少鹽幫佢按摩一吓
2. 放上蔥絲，薑絲
3. 滾水後，蒸5分鐘 (塊魚柳好薄，所以好快蒸熟，如果係原條魚應該要蒸多幾分鐘)
4. 蒸熟後，倒走魚水，讚豉油熟油
食家評語係：蔥有蔥味，薑有薑味，魚有魚味
連平時唔好魚嘅小妹都搶住食，下次可以成pack蒸晒，唔驚冇人hou
因為懶惰，所以萬母覺得蒸/焗係最方便嘅，只係計時就得，唔駛睇火嘛。
屋企附近嘅魚檔其實有原條魚賣，鱸魚賣£10/7條，之但係，萬母仍未過到攪原條魚嘅心理關口，而且買冇骨魚柳又方便D唔識吐骨嘅人。
💰💰超市行情：💰💰
sea bass魚柳 £ 2.89/180g
去睇呢間屋，主要原因係被佢廣告嘅相吸引咗，諗住去睇吓D裝修，吸收吓D靈感，點知......
英遷生活，有一樣野好唔習慣，就係唔知D野應該去邊度買。喺香港住慣住熟，好多野都知窿路，但喺英國唔熟路，真係好多野都未知。
萬母一直都覺得超級市場同poundland嘅文具好齋，成日都諗邊度有靚靚文具賣，實在好掛住日本嘅文具。
終於小妹從老師口中得知paperchase，仲要求去朝聖。
https://www.paperchase.com/en_gb/
我哋去嗰間分店喺商場入面，舖仔細細，但入面嘅文具真係幾精美嘅，記事簿，筆，卡，禮物袋，禮物盒，樣樣都靚靚嘅，的確好吸睛，文具控入去真係要小心個荷包。
身為一個偽知識份子，點都要帶小妹去睇吓博物館嘅，小妹本來最想去history museum，但因為佢阿媽攪錯咗，以為自己book到飛，點知原來係冇嘅，唯有退而求其次，臨急臨忙去book科學館。
科學館免費入場，但要預先上網book飛，D飛係易book嘅，早一日book定都仲得。
科學館共有5層，其實係好多野睇，但就比較多舊野，即係講吓D科學發展史，呢D對於小妹(&萬母)嚟講都比較悶，小妹偏愛D interactive嘅玩意，呢類玩意喺香港科學館就比例多，英國科學館就只係得幾個，沖繩嘅Wonder Museum就最啱feel，小妹喺嗰幾個interactive parts逗留嘅時間最長。另外有D項目係需要額外訂飛先入到，免費同要收費嘅都有，其中一間房係專for小小童，有得玩水嘅，小妹們喺外面睇見都想玩呢。
萬母覺得英國科學館係比較適合D大年紀又鍾意靜靜哋睇野嘅小朋友。但既然做咗倫敦居民，點都要去吓D博物館遊覽吓，博物館遊記陸續有來。
https://www.sciencemuseum.org.uk/home
最後，講吓科學館附近嘅泊車安排，星期六下午1點半後同星期日，科學館後面條街係可以免費泊車，如果想揸車去嘅朋友可以就吓時間。
啱啱先放暑假，咁快就back to school？ 唔係馬？！
其實只係超級市場嘅促銷，ALDI而家做緊返學用品促銷，有書包，返學鞋，校服，價錢都好相宜。
https://www.aldi.co.uk/c/specialbuys/dates/2021-07-22
萬母同小妹見到D書包都好靚，係我哋鍾意嘅pattern，但因為屋企太多書包，我哋都係忍住手冇買。
只係買咗兩對黑色波鞋，留番9月開學著，如果唔想暑假尾同人搶校服，可以早少少去入定貨，當然喇，都要估計吓暑假期間細路嘅成長速度，免得新買就已經唔啱著，咁就做唔到精明師奶喇。
其實喺英國買返學用品真係唔貴，只要唔係崇尚名牌，其實有好多平價選擇。
💰💰超市行情：💰💰
黑色波鞋 £5.99/對
曾經，萬母好期待放暑假，會倒數住等暑假嘅來臨。
