白色太陽槍 - White Sun Gun

⚠️⚠️先旨聲明，呢篇係講女性衛生用品，男士請自行迴避，特別係準備測試運氣，打算去買馬仔，打雀仔嘅，萬母對於任何財物損失係唔會負責任架。⚠️⚠️

先前已經聽人講過，外國嘅衛生巾係唔好用嘅，有人甚至話要入埋櫃寄船，但萬母當初只係放左日用，夜用，護墊各1包入喼，諗住頂住先，到步先慢慢搵。

Liners即係護墊，有好多選擇，長短大小都有。Tampons即係棉條，都係好多得揀。

基本上D巾巾都係看圖(包裝)識字，有D用數字代表大小，1最細，4最大，有翼冇翼都係睇圖就知，但要小心睇，因而有時D背景花會攪到以為係翼。

以下係兩大超市嘅女性衛生用品部連結。

https://www.tesco.com/groceries/en-GB/shop/health-and-beauty/women%27s-toiletries/sanitary-protection

https://www.sainsburys.co.uk/shop/gb/groceries/health-beauty/all-feminine--care#langId=44&storeId=10151&catalogId=10241&categoryId=428860&parent_category_rn=12448&top_category=12448&pageSize=60&orderBy=FAVOURITES_ONLY%7CSEQUENCING%7CTOP_SELLERS&searchTerm=&beginIndex=0&hideFilters=true

日用巾都算易搵到啱用嘅，最令萬母最苦惱嘅係夜用巾，喺香港用開高潔C 41cm，喺英國想搵番類似嘅，最初買左always 4 secure night，見佢都係黑色包裝，但其實諗番都覺自己天真，包巾細細包，同萬母手掌差唔多大，但入面有9條巾，可以想像每條有幾大，竟然妄想佢同41cm有得比，結果開出嚟係薄切切嘅，雖然都有30cm長，但係就薄過薄切肥牛，always嗰幾包全部都係薄切切，好處就係無感，壞處就係吸濕力唔夠勁。

always唔OK，萬母就試TENA嘅maxi night喇，以萬母理解嘅maxi night應該就係要搵嘅超級夜用巾，好多牌子都有maxi night(睇網頁時)，但去到門市就搵唔到喇，即係唔係間間門市有齊所有款嘅巾。

呢包TENA maxi night係冇翼嘅，巾長約33cm，好厚，厚過一哥焗豬扒飯塊豬扒，好有安全感，但就厚到會hi住大脾內側，如果日頭用就會好唔舒服，但夜晚瞓覺唔駛行都仲可接受嘅。

(後補：有朋友教萬母，discreet係for尿滲，唔係for period，即係圖2嗰包唔係M巾)

再一包係Bodyform嘅Maxi goodnight+，呢包野係萬母自己去濕平時，見有位阿太喺貨架上拎左兩包，咁萬母當然唔執輸，埋去睇吓係咩嚟喇，個袋寫住£1.49，但標價只係£0.89，咁抵，緊係試番包喇，呢款長30cm，有翼，比TENA薄，但都有D厚度，都算係可接受嘅。

萬母暫時都仲未搵到可以媲美41cm嘅巾，以上兩種只係頂住檔先，如果有絲打搵到，請與萬母分享資訊，謝謝！

BTW，自從1月1日脫歐起，英國嘅女性衛生用品就變成免稅喇，其實就算免唔免稅，要用時都要買架喇，但免咗稅平少少都好嘅，可以積少成多。

https://www.bbc.co.uk/news/business-55502252

清水垢 - 浴屏篇

上回提到水煲出現腳皮狀物體，原來係水垢，除左水煲，其實浴屏都係重災區。

起初以為浴屏上嘅只係普通水漬，以為用洗潔精同百潔布可以抹得甩，點知出盡九牛二虎之力都捽唔甩。

又係水垢惹的禍，唯有又去買descaler，今次買支裝，直接唧落去，再攤5分鐘，之後用水沖就甩到喇。

圖1係前後對比照，估唔到先前真係咁污糟。

醒起先前借朋友浴室時，見到有水刮，而家明白點解喇，每晚沖完涼就將D水點刮走，咁就冇咁容易有水垢喇。

所以呢個故事係教訓我哋： 今日嘅水今日刮，否則聽日好難抹。

萬母已經責成每日最夜沖涼嘅萬能生，記得沖完涼要刮浴屏。

💰💰超市行情：💰💰

Bathroom Cleaner £1 (記住要買remove limescale唔係prevent limescale)

夏令時間開始喇

講起夏令時間(Summer Time)，萬母只會諗起香港某D學校嘅時間表，google後先發現，原來香港都曾經行過夏令時間，但都係幾十年前嘅事。

英國嘅夏令時間(British Summer Time)係由每年3月最後一個星期日(即係今日)開始，至10月最後一個星期日。

咁夏令時間有咩影響呢？就係時間會撥早一個鐘頭，尋晚半夜零晨1點，英國嘅時間突然skip咗1個鐘，變成零晨2點，真係消失的一小時！

如果用智能電話就唔駛愁，個電話會自己調節，但如果用傳統手錶/時鐘，就要記得調快番D時間喇，否則返工返學會遲到。

至於個生理時鐘先係最難攪，一家大細嘅生理時鐘真係要慢慢調節喇。

咁對仍喺香港嘅親友有咩影響呢？就係香港同英國嘅時差會縮短咗，而家英國只係慢香港7個鐘頭咋，我哋嘅距離拉近咗呀。

春天來了，英國周街都係花🌷🌹🥀🌺🌸🌼🌻。

#這是天父世界

記開學第3週

返咗學已經轉眼3星期，小妹仍舊好鍾意每日嘅午餐甜品。

小息依然玩到癲晒，根據妹妹報告(即係篤背脊)，小息時見到家姐玩到碌地沙，家姐解釋係玩緊among us真人版，好彩萬母預咗每日都洗校服，衝擊都唔算太大。

今次講吓英國小學生嘅作息時間先，以前喺香港，小妹要朝早6點起身，6點半出門口趕校車。

而家小妹瞓到7點半起身，跟住有一個鐘時間俾佢哋梳洗，食早餐，換校服，8點半就出門口行返學。步程大約15-20分鐘，視乎嗰日有冇"慢"步人生路。

晏晝3點3放學，返屋企先沖個涼，跟住休息吓(即係打吓機，睇吓電視)，有時會有功課做，都係抄5個詞語，每個1次咁大把，小妹每星期有默書，默5個詞語，所以都要花時間串吓字。

