寄家當，報ToR

要喺香港連根拔起，需要狠心斷捨離。我地將大型傢俬電器，賣得就賣，送得就送，掉得就掉，最後都要運走43箱物資

。當中有絕大部份係書，8/9成係童書，我地將淺白嘅英文圖書送晒俾人，留翻D深少少嘅，但中文圖書就差唔多全數運走，仲要臨走前買多D，買齊成個系列，因為希望小妹們就算離開香港都可以好好學習繁體字，雖然呢個任務會好艱鉅。

除左書，小妹們嘅學習檔案都入滿兩箱，玩具又係一大堆，D煮飯仔已經狠心地處理掉，但仲有好多毛公仔，隻隻都話要留，仲有森林家族一大堆，當然唔少得萬能生自己嘅玩具喇。

萬母帶得最多嘅係相簿同紀念品，以前學生送嘅紀念品/卡，拎出黎都係執翻入去，唔捨得掉，話晒呢D都係我人生一大紀錄，好可能以後都會離開呢個行業，當我老左時就靠呢D懷緬過去。

衣服鞋襪反而帶得唔多，因為我地冬天起行，厚衫已經要跟喼走，夏天薄衫就放入一大個膠櫃桶(一個5/6層嗰種)，跟住連衫帶櫃成個運走，到埗時呢個又變番做衣櫃。

家庭電器我地只係走小型嘅，電飯煲(朋友話UK只有最最最傳統嘅飯煲賣，所以我地就帶左隻走，喺飛機上面我見到人hand carry隻飯煲添)，保暖式電熱水壺(UK似乎冇呢種產品，雖然朋友話佢地已經冇再用呢種熱水壺，因為會積水垢，會塞會壞，但萬母係阿婆，需要長期飲暖水，所以最後都係帶左隻走，或者到呢隻熱水壺壞左時，萬母已經適應左另一種生活模式)，座地風扇仔，暖風機，咖啡機，吸塵機械人，仲有阿媽特別叮囑要帶嘅壓力煲同邊爐煲(似乎係名牌正野，但萬母真係唔曉)。

因為曾經睇過某KOL話床上用品要帶，所以就買左幾套床單被袋，但之後又有人話唔好帶，好嘥位，但既然買左就帶埋走喇，吸真空後入箱，年初因為萬母憂慮發作，好驚會俾人捉入駿洋邨凍死，所以買左張羽絨被，呢張係我地唯一帶走嘅被被，但其實我地到埗時天寒地凍，都一定等唔切張羽絨被黎，就要先買被舖，所以真係有D食之無味，棄之可惜嘅，any肥，羽絨被最後都係上左船。

講完執左咩入箱，就講搵咩公司寄家當，市面上好多呢D公司，最出名嘅當然係7記，我地都有搵7記報價，佢只用電話問價，要我地講有幾多物資，咁佢就報個價錢，但我地點評估自己有幾多物資呢？報價呢刻我地都未pack箱，所以我地又另外搵左C記公司上門報價，報價人員一入屋就話我地知佢同我地住喺同一大廈，~~世界真細小小小，小得真奇妙妙妙~~咁點報價呢？我地由門口一路順住間屋行一圈，就指俾佢睇，呢D帶，呢D唔帶，咁佢就一路mark，有D我地唔sure嘅，就話呢D可能帶可能唔帶，行完一圈，佢就話到我地知我地呢D物品大約幾多cubic feet，過多2日就用電郵報大約幾多運費，連optional同唔連optional分開2個價報。有左呢個cubic feet嘅數，就可以向其他公司網上/電話報價。

最後我地都係用左C記，因為佢包door to door，7記只包地面到地面，即係喺香港我地要自己將D家當搬到地下大堂，喺英國D家當只會搬到地下門口，唔包上樓，喺香港我地仲可以搵到外援幫手，喺英國如果我地住apartment要上樓梯(最後我都真係住左2樓apartment)，咁得萬能生一個要搬幾耐先搬得晒上樓呢？C記仲包埋幫你pack箱，但最後我地都係prefer自己pack，只等佢地黎封箱收箱，我地pack好晒，封箱收箱大約用左1個朝早(2-3個鐘)。由於D家當未到埗，所以解封家當要留待遲D先知咩情況喇。

寄左43個items，大約用左HK$28K，因為聖誕檔期再加上武漢肺炎攪到世界大亂，連D船都亂晒，呢個價比我地當初報嘅多左HK$5.6K。

執好家當其實未完嘅，仲有文件要處理，首先搬運公司會有保險要報，其實份表都係求其填嘅，因為我地嘅家當並冇咩特別貴重嘅名牌，只係平凡家品，所以個數量同價值都係萬母自己亂作一通，保險最低消費HK$1000，係物品價值X 2.75%，咁萬母當然利用已有嘅數學知識，將1000除以2.75%，搵到個總價就將佢分俾唔同類型嘅貨物喇。

搬運公司要求我地有ToR號碼，先肯幫我地出貨上船，其實申請ToR好容易，曾經有人話申請成個月都未批，咁我地就驚喇，未收箱已經申請喇，但唔駛1日已然回覆，未齊資料，唔批~~

咁究竟要咩資料呢？ 其實網頁有清楚講明嘅。

1. Apply for a transfer of residence申請表(上網填，填好print出黎，簽名，再scan翻)

2. Passport有相頁

3. 香港地址證明

4. 英國地址證明

5. Inventory list (即係D貨嘅清單，我地用左搬運公司收完箱後嗰份表，簽名，scanned)

齊左呢5份文件就email去，記得封email唔可以過6MB，所以scan時唔駛咁高解像度，一寄出email就會有auto reply，聲稱14個工作天內會處理好，我地嘅case係第二日已經批左，有TOR Approval Letter。D貨準備好上船囉~

https://www.gov.uk/....../application-for-transfer-of......