從唔同途徑得知有呢個平台好耐，終於試一試喇，主要原因係覺得家中雜物太多，可以清一清。
呢個Vinted平台，有website有apps，係畀人網上交易嘅，可以放嘢上去賣，亦可以喺嗰度買嘢。
今次萬母以賣家身份分享，首先就係開個account，有咩想賣，就影相upload上去，加D description，再答幾個簡單問題，例如：牌子，新舊狀況，物料等等。
咁如果有買家睇啱買咗件貨就會通知你，運費由買家負責，所以郵遞公司都係由買家揀，賣家亦可事前選好自己方便嘅郵遞公司，有時可能耍print張shipping label出嚟，但大多數時候都係拎住個code去寄貨就得。
賣家要負責包裝好件貨，拎去寄，當買家收到貨後，滿意後/過咗冷靜期後，交易就會成功，賣家就可以喺apps收到balance，而呢D balance就可以直接入返銀行戶口變錢嘅，基本上賣家同意嘅賣出價會100%入到戶口。
聽到呢度係咪會懷疑，究竟個網站點賺錢呢？佢係會喺買家嗰邊收buyer protection fee，收件貨嘅3%至8%再加£0.30 至£0.80，所以賣家基本上可以算係免費上會，但包裝物料就要自備喇。
萬母花咗一個月時間，清咗兩格衣櫃，一格書櫃同半格廚櫃，清貨目標已經達到九成，一邊摷嘢上網賣，一邊好感恩，原來天父嘅供應真係好充足，有好多嘢塞咗喺櫃一年，甚至五年都冇郁過，原來所擁有嘅比需要嘅多好多，感恩感恩。擺嘢上網賣，萬母覺得係三贏，賣家清到貨，空間多咗，買家用心儀價錢買到心儀物件，而件物品又可以延續壽命，延遲去堆田區。
清完櫃有種輕鬆嘅感覺，一來個衣櫃唔會再山泥傾瀉，二來有位置又可以再買新嘢，不過執嘢時其實都提自己，下次買嘢時諗清楚究竟係想要家需要先。
萬母小貼士:影咗D相，feed畀AI，叫佢generate個vinted description，慳返好多腦汁。
https://www.vinted.co.uk/