佢哋返咗學時，萬母就最寫意，一放學返嚟又似打仗，但已經好過喺香港時好多，起碼唔駛跟功課先。但就要煮飯囉，咁如果跟功課同煮飯二選一，選邊樣好呀？

可唔可以貪心D？兩樣都唔要呀？

睇屋記 (10)

呢間係1671呎嘅4房3廁，位置，大細同間隔都合乎我哋嘅要求。

地下有客廳，飯廳，廚房同conservatory(玻璃屋/溫室)，一樓有三房一廁一浴室，個廁所好特別，只有馬桶冇洗手盆，現手業主放左好多書喺入面，唔知係如廁習慣定係當儲物室用，二樓有一房一廁。

間屋已做loft conversion，所以二樓有一房一廁，二樓間房仲有個好特別嘅角落(見圖)，小朋友應該會好鍾意，大人就要小心撞頭。

間屋留有好多歷史嘅痕跡，講得白D，就係D裝修好舊，agent話現手業主20年前經佢買左呢間屋，買入後都冇咩裝修，只係11年前整咗個loft，所以屋內大部份裝修都有廿年幾歷史，特別係個廚房，好有古典嘅氣息，所以如果買左呢間屋，裝修係少不了，咁既然都要攪裝修，應該就會拆左現有嘅conservatory，正正經經做過rear extension，成個地面再重新規劃，加個guest toilet，咁呢度又係一筆數。

萬能生曾經對conservatory有偏好，但聽到朋友話conservatory冬凍夏熱，雨天好嘈，因為雨水打落conservatory個頂會好大聲好嘈，佢就打消左要conservatory嘅念頭喇。

除左裝修，呢間屋嘅花園都好有特色，現手業主係個園藝愛好者，從佢嘅花園可以清楚了解得到，張相係從二樓影落花園，左右兩邊比較空曠嘅係隔離屋嘅花園，中間種得密密麻麻嘅係呢間屋嘅花園，現手業主應該花左好多心機，時間同金錢去打理佢個花園，除左summerhouse同2間shed，仲鋪左石仔路，連蜂箱都有，可想而知佢有幾熱愛，咁新業主如果同樣熱愛園藝嘅應該會好高興，否則就會有D頭痕囉。

望住呢個花園，萬母都真係覺個頭痕痕地嘅，聽埋另一朋友嘅經歷就更甚喇。

朋友話佢嘅後園有5棵長得好茂盛嘅大樹，因為太茂盛，需要搵人嚟修剪，5棵樹盛惠£2XXX，係英磅唔係港紙!!! 而佢個後園因為冇後門，如果D樹枝要經佢間屋出街嘅話，一來佢要事後清潔，二來修樹工人要將D樹枝再剪細D，而呢個工序係要收多£2XXX，好彩嘅係佢鄰居嘅花園有後門，而鄰居又肯借個後門佢哋用，佢哋只要抽起兩個花園嘅隔板就可以運D樹枝走，有個好鄰居就可以慳番£2XXX。

萬母聽完佢嘅分享，更加諗要睇清楚個花園，諗吓自己承唔承受得起。

車後cam

喺香港揸開架車係有後cam嘅，倒車時可以睇到車後嘅情況，但英國呢架車冇，所以萬能生就決定上網買一個，自己安裝。

萬能生推介嘅車後cam，盛惠£26.99。

https://www.amazon.co.uk/gp/product/B07H2ZP672/ref=ppx_yo_dt_b_asin_title_o02_s00?ie=UTF8&psc=1

個screen係套喺原本嘅倒後鏡上面，而cam就放車尾嘅玻璃，個cam從car cigarette lighter取電，安裝時最麻煩係要將電線由車頭拉到車尾，要走得靚，唔吊吊揈係要花D心機嘅。 萬能生讚呢個車cam好用，一來夠wide，二來入後波時個cam會自動出畫面，三來可以喺個screen度控制個cam嘅角度，想睇多D地面，可以喺screen度掃就得，好方便。

其實喺買呢個車cam前，萬能生係買過另外一個嘅，但嗰個嘅鏡頭角度好窄，簡單D講就係冇鬼用，所以萬能生將佢退貨。

唔好用嘅車後cam，千祈唔好買，唔好用，唔好買，唔好用，唔好買！

https://www.ebay.co.uk/itm/282803591133?ul_noapp=true

咁喺ebay買野要退貨，只要同賣家傾好咗，ebay就會email一個postage sticker俾你貼上件貨度，去到郵局，label上會寫住Postage on Account GB，咁自己就唔駛俾郵費。

點知件退貨唔知發生咩事，stuck咗喺某個delivery office一路唔郁，打去Royal Mail又幾日都冇人聽。

再去Royal Mail救助，counter教填claim form，可以online填，期間要交埋件貨嘅收據，同郵局寄貨嘅收據。之後同賣家講番，賣家都check到件退貨係寄出咗，所以都同意退款。

本來以為填form係催佢快D出番件貨，點知Royal Mail係退錢。

由於賣家已退款，如果收埋Royal Mail嘅退款就變相賺咗，不義之財唔好貪，所以又要將Royal Mail嘅支票退返轉頭，買個車cam都煩一輪。

萬母話ebay好麻煩，delivery成日都出問題，試過冇收到貨，但話送咗，再追蹤GPS先話發現架貨車根本冇去過我哋屋企條街；再唔係就整爛咗攪到deliver唔到，都係amazon穩陣D。