但今年，萬母並唔期待暑假嚟，因為放暑假即係兩隻小妹會全日喺屋企，萬母就冇咗自由喇。
但係無論幾唔情願都好，暑假仍然都要嚟，正如黎明遲早都會到一樣。
入正題先，暑假到，即係小妹們已經完成一學年嘅學習，準備升班喇，咁英國呢邊小學升班係點㗎呢？
以下只係小妹學校例子，唔代表全英國嘅學校都係咁。
暑假前，係有成績表派嘅，仲要4頁紙咁長，主要講個細路呢一年喺英文，數學，科學同基礎學科嘅表現。學生表現分"態度"同"成就"兩類，"成就"係指達唔達該年級嘅標準。仲會有幾句建議暑假可以點改善。能夠科科都做超班馬當然就最好喇，但其實學習最重要係個態度，萬母好感恩兩小妹嘅學習態度都被評為"A"，而且老師嘅評語係佢哋已融入校園生活，識到朋友仔。
除咗成績表，仲有細路嘅自評，講吓呢年最開心係咩，最難忘係咩，下年要點改善等等。
學校仲會派返D"書"返屋企畀家長過目，"書"其實係練習簿，入面貼咗上堂做嘅工作紙，萬母睇完真係覺得幾難，點解可以寫滿成頁雞腸㗎。
升班係原班升，即係D同學會一直同班直至畢業，而暑假前某一天，班細路係會同新班主任見面嘅。
臨放暑假前一星期，每日都有好多唔同嘅活動，運動會呀，開升班party呀，總之喺英國返小學係超級愉快嘅。
由於小妹們正式放暑假，萬母嘅更新頻率應該唔能夠好似先前咁密，但手上仍有幾個project進行中，例如：學車，裝修，呢D會keep住時不時update嘅。希望呢D projects唔好太大挑戰喇，平凡是福。
萬母考筆試嘅經歷真係估佢唔到。
事緣本來book咗6月尾考筆試，但當日去到試場，竟然被告之"電腦壞咗，冇得考"，職員畀咗個incident number，叫萬母自己send email/打電話去聯絡，當刻已經覺得泄晒氣，謝晒皮，好明白咩叫一鼓作氣，再而衰，三而竭。
一行出試場就嗱嗱臨send email喇，auto reply話10日會有回覆，點知等足3星期都冇回音，一路等一路仲要keep住溫書，因為一唔溫就會唔記得，實在等到忍無可忍，唔想再受折磨，萬母決定唔理咁多，自己科水再book筆試，之後先再追討回水。
點知筆試期爆到不得了，唯有每日幾次上去巡網，終於執到隻死雞，可以喺暑假前考咗佢，暑假唔駛再溫書。
(DVSA呢排update緊個booking system，upate完仲更加亂七八糟，要book筆試嘅朋友，祝你好運喇！)
就係咁，萬母第二次去到試場，今次一入門口就check車牌，上到reception再check一次，之後要去locker放低所有野，身上只能有車牌，連紙巾都唔准袋。
去到exam room門口再check多次車牌，跟住就會被安排埋電腦，電腦螢幕嘅指示好足夠，只要留心睇就可以，MC共50題，唔係所有都同APPS一樣，所以就算萬母溫APPS溫到滾瓜爛熟，最後都有幾題MC係唔sure嘅。
至於hazard perception test嘅片同APPS完全唔同，不過D hazards都有大同小異，有人/動物突然走出，有車突然轉線等等。
當答完晒所以問題之後，就要靜靜離開考室，返去reception，職員就會畀封信你，上面寫住pass/fail，兩部份分別拎到幾多分。
pass咗筆試之後有個certificate number，拎住呢個number就可以去報路試，要2年內考到路試，否則要重新考筆試。
感恩，終於可以放低筆試呢樣野，下一步係繼續學車同追討退款。
正在/將會準備筆試嘅朋友，溫官方APPS喇，溫到熟，熟到爛咁去考，點都會有D渣嗱嘅。
