睇屋記(19)

去睇呢間屋，主要原因係被佢廣告嘅相吸引咗，諗住去睇吓D裝修，吸收吓D靈感，點知......

呢間係1409呎嘅3房end of terrace house，地下同一樓都做咗extension。

地下一入門口有個偏廳，偏廳冇門，反而係扑咗幅牆做咗個半open area，偏廳主要擺咗細路嘅玩具，同萬母嘅計劃有D似嘅。

偏廳後面係一個utility room，放咗洗衣機，乾衣機，boiler，收晒入房，閂埋門就眼不見為乾淨。

再入係一個開放式廚房連大廳，成間屋最四正算係個廚房，廚房有個island位，係洗手盆兼breakfast table，近花園嘅天花有大天窗，bifold door出花園。

一樓有兩大一細房，由於一樓做咗extension，所以有間房係有ensuite嘅，但亦因此做咗extension，一樓嘅layout有D古怪，因為佢個extension嘅闊度比原屋窄，所以有好多窿窿罅罅位，好似個浴室入面有間房仔，agent話原本係桑拿房，但未完工，而家塞滿雜物，另外樓梯後又有條窄窄嘅罅，又係放滿雜物。

成間屋畀人嘅感覺都係怪怪哋，一來間屋好多雜物，二來間屋嘅layout三尖八角，好多窿罅位，三來間屋好似裝修咗一半未完工咁，D牆油到一撻撻，周圍都有裂痕，有D地方好似好豪，有D就甩甩爛爛咁。

咁呢間屋有咩優點呢，就係佢個花園超級大，有成150呎，超級長，大到屋主放咗個泳池仔同兩間屋仔都仲有好多位，另一好處係呢間屋係喺區內受歡迎學校嘅校網區入面，屋主個細路本身都讀緊嗰間學校，而且間屋近大街，生活真係好方便。

雖然萬母唔多欣賞呢間屋，但相信都會有人欣賞佢嘅優點而選中佢嘅，因為各花入各眼吖嘛。