清水垢 - 水煲篇

有日當萬母飲水時，發現杯底有一塊塊腳皮狀物體，萬母都幾肯定屋企唔會有人咁衰，玩腳皮嘅，所以經查證後，發現原來係水垢(limescale)。

水垢從何處來？咪就係從鼎鼎大名嘅硬水而來。

硬水(hard water)係指D水入面有較多礦物質，例如鈣(calcium)同鎂(magnesium)，如果中學讀chem嘅話，應該會依稀記得硬水攪到番梘起唔到泡，當年係識得條formula架，而家當然還番晒俾老師喇。

好多人都話硬水會攪到甩頭髮，暫時萬母都未證實到，但就可以肯定硬水會令水煲起水垢。見圖1最左邊，煲底嘅腳皮狀物體同煲邊嘅淺黃漬。

萬母曾經懶天然咁買D梳打粉，再加檸檬汁去清水垢，係work嘅，但要加埋百潔布去捽，咁懶惰嘅萬母當然想坐享其成，唔想出力捽喇，所以就去咗買descaler(見圖2)，呢類產品各大超級市場有售，好多唔同牌子。用法如下：

1. 用水煲煲一煲水(盒底指引話煲半升，天真嘅萬母第一次信咗佢，但半升真係唔夠浸成個煲架)

2. 煲滾後，掉粒descaler tablet落去，會起晒泡，小心唔好俾佢漏瀉

3. 攤5-10分鐘之後倒左佢

4. 用水煲再煲水，煲完倒左佢，2-3次後，水煲就再用得

用呢D tablets，唔駛出力捽，個水煲就已經可以變番白白滑滑，實在適合懶惰嘅人。知慳識儉嘅萬母仲將浸完大水煲嘅水倒落細水煲，咁就一粒tablet兩煲用，剩咗嘅水仲拎去淋埋洗碗盆個水龍頭，嗰度都起晒水垢，好醜樣，淋完，等一陣，搵百潔布一抹就靚仔番。

萬母估計大約1-2個月清一次就夠，或者等到下次見到杯底有腳皮時再清都得。

買左嘅梳打粉，萬母並冇浪費，將佢倒入洗衣機嘅洗衣粉格，再開吉機洗一轉，跟手住埋滴X去霉液洗埋條膠邊，個陣噏味當堂清咗。

萬母最近諗，點解上天俾萬母嚟英國呢，唔通係要成為哥士的王子嘅接班人--梳打粉公主？！

💰💰超市行情:💰💰

descaler tablets £1/4粒

#萬母英遷

#英遷生活點滴

交水費

喺入伙初期，萬母曾經交過£156嘅水費單，張單嘅日期係寫住12月初至3月底，大約3個幾月嘅水費都算可以接受。

過左一輪，萬母收到第二張水費單，一見個錢碼£520，差D嚇到噴水，咩事咁貴呀？轉咗供神仙水呀？後尾睇清楚，先發現呢張單係收緊未來一年嘅水費，真係差D嚇C。

呢邊有兩種收水費嘅方式，第一種係跟水錶收，用幾多，收幾多。

另一種係定額收費，根據N年前嘅物業估價去收，而萬母屋企就係定額收費，所以一嚟就係一年嘅單。

定額收費可以揀一次找一年嘅數，亦可分2期(每半年找一次)，如果設立direct debit(類似自動轉帳)嘅話，就可以分10期交。

如果覺得水公司收得貴，可以要求裝水錶，但就要問過業主，我哋就覺得多一事不如少一事，因為我哋屋企都唔少人，水一定用得唔少。

萬母建議如果屋企多過一個成年人，最好各人登記唔同嘅utility，雖然好多時council tax bill都可以當地址證明，但萬能家登記GP時係唔受council tax bill，一定要用utility bill做地址證明，好彩水費係用萬母個名登記，而電費就用萬能生，咁大家都各自有utility bill嘅地址證明。

只要有耐心，爐頭換成新。

係入伙時，agent send左入份inventory俾我哋，係紀錄間屋到我哋手前嘅情況，包括屋內大小問題，地板有冇花，門框咩顏色，有冇花痕，燈著唔著，牆身有冇釘窿，天花有冇裂痕，屋內電器新舊情況都一一紀錄在案。

呢個紀錄係會用嚟同我哋退租時間屋嘅情況做對比嘅。

份inventory成五十幾頁，我哋都好努力咁睇晒佢，亦發現佢都算寫得仔細同齊全。其中一樣寫住個煮食爐(hob)嘅ignition係壞咗嘅，即係個爐係tac唔著火嘅，我哋拎左鎖匙入屋再試，都真係有問題，所以當時就報左俾agent公司知。呢間屋係經agent管理，所以有咩事我哋都係聯絡agent，而唔係直接搵業主。

當時以為呢樣算係urgent問題，應該好快會有人處理，點知我哋等咗9個星期先等到維修人員聯絡，期間我哋係用打火機點著個爐用，唔方便但總算用得到，所以一路都冇催agent，只係等。

維修人員第一次上嚟檢查後，話個爐太舊，螺絲滑咗牙，開唔到嚟整，所以要換過個新嘅，但要報番上公司再等。

終於我哋再等多4星期，就等到有新爐嘅消息喇。

本來約咗朝早8點至下午1點會有人嚟整，但朝早收到電話打嚟，話"唔好意思，攪錯咗，約錯咗其他engineer，而非gas engineer，所以朝早整唔到，改下午5點至7點"。

