睇屋記 (8)

呢間係一間871呎嘅terraced house(排屋)，係睇過咁多間最平亦係最細嘅。

地下有一個客廳，一個廚房同一個由儲物室改建嘅廁所，未做rear extension，地下應該可以向花園擴建3米。

一樓有三間房，一個浴室同一個廁所，所以一上樓梯就會見到5道門，個感覺都有D特別嘅。

個花園都幾長吓，差唔多22米，花園嘅尾部起左間木屋，花園圖片中間，被植物牆包住嗰度，其實就係木屋仔。

呢間木屋仔就係我哋去睇呢間屋嘅主因。因為網上嘅floor plan係冇呢部份嘅，但睇相又見到除左主屋之外，另有一間屋仔，間屋仔仲要有齊開放式廚房，廁所，客廳同睡房，絕對可以形容為麻雀雖小，五臟俱全，因為好好奇呢間屋仔究竟係咩東東，所以就去睇屋喇。間屋仔仲可以通過花園有獨立出口，唔駛經主屋，絕對可以係另一家人嘅居所，或是當airbnb出租，但合唔合法就唔肯定喇。

呢間屋樓高兩層，好明顯未做loft conversion，但究竟有冇得做，真係都有疑問，首先，同一條街同一座向嘅屋，全部都冇做loft conversion，究竟係大家都唔想做定根本冇得做呢？根據觀察，一樓嘅房同廁所近天花位置已經好明顯見到屋頂嘅斜面，咁上面仲有幾多空間？仲夠唔夠位做loft conversion真係要問過專業人士先知。

呢間屋嘅優點係平，缺點係細，呢句評語認真廢。