萬母本身唔係咩戶外人，喺香港都唔係成日去露營，嚟到英國更加從來未試過，不過今年小妹參加咗學校嘅愛丁堡計劃(DofE)，見小妹跟學校去露營，萬母又pat pat痕，不過由於公主病嚴重，我哋係book咗glamping，唔駛自己起營之餘，仲要有床瞓，不過枕頭被舖就要自備喇。
近近哋喺倫敦嘅Lee Valley過一晚，Lee Valley有好幾個營地，揀咗Lee Valley Caravan Park, Dobbs Weir，貪佢onsite有得釣魚。我哋揀咗Safari Tent，貪佢面積夠大，聲稱有兩間睡房，一張雙人床，一張碌架床，總共可以瞓到5人，仲有個小廚房，有餐檯，廚房有爐頭，不過冇水喉，餐檯好多螞蟻，所以我哋最後都係出咗帳篷外面食嘢。
營地有公共廁所，浴室同洗衫房，仲有洗碗房，都幾乾淨，reception仲有間shop仔，可以買補充品。
營地入面除咗有條河可以釣魚，係冇其他嘢玩嘅! 當初喺網頁睇話有disc golf，但原來要揸20分鐘車先到，所以我哋喺第二朝check out咗先去玩disc golf。
魚.....係有得釣嘅，但就冇魚上釣囉.....只釣到草同樹枝，不過都係一個體驗，喺英國釣魚要攞牌嘅，下次再詳細講。
以為小妹會好抗拒去露營，點知又okay喎，食完晚飯喺帳幕門口玩吓board games，大家都減少對住3C產品，呢點係萬母最滿意嘅。
去嗰陣撞正heatwave，以為會好熱，點知有風吹好舒服，入夜之後仲覺得凍，需要開暖爐添(暖爐喺營地包埋)，下次如果再去，都要揀heatwave先去，否則可能會凍死，下次試住小木屋，面積細D，但夜晚唔會被風吹到"發發"聲咁嘈。下次下次，唔知下次會係幾時呢?!
https://www.visitleevalley.org.uk/