有時英國人都真係幾老實嘅，衰咗會坦白承認，仲會講明你知佢衰咩。

咁我哋唯有等喇，到咗7點，又再收到電話，話要delay，要11點先到，或者改另一日，因為怕又改日期唔知改到幾時，同埋又要由朝等到晚，所以我哋叫佢照嚟，幾夜都等。

結果阿engineer係半夜12點半嚟整，整到零晨1點3。

其實萬母好唔明白，唔係話英國嘅工作時間比較有人性架咩? 點解兩次維修都係攪到夜一夜先嚟呢？定係係我哋太冇人性，話夜一夜都等，攪到佢冇得收工呢？

總之，等咗13個星期，個爐頭總算攪掂咗喇。如果上次個boiler唔催佢，會唔會都要等13個星期先整好呢？

睇屋記 (9)

呢間係1318呎，5房3廁嘅排屋尾(end of terraced)。

呢間屋又係長長嘅格局，真係好長，仲好窄添。

地下有客廳同廚房，再加一個廁所，客廳面積係22呎X10呎，真係一個長長長方形。

一樓有三房一廁，二樓有兩房一廁。

呢間屋如果只睇面積，係夠住有餘嘅，二樓有間大嘅主人房同一間特別細嘅房，細房雖然未必住到人，但當書房/衣櫃間都係好有用。其他房唔算特別寬敞，但都放得落睡床。

間屋好近大街，真係轉個彎就到，生活好便利，特別適合冇車牌嘅人靠雙腳出去都好方便。

不過間屋又係有怪怪嘅情況，就係樓梯奇多，除左地下上一樓，一樓上二樓之外，每半層都額外有幾級樓梯。

地下嗰層嘅客廳奇長，比較難放傢俬，但唔係無方法解決嘅。

方法一： 拆左客廳嘅牆，將客廳同門口走廊融為一體，咁個客廳就會闊多幾呎，總面積不變，但廳中間有條主力柱，未必拆得，咁就會好攪笑地有碌柱喺廳中間喇，而且一入屋就一覽無遺喺英國係比較少見嘅，通常D屋都有個玄關位，放吓鞋櫃，放吓外套咁，萬母自己都prefer有呢個位嘅，起碼出完街嘅污糟野可以全部放晒喺呢個dirty area。

方法二： 做side + rear extension(wrap-around extension)，因為呢間係排屋尾，除左可以將間屋向花園擴建3米之外，亦可以向旁邊擴建，變相擴建一個L型，萬母計過數，如果做左擴建，可以多百幾二百呎，但問題係要花錢，花心機，因為一攪地下擴建，地下成層嘅間格會重新規劃，連個廚房都要重新整，做得好應該會好好用，好好住，但就要花D腦汁喇。

呢間屋嘅花園都係長長嘅，所以就算做左rear extension，花園少左3米，都仍然有好多空間，現手業主喺花園尾整左個summerhouse，仲申請緊permit將summerhouse改做garden office，咁兩者有咩唔同呢？最主要係建築嘅方法同材料有唔同，summerhouse冇insulation同通常冇駁電，所以只適合夏天用，或者當儲物室，而garden office(garden room)有insulation，有double glazing，有電，一年四季都用得，可以當普通一間房用，咁當然喇，建築費都有分別喇。

萬母曾經認為整rear extensiono會簡單過loft conversion，因為喺地面好容易想像到多出嘅面積有幾大，但喺閣樓就難估計(起碼以萬母現時嘅功力估唔到)，但朋友有另一種睇法，佢覺得整loft conversion時，仍可以住喺屋入面，只係少少影響生活，但如果整rear extension，好多時都會成個地面規劃過，連廚房都重新裝修，咁樣就會煮唔到飯，住唔到人，所以已入住嘅人如果想增加居住空間，通常都情願攪個閣樓(loft conversion)都唔攪個地下(rear extension)，呢樣真係唔講都考慮唔到。

記開學次週

開學第2個禮拜，小妹仍然好享受學校午餐，特別係甜品，每日唔係食啫喱就係雪糕，小息亦都係玩到癲晒，但其實萬母好開心聽到佢哋小息同同學一齊玩得好開心，咁起碼證明已適應一半校園生活，咁小息有咩玩呢，小妹話會一邊玩包剪揼(rock-paper-scissors)，一邊跳飛機(hopscotch)，仲會玩granny's footsteps(即係紅綠燈過馬路要小心)，原來無論咩國家嘅細路，玩嘅遊戲都係大同小異。

香港學生嘅書包重過石頭已經人所共知，雖然學校成日攪咩書包減重計劃，但減嚟減去仍然係石頭一舊，咁英國小學生嘅書包又裝咩架呢？

1. 水壺: 學校講明每人要自備水壺，要寫好名嘅，聽聞呢邊係唔興用保溫壺，但因為膠水壺仍未到步，所以萬母都照俾保溫壺小妹們帶返學。

2. 食物盒： 帶食物盒返學，唔係要pack lunch返屋企，係學校建議帶水果返去食，萬母起初詐詐帝，塞包餅俾小妹就算，但小妹返嚟投訴話係要帶水果，所以每朝萬母都將水果入盒，可惜無論萬母pack咩水果，佢哋小息都係掛住玩，D水果都係等到返屋企先食，到星期尾，小妹直情叫萬母唔駛再準備水果喇，因為佢哋小息好忙，唔得閒食水果咁話。

3. 縮骨遮： 其實除左水壺，其他都唔係必須要帶嘅，只係呢邊天氣幻變，呢頭出太陽，轉頭即落雨，跟手又見太陽，小妹都話曾經喺學校見過彩虹，所以放定把遮以防萬一。

4. 紙巾，濕紙巾，搓手液： 呢D都係以備不時之需，小妹話學校周圍都有搓手液，好方便。

5. 筆袋： 本來學校係會提供文具，但因為一個肺炎，攪到天下大亂，而家要自備文具，鉛筆，擦膠，間尺，顏色筆，marker，個筆袋係長期放喺學校個tray，唔帶返屋企嘅。

