Combi boiler咩東東黎架?

第一次聽combi boiler係朋友代我地睇樓時，當時聽到combi只諗起嬰兒用品牌子

。

後尾陸陸續續聽到boiler(鍋爐)就開始去理解究竟呢樣香港冇嘅係咩東東。

原來boiler都分3大類：

1. Combi boilers

- size細, 適合細家庭，特別係只有一個浴室嘅

- 唔駛水缸儲水，較少喉管工程

- 即時加熱水喉水, 較慳energy

- 但同時間只能一個地方用水，否則水壓會減弱

2. System boilers

- 適合較大家庭，可同時支援多於1個浴室

- 水壓比傳統boiler強

- 比傳統boiler少一個冷水缸

- 但仍需要熱水缸儲水, 用完要等

3. Conventional boilers/regular boilers

- 適合較大家庭，可同時支援多於1個浴室

- 需要較多空間，要有熱水缸外，屋頂要有冷水缸

- 依靠熱水缸儲水, 用完要等

- 如果舊屋用開傳統boiler，更換相同系統會較平

就咁睇落combi boiler即熱即用，較適合心急人，但又要睇屋企大細，甚至原本嘅系統，租屋可能唔係咩大關注點，如果要買樓就要睇清楚間屋嘅boiler喇。

咁租樓關注D咩呢？當然係點用喇，安全渡過寒冬都係靠佢架喇嘛。之前係bnb住，間屋好暖，暖到有時我地要閂左個暖氣，第一日入伙新屋，比較之下就覺凍，攪黎攪去都唔覺暖左，甚至曾懷疑個暖氣系統係咪壞左，好彩