報學校, Council Tax

報學校要去Council嘅網站開戶口，再輸入地址，大人細人嘅資料，期間佢會問Council Tax Reference Number，所以又順便上網報埋Council Tax，Council Tax Bill會紙本咁寄上府上，而其他水電煤寬頻就多數係電子帳單，交Council Tax可以揀debit card自動扣帳，或者收單先交錢，亦可以揀一年分開幾多期交，好多唔同嘅選擇，click好晒就出左個3字頭嘅號碼，起初萬母以為會再有email confirm，點知等左幾日都冇，咁上網查過又見council tax reference number係3/4字頭，之後就膽粗粗用呢個number報學校喇。

個個council報插班都係唔同程序，有D council甚至要見到個細路真身先報得學校，所以以下程序只係萬能家嘅經驗之談。

1. 上Council網站開個parent account

2. 喺account入面加細路嘅資料，會問細路有冇SEN呀，停左學幾耐呀，同邊個同住呀等等

- council個網時不時死機，入左資料又唔係即時見到更新，起初萬母都有D擔心究竟攪唔攪得掂，但隔日又見到更新左喎

3. 我地區council容許插班揀3個志願，如果有位就入到，冇位就下一志願，3個志願都冇位嘅就派就近有位嘅學校，miss左嘅志願就排waiting list

神仙姐姐俾3個願望你，咁點揀好呢？

萬母根據council account報學校時嘅資料，揀左6間最近嘅小學，send email去學校問有冇插班位，其中5間都喺2日內回覆，有1間冇回音，5間回覆嘅學校有3間表示已滿，1間叫我地自己問council，1間表示有位，兩個年級都有位。

2間表示已滿嘅學校都係萬母嘅心水，當然亦係其他媽媽嘅心水喇，所以咪滿晒，但萬母都唔甘心，都決定放佢地係頭兩個志願，駁一駁，排吓waiting都好，而表示有位嘅一間就放第三志願，咁樣起碼唔會派左去唔知邊度。

喺council網站填完志願後，2-3日就收到回覆喇，第三志願學校收左妹妹喇，但家姐要再等多1日先有回覆，好奇怪明明一齊交表嘅，但出結果嘅時間唔同，不過好彩都係同一學校，方便接送。

收齊兩姐妹嘅offer letter，我地就跟指示回council話accept offer，然後再跟指示send email約學校見面，由於我地到埗時係學校長假，所有就約左長假後先去學校見校長喇。冇錯呀，報學校係唔駛面試架，有地址有位就收架喇。唔似得香港咁，未識行已經要去interview。

究竟見校長同小妹返學係點，就要遲D先有分解喇。

除左send email去問學校有冇位，萬母都有用以下網站去睇學校資料，收費版本係睇到學校有冇oversubscribed，而結果同問學校都幾吻合，呢個網站亦有其他資料睇，比compare school還詳細，而且可以分月俾錢，咁萬母只係交左1個月月費(6磅幾)，之後搵到學校就冇續喇。

https://www.locrating.com/

另外，某D宗教學校係需要交份Supplementary Information Form，入面係要傳道人/牧師簽名證明呢個家庭係有穩定返教會聚會(條件大約係過去2年每月最少2-3次)，如果要報宗教學校就要準備好呢D資料。

由於喺香港已搵到學校收小妹們，咁當然就要去學校網站爬吓文喇，大約知道學校嘅情況，著咩校服(喺香港件白恤衫, 灰校裙, 黑皮鞋都啱用, 我地就塞埋入喼)，又見到因為疫情，小朋友要自己帶文具，我地就跟要求執齊左先，再睇埋唔同年級因為要social distance要分唔同時間同門口返放學，兩小妹睇完之後，到埗後第一次去睇學校時竟然認得自己應該從邊個門口出入，萬母係完全唔認得嘅。

就係咁，萬能家又confirm多一樣野喇，希望小妹們喺英國學業愉快，腦袋能自由地發展，因為呢樣都係萬母決定英遷嘅一大原因。