所以，除左水壺之外，書包其實係無野要帶嘅，小妹們揹咁大個背囊只係因為當初帶咗呢個背囊上機，其實拎個袋仔入到水壺就夠，甚至將水壺夾喺胳肋底，兩手揈揈返學亦可。

根據小妹們形容，佢哋課室門口嘅走廊係有一排掛鉤，貼好晒名，佢哋要將自己嘅書包同大褸掛喺課室門口，而水壺就放喺課室指定嘅basket入面，全班學生嘅水壺放埋一齊。

又係因為個肺炎，老師會喺課室開窗，令到空氣流通D，但小妹話有時會好凍，但老師又唔准佢哋喺課室著大褸，可能因為個個件大褸都唔同顏色，唔統一喇，所以萬母另外預備咗件深藍色抓毛外套俾佢哋喺課室入面著。

間間學校嘅要求都會唔同，如果到步前已經有學校收咗，最好上學校網頁睇吓有咩特別要求，好似萬母喺離開香港前已經知道要自備文具，就嗱嗱臨叫小妹們執番個筆袋，唔好拎去寄船喇。

Red Nose Day

英國有好多乜Day物Day，萬母唯有見day拆day。

咁呢個Red Nose Day又即係咩呢？呢個係一個籌款日，係為貧困兒童籌款，希望令到佢哋安全，健康，能受教育。亦希望籌款之餘，能透過娛樂為人帶嚟歡樂。

https://www.comicrelief.com/rednoseday/

先前去超級市場時，萬母已經見過Red Nose Day嘅宣傳banner，原來學校喺呢日都有活動，就係便服日，學生可以打扮成唔同嘅superhero返學。為左小妹們可以融入校園生活，廿四孝嘅萬母當然為佢哋準備喇。

本來同小妹們上網揀好frozen披肩，點知喺活動前一日，小妹突然話唔想扮superhero，唔想著披肩，真係女兒心海底針，而咁啱又收到email話delivery出左問題，送唔到貨，要安排退款咁話，有冇咁啱呀？個天都幫我慳番D錢呀？!

小妹話唔要扮superhero，但想要個red nose，係同學向佢介紹，超級市場賣嘅小公仔可以放上個鼻度嘅，於是萬母就去超級市場買red nose喇，個大人size red nose夾唔到小妹個鼻，但希望佢返學都能同同學玩得開心喇。

無此人

喺香港如果收到D唔關事嘅信，我哋會喺信封面寫"無此人"，然後掉落"誤投郵箱"。

嚟到呢邊都不住收到前租客嘅信，初初唔知點處理，後尾專登去郵局問，郵局職員教我哋畫走信封面嘅地址，然後寫上"Return to sender"，再掉入郵筒就得。

雖然只係少少嘅動作，但就解決我哋一個困擾。

英國超市常見藥物

雖然喺出發前已經搵家庭醫生開定平安藥，又買定D平時食開嘅成藥，但存貨始終有用完嘅一日，又冇可能吓吓要人喺香港寄嚟，所以點都要學識喺英國買藥食。

多謝醫生朋友教路，以下為醫生朋友提供嘅資訊。

Panadol 退燒

Ibuprofen 消炎止痛，退燒

Loratadine / Cetirizine 抗敏，收鼻水，止痕

Loperamide 止痾

Buscopan 止肚痛

兩大超市嘅藥物品連結，常用藥物基本上喺超級市場都買得到，但如果要醫生處方嘅就唔可以隨便買喇。

https://www.tesco.com/groceries/en-GB/shop/health-and-beauty/medicines-and-treatments/all

https://www.sainsburys.co.uk/shop/gb/groceries/health-beauty/medicines---healthcare

其實除左超市，boots同superdrug都係大型連鎖店，類似香港嘅萬0同屈人寺，除左藥品，護膚品，化妝品都有得賣。

https://www.boots.com/

https://www.superdrug.com/

萬母因為有個壞左嘅鼻，所以抗敏藥係常備藥，今次喺tesco買左loratadine，買完先發現savers平一半，呻晒笨。

萬母發現藥盒上面有D凸嘅點點，睇清楚原來係盲人用嘅點字，英國人真細心，咁都照顧得到，抵讚。

戴番個頭盔先，對藥物敏感嘅話，記得問咗醫生先買藥，細路仔試新藥都係問過醫生穩陣D，如果食咗成藥，病情都唔好，就唔好拖喇，快D去睇醫生。

💰💰超市行情：💰💰

Tesco Hayfever/Allergy Relief 14S (Loratadine) £ 1.80

登記器官捐贈

萬母不嬲都認為自己冇用嘅野，就應該送俾有需要嘅人，所以幾十年前已經喺香港登記左器官捐贈。睇嗰張捐贈卡就知年代久遠。

嚟到英國，登記GP(家庭醫生)時，有一行俾你剔，是否願意捐贈器官，甚至所有tissue，萬母當然剔左佢喇，之後就收到NHS寄嚟嘅捐贈卡。

當有一日萬母返到天家享福時，希望我嘅器官可以繼續帶畀人希望。

如果你都願意捐贈器官，登記GP時記得剔埋，只係一個剔，好簡單方便。

睇屋記 (8)

呢間係一間871呎嘅terraced house(排屋)，係睇過咁多間最平亦係最細嘅。

地下有一個客廳，一個廚房同一個由儲物室改建嘅廁所，未做rear extension，地下應該可以向花園擴建3米。

一樓有三間房，一個浴室同一個廁所，所以一上樓梯就會見到5道門，個感覺都有D特別嘅。

個花園都幾長吓，差唔多22米，花園嘅尾部起左間木屋，花園圖片中間，被植物牆包住嗰度，其實就係木屋仔。

呢間木屋仔就係我哋去睇呢間屋嘅主因。因為網上嘅floor plan係冇呢部份嘅，但睇相又見到除左主屋之外，另有一間屋仔，間屋仔仲要有齊開放式廚房，廁所，客廳同睡房，絕對可以形容為麻雀雖小，五臟俱全，因為好好奇呢間屋仔究竟係咩東東，所以就去睇屋喇。間屋仔仲可以通過花園有獨立出口，唔駛經主屋，絕對可以係另一家人嘅居所，或是當airbnb出租，但合唔合法就唔肯定喇。