除咗nanny(上門褓姆)之外，仲有另一種托兒服務，就係childminder，即係喺褓姆屋企湊細路。
要成為childminder比成為nanny嚴格好多。
首先要做Disclosure and Barring Service (DBS，即犯罪紀錄)，仲要有急救證書，childcare training，醫生填嘅健康申報小冊子，2個推薦人，同埋良民證。
除此之外，屋企同住/一齊做野嘅16歲以上人士全部都要做犯罪紀錄檢查同埋良民證。
申請完，仲會有人上門檢查間屋同花園係咪安全，對於early years foundation stage (EYFS) requirements 係咪熟悉，仲有英文程度如何。
聽到已經覺得煩，所以最後都打消咗喺屋企托兒嘅念頭，都係湊好自己嗰兩件就算喇。
https://www.gov.uk/become-childminder-nanny/register-childminder
https://www.gov.uk/become-childminder-nanny/after-you-apply
上回講咗學校嘅breakfast club同after school club嘅托兒服飾，今回講吓其他托兒服務。
Nanny中文解褓姆，朋友講過同區嘅nanny都幾搶手，萬母曾經諗過既然要湊小妹，順便做nanny湊多兩個，賺吓外快咁幾好囉。
但上英國政府網站睇，原來nanny係要上門湊仔嘅，咁萬母而家嘅情況又唔方便上門。
不過都分享吓點樣註冊做nanny(上門湊仔嘅褓姆)，nanny如果湊2個或以下家庭嘅細路，係唔需要註冊嘅，但當然都可以主動向ofsted註冊，註冊同唔註同冊有咩唔同呢？就係註冊咗嘅褓姆可以幫僱主家庭減稅，咁註冊咗應該會受歡迎D。
每年註冊費£103，另外有下面嘅要求：
Disclosure and Barring Service (DBS，即犯罪紀錄)
急救證書
childcare training
public liability insurance(公眾責任保險)
良民證
英國政府nanny註冊網站。
https://www.gov.uk/guidance/childminders-and-childcare-providers-register-with-ofsted/nannies-registration
咁成為nanny可以賺到幾多錢呢？根據indeed嘅招聘廣告，大約£9-12/小時。
咁既然唔方便上門湊仔，接人哋嘅仔返屋企湊又點呢？下回講解喺自己屋企湊仔有咩要求。
喺香港嘅雙職家庭，多數都有工人姐姐幫手，嚟到英國，如果冇工人姐姐而兩個家長都要返工嘅話，可以點解決呢？
其中一個方法係參加breakfast club and after school club，好多學校都有呢D clubs，主要係俾家長早D放小朋友返學校同埋晏D去接佢哋。
以小妹學校為例：
Breakfast club係朝早8點至9點，每日收£2.5。
After school club係由下晝3點至6點，每日收£11，如果一星期返足5日就每日£10。冇提早預約就£13/日。
朋友話某D學校嘅breakfast club and after school club好full，要排waiting。
因為萬母現貴為"土地測量師奶"，所以暫時未用過呢D服務。
喺英國學車，其實係一直喺真實環境學嘅，而唔係喺駕駛學院入面玩揸車嘅。