呢間屋樓高兩層，好明顯未做loft conversion，但究竟有冇得做，真係都有疑問，首先，同一條街同一座向嘅屋，全部都冇做loft conversion，究竟係大家都唔想做定根本冇得做呢？根據觀察，一樓嘅房同廁所近天花位置已經好明顯見到屋頂嘅斜面，咁上面仲有幾多空間？仲夠唔夠位做loft conversion真係要問過專業人士先知。

呢間屋嘅優點係平，缺點係細，呢句評語認真廢。

Mothering Sunday 英國母親節

喺香港，我哋都係慶祝五月嘅母親節，萬母仲仍然記得小妹第一年返學拎番嚟嘅康乃馨(雖然去到萬母手上已經斷成兩截)。

英國嘅母親節同香港嘅唔同，係計基督教嘅節期，大齋期(Lent)中嘅第4個星期日，今年係3月14日。

自從2月過左情人節之後，超級市場嘅裝飾就由情人節轉咗母親節，大一堆母親節卡同母親節禮物放喺當眼處。

母親節前一日，超級市場多左好多花束賣，亦都好多人買，菊花，鬱金香，百合應有盡有。

喺英國過嘅第一個母親節，萬母都獲得一盆玫瑰花，同三張母親節卡。

💰💰超市行情：💰💰

玫瑰花盆栽 £5

母親節卡 £1.5

手造卡 無價

#媽媽艾粒U

記開學首週

 喺小妹們開學前一晚，萬母交左4個問題俾小妹們去發掘答案。

1. 學校午餐食咩架？

2. 學校廁所點樣架？

3. 體育堂做咩架？

4. 小息有咩玩架？

第一日放學，小妹們已經急不及待話俾萬母知，學校午餐有啫喱食，好好食，主菜有pasta同cauliflower揀，佢地揀左pasta，因為同學仔話好味D，佢哋就覺淡左D，但都清左碟，除左主菜，仲有好多種蔬菜揀，揀食嘅小妹就揀左粟米，佢地每日最期待就係個甜品。每日放學佢哋都報告午餐食左咩，仲話次次都清到碟，可能係學校午餐實在太好食，或者係萬母嘅劣食實在太劣喇。

學校午餐每日£2.3，每次要交一星期錢，學校建議一食就成個term食，方便廚房預份量。

據小妹形容，佢地係排隊去cafeteria，再指俾廚娘知揀咩主菜同蔬菜，捧住D食物就自己揀位坐低食喇，食完就可以去拎甜品，甜品每日都有最少兩種揀，剛剛星期五嗰餐係食炸雞扒+薯條+雪糕，佢哋講到萬母都想一齊返學食午餐添。

小妹們講左件趣事俾萬母知，事緣佢哋有戴口罩返學，萬母亦準備定個保鮮袋，俾佢哋入住個口罩，當佢哋第一日食午餐時，拎個保鮮袋出嚟準備入口罩時，同學們都嚇左一跳，以為佢哋要打包D午餐返屋企，最攪笑係小妹倆嘅同學都有相同諗法。

第一日返學老師已經安排好bubby照顧小妹，bubby除左上堂時同小妹一齊坐，兩個人share一張長檯之外，仲會小息時同小妹一齊玩，連食午餐都一齊，萬母覺得老師嘅安排好好，bubby都照顧得小妹好好。

小妹話俾萬母知，每日有兩個小息，第一個係15分鐘，第二個係1個鐘(包埋午餐時間)，佢哋小息可以出playground/field玩，咁有咩好玩呢，可以拎波掉，可以玩追逐(香港嘅小學係肯定唔可以玩呢D)，可以坐定定傾吓計，又可以去草地搵花，總之就好多野玩，好忙。

呢個星期嘅體育堂教做體操同hockey，小妹喺學校學完返嚟，仲好熱心咁教萬母teddy bear roll，唔知咩係teddy bear roll就可以睇下面條link，萬母每次roll只能做個滾地葫蘆，將teddy bear roll做成dead tortoise roll，點都roll起唔翻身，有次仲roll到肚腩抽筋添，仲以為復左課就唔駛再上體育堂，點知......唉......

https://www.youtube.com/watch?v=TmXWhvNfNtA

外傳： 萬母除左復課前識左同校香港家長外，復課後喺學校門口都識到香港家長，而家全校最少有7個香港家庭，超過10個香港學生分佈各級。

我都做得到 - 蛋餅

睇台灣媽媽group，成日俾D蛋餅引到，喺香港都曾經揾到有舖頭做，喺英國真係唔知去邊搵，咁就即管試吓整喇。

上網搵食譜，原來都唔難。

麵粉80g，加少許鹽，雞粉，蔥粒，水160ml，攪勻。本來食譜話要太白粉，咁搵唔到唯有唔落喇。

有D食譜教煎時先加蛋，有D就加埋落麵糊度，兩種萬母都試過，可以睇吓鍾意食幾重蛋味就決定幾時加。

攪好嘅麵糊只要落鑊煎就可以，煎到變少少透明就可以翻面。

萬母試過薄煎，又試過厚煎(其實係唔小心倒多咗)，發現薄煎比較好食，香口D，而且煎時要有耐性，中火慢慢煎，心急開大火會變做炸蛋餅。

就係咁，一連試咗幾日，終於有D見得吓人，我都做得到-蛋餅-喇。

外傳：喺小妹復課前，萬母有晚同萬能生講，"嗱，我將會做實驗，唔理我煮咗D咩出嚟，你都要食晒佢，唔好嘥野"。小妹聽到之後好嬲，原來佢唔記得咗自己將要返學，以為自己有份做白老鼠，當佢自己咗之後，佢就安安靜靜咁繼續睇電視，面部仲流露出絲絲笑意添。

💰💰超市行情：💰💰

麵粉 £0.49/kg (特價，正價£1/kg)

蛋 £2.05/12隻 (large)

蔥 £0.37/100g

#萬母英遷

#烹飪攪攪震

留低這串鎖匙 - 配鎖匙

喺好早期曾經提過agent俾我哋嘅兩抽鎖匙，有好多都係廢嘅，兩抽共7條，其實都唔明點解會係單數，好明顯7條分2抽就已經有問題喇。

地下大閘只得一條鎖匙開到，大門有2條，大鎖又只得1條開到，結果湊埋只得一套鎖匙開到所有鎖。

我哋都曾經同agent反映D鎖匙唔對路，佢竟然答自己每條都試過，冇問題，條條都開到，但我哋憑肉眼睇都睇到有D鎖匙根本唔係配得唔好，係連D牙都完全唔一樣，又一次證明agent無論咩國籍都係唔可信嘅。

先前大部份時間喺屋企，得一套鎖匙嘅問題都唔算大嘅，但小妹們返學後，就需要兩套鎖匙，本來都想向agent繼續追討，但上次壞boiler其實都攪到有D唔愉快，咁我哋未搵到屋前，都唔想關係破裂嘅，所以就決定自己配喇。

見過Tesco extra門口有檔可以配鎖匙，問過配一條要£7。

咁又試吓上網搵喇，去google map search屋企附近嘅key duplication service，搵到大街有間舖頭有My Key Machine，自助配鎖匙，£10/3條，£5/條。

下面條link輸入postcode就可以搵到屋企附近邊度有呢D配鎖匙嘅機。

https://www.mykeymachine.com/

萬母又記起曾經喺土耳其雜貨店見過寫住配鎖匙都係£10/3條，所以就決定先去問吓配一條幾錢，結果係£3.99/條，咁佢最平當然就揀佢喇，土耳其雜貨店真係一間解決生活問題嘅舖頭，I like it。

#圖文不符

#圖為日出景

睇屋記 (7)

呢間係一間947呎，5房1廁嘅terraced house(排屋)。5間房得1個廁所，實在令人好好奇，究竟住客點住架呢？

地下有一個客廳同廚房，面積唔大，因為未做rear extension。

一樓係兩大一細房，另有一個全屋唯一嘅廁所。

二樓已做loft conversion，分做兩房，所以全屋共五房。

呢間屋嘅裝修都算新淨，但得1個廁所，如果要加廁所，就一定要攪裝修。

個花園適中嘅，唔大唔細(圖中白色屋係隔離屋嘅，影相時正維修圍欄)，但如果地下做左擴建，花園就會細左，花園尾尾有棵大樹，估計夏天唔會光禿禿嘅，咁如果樹葉跌入花園，就要由業主負責掃樹葉，但業主又冇權成棵斬左佢，只能夠修剪伸入自己花園嘅樹枝，所以做呢個花園嘅業主前，要考慮清楚係咪鍾意掃樹葉同剪樹枝。

二樓已做loft conversion，有房但冇廁所，agent話個loft storage有機會可以改建做廁所，圖2係loft storage嘅相，改建廁所唔係唔可能嘅，睇相都大致想像到個廁所嘅大細。

呢間都係一間ex-council house，所以屋價喺同區算係平D，當要睇餸食飯時都未嘗唔係選擇嘅。

咁如果要做rear extension大約要預幾錢呢？平至£15,000，貴至£60,000都有，視乎大細同質素，施工時間8至12星期。

https://www.priceyourjob.co.uk/rear-extension-cost/

呢間屋已改建閣樓，但未擴建地下，仲有間屋得1個廁所，如果要加多個浴室，大約要£2000至£9000，咁擴建費同浴室費都要加上去樓價再考慮清楚。

https://www.priceyourjob.co.uk/install-wet-room-cost/

登記做選民

登記做選民，原本係公民責任，但喺某D地區，呼籲人登記已經可以攪到一地玻璃碎。參選更加係死罪。

喺自由嘅土地上當然唔同喇。去下面個網站就可以登記。

https://www.gov.uk/register-to-vote

BNO holder揀British就合資格，當要入NI number時，如果冇，就直接表明"冇"，佢會要你解釋原因，只要賴因為冇漢肺炎攪到未拎到NI number就得。

之後會收到email問拎身份證明文件，只要交回BNO passport scan copy就可以。

交晒野之後就會收到正式電郵通知，登記成功，下次選舉就可以投票喇。

登記做選民，除左可以投票之外，仲可以增加credit score，credit score有咩用？當你租屋時，申請信用卡時，申請按揭時，......都會被查credit score，我哋呢D新居民一開始嘅credit score係零，要慢慢儲番D分數。

睇屋記 (6)

今次呢間係1448呎，4房3廁嘅end of terrace house，end of terrace house即係排屋嘅尾尾，一邊有屋貼住，一邊冇。

呢間屋睇floor plan時已睇到係長長嘅格局，地下有開放式廚房同飯廳，再加客廳同客廁。一樓有三房一廁，二樓有一房同一廁(連衣帽間)。

間屋嘅大細同位置其實幾啱我哋心水嘅，但就比較長，感覺要喺屋入面行好耐先去到尾咁，呢間屋其實都係新裝修嘅，但D裝修有D特別，除左個客廳有個維多利亞式嘅火爐之外，一樓有兩間房都分別有個維多利亞式火爐，全屋總共有3個維多利亞式火爐，可能萬母仍然用香港思維去諗野喇，只諗到咁多個火爐攪咩？分批BBQ？同埋有個火爐喺牆，其實限制左間房擺傢俬，如果將張床貼住個火爐擺，好似有D奇怪呢，可能呢個只係萬母嘅問題，本地人可能好喜歡嘅，只能怪萬母未識欣賞維多利亞式火爐。