究竟應該喺香港學車定過到英國先學呢？呢個問題相信好多人都好想知。
能夠先拎到個牌嘅話當然盡快拎咗佢喇，不過就算喺香港學識都好，P牌嚟到英國點都要補補鐘嘅。
咁喺英國先開始學係咪好蝕底呢？又唔係嘅，起碼喺學車期間已經累積咗一段英國路面經驗，呢D經驗都幾重要㗎，因為有D技巧係英國先常見。
出去真實環境，自然會遇到好多真實問題，例如成日會遇到對頭車，要搵位讓車。行行吓條街好多車，又貨車，又巴士，仲要條路兩邊泊滿車，攪到變成單線雙程行車，所以都幾大壓力嘅。
萬母試過轉轉吓彎，停咗喺半路中，因為扭得盤軚嚟唔記得咗隻腳。
另有一次係連過兩個迴旋處(roundabout)，轉完第一個已經用晒D能量，轉轉吓第二個時變得手忙腳亂，踩錯咗個brake，成架車又停咗，差D被後車撞到。簡單嚟講，應停時唔停，唔應停時停咗。
至於行車速度方面，由於交咗咁多學費，已經比之前10 miles進步咗，最快試過33 miles，不過嗰段路其實係行30嘅，師傅畀萬母嘅comment係，應快時唔快，應慢時唔慢。well~~希望再練習多D，手腳會協調得好D喇。
各位司機哥哥姐姐，如果你哋見到D學神失驚無神停咗喺路中間，其實佢哋唔係"特登"㗎，請體諒佢哋手腳未能協調喇。
仲有，遠離學神，可保平安！
https://www.youtube.com/watch?v=QKm8znqIM4U
小妹隔離期間，萬母試過自己做檢測，自己鼻哥自己撩，其實真係唔多work嘅，自己撩肯定會就住嚟，條脷又唔多聽話，成日頂住個喉嚨。
本來萬母嘅第二針係約咗喺暑假期間打嘅，但因為政府加快疫苗進度，所以就改早咗喇，夠8星期就打第二針。
咁第二針同第一針感覺有咩唔同呢？
先前打第一針時，萬母隻手係廢咗幾日嘅，廢到係直情想用繃帶紮起佢。
今次打第二針，一早預咗要再廢幾日，點知手臂冇預期咁痛，只係小小脹痛，針口位有少少痕，仍能活動，勉強做到家務。
但身體就明顯會攰D，成日都眼瞓，而且會覺口乾，有輕微骨痛，但呢D唔舒服，過兩日就已經冇事。
所以，總括嚟講，兩針反應都唔算大。希望唔會再要有第三針喇。
英國照原定計畫，19/7解封，連香港入境嘅朋友都唔再需要隔離，但確診數字其實仲升緊，真係希望天佑女王，暑假唔好爆得咁勁喇。
圖為打針後紀念品，自行檢查套裝。
呢間18號屋其實係喺17號屋旁邊，同一個發展商，但另一個屋苑名，呢邊只有8間houses。
呢間又係大屋，2017呎，分3層，共4房。今次去睇呢間係示範單位，所以任影唔嬲。
地下近門口位置有一個客廳，另外有一客廁，再有一開放式廚房連客飯廳，客飯廳近花園位置有天窗，採納自然光，又係另一樣時興。
廚房同屋17如出一轍，都係白色為主。
一樓有兩房連兩廁，主人房又係有walk-in wardrobe，再經walk-in wardrobe入浴室，企缸浴缸齊晒。
二樓再有兩房一廁，每間房都有入櫃衣櫃。
屋前另有一車房，今次係一個真係擺到車嘅車房。
睇咗咁多間屋，呢間同萬母心中嘅dream house最接近，而價錢亦都係最離地嘅，所以呢，今晚都係早D瞓，睇吓發夢時住唔住到靚屋喇。
偶然喺網上見人講呢本雜誌，見口碑唔錯，想買本嚟睇吓，點知搵勻各大超市都唔見有賣，最後都係上網買咗一本試讀。 睇過實物之後，覺得真心正，值得訂閱。 呢本雜誌嘅目標讀者係8-14歲嘅青少年，但萬母覺得大人都啱睇，特別係我哋呢D母語唔係英文嘅大人，因為有D生字，佢會配有英文解釋。 雜誌...