呢間屋另有一樣怪野，就係一樓走廊中間有兩級樓梯，一講到樓梯應該估到萬母係諗起痾夜尿嘅問題喇。

後尾同朋友傾開發現，原來呢D長長嘅格局都幾普遍，特別係近大街嘅盤，通常都係長長嘅，因為人口密集D，間屋條地就細D，擴建後就變成長長咁。同埋就算幅牆冇火爐，仍會保留柱位，仲有走廊中間有樓梯都唔係罕見，所以萬母可能要改變一吓思維，否則揀10年都未必揀到心水盤。

萬母同萬能生講，如果可以將某屋搬到呢個位置就perfect喇，咁當然世事沒有咁完美架喇，我哋唯有繼續等完美嘅屋出現，如果世上係有呢間屋存在嘅話。

準備開學喇

呢日終於都嚟喇，小妹們聽日將會正式喺英國返學喇。

開學前有咩要準備呢，之唔係買校服囉，英國學校嘅校服好隨意，學校只要求買指定顏色，咩款都可以，而校服大部份都可以喺超級市場買到，先前喺超級市場見過好大堆校服，一路打算等到正式開學先買，點知，當真正想買時，就會發現選擇其實冇想像中咁多，唔知解釋要嘅款式同碼數偏偏搵唔到，明明之前見到一大堆，好多款式，成架都係。咁嘅情況都真係好常見，日常生活中成日都發生，明明覺得好多得揀，但真係要揀時就揀唔到，真係唔知點解架喎。

咁究竟學校要求學生著咩校服返學呢？間間學校要求嘅指定顏色會唔同，但款式多數都大同小異。小妹們學校嘅主色係藍色。

女仔

灰褲/灰裙

深藍色衛衣/冷衫

白色恤衫/polo恤

深藍色/灰色襪褲

黑色皮鞋

藍白格仔裙(夏天)

男仔

灰色長褲/短褲

深藍色衛衣/冷衫

白色恤衫/polo恤

黑色皮鞋

運動服

白色T-shirt

深藍色短褲/長褲

黑色plimsolls

行左幾間超級市場，再上埋argos網，終於買齊要買嘅校服，執埋書包，就準備好開學喇。

先前同校長zoom約會時，校長話已有幾個香港家庭入讀，萬母一直都希望等復課後嘗試認識呢d香港家庭，點知係機緣巧合之下，萬母竟然喺未復課前已經聯絡到兩個同校嘅香港家庭。

事緣係咁嘅，有一次萬母參加英國教會嘅升學講座，小組討論時，傾傾吓就發現其中一個參加者係同校家長，再透過呢位家長認識埋小妹嘅同班家長，就係咁，看似艱難嘅任務就攪掂左喇。

萬母先前係用下面呢個網站去搵教會嘅。

https://church.oursweb.net/

今晚要早早瞓，瞓飽飽聽朝返學去，迎接久別嘅全日制學校生活。

超市行情：

深藍色衛衣 £6/2件

深藍色運動褲 £10/2條

灰色西褲 £7/2條

黑皮鞋 £12.5/對

黑色運動鞋(黑飯魚) £0.99/對

敬畏耶和華是智慧的開端，認識至聖者便是聰明。(箴言 9:10)

遊公園 - 搖呀搖，搖到外婆橋

英國嘅公園有好多香港公園失去左嘅玩意，想喺香港嘅公園搵千秋同搖搖板會有D難度，但而家屋企附近嘅公園卻有齊，仲有彈床。呢D遊戲設施其實可以幫助細路嘅感統(感覺統合)發展，特別係前庭區，雖然小妹們已經過左最關鍵嘅發展年齡，但得閒去揈吓，去轉吓，點都好過冇嘅。

不過呢個公園就比較泥濘一點，而家萬母知道點解peppa pig咁鍾意muddy puddle喇。為了應付muddy puddle，我哋都專登幫小妹們買左wellies，公園入面嘅小朋友每人腳上都有對呢，真係去公園必備。除左水鞋，萬母仲買埋去污潔衣液添，muddy puddle即管放馬過嚟喇。

英國人口普查 - HongKonger vs Hong Kong Chinese

萬母終於都等到人口普查嘅信喇，急不及待上網填資料。

人口普查會問間樓/屋有幾人住，各人係咩關係。仲有係咩類型嘅住宅(flat/house/...)，有幾間睡房，中央暖氣嘅類型，租定買，家人有幾架車都會問。

跟住就逐個問個人資料，出生日期，打算喺英國住幾耐，種族，國籍，英文程度，宗教(optional)，性取向(optional)，學歷(幾多科A-level, GCSE relevant)，工作狀況，工時幾長，搭咩交通工具返工等等，呢D問題雖然煩，但只要如實作答就可以，指引話每人預10分鐘去填，而萬母就用左差唔多30分鐘完成一家嘅調查。

最緊要係以下3條要答清楚。

How would you describe your national identity?

可以選British，仲可以加選Other

剔左Other之後，會叫你自己enter，嗱，要小心選擇，HongKonger與Hong Kong Chinese係有分別嘅，萬母就揀左做HongKonger喇。

How would you describe your Asian ethnic group or background?

選Asian or Asian British，再選Any other Asian background

之後要自己輸入，冇得揀，萬母就打左HongKonger

What is your main language?

剔Other, including British Sign Language

之後係會搵到Cantonese嘅

呢3條問題對於香港人身份認同好重要，亦可以俾英國政府知道有幾多真•香港人住緊喺英國。萬母人微言輕，但相信積少成多，聚沙成塔，幾十萬個微人嘅言應該點都有D重量嘅。

收到信嘅記得要喺21/3前回覆，唔覆係犯法，仲會罰£1000架。

不但如此，就是在患難中也是歡歡喜喜的；因為知道患難生忍耐， 忍耐生老練，老練生盼望； 盼望不至於羞恥，因為所賜給我們的聖靈將神的愛澆灌在我們心裡。(羅馬書 5:3-5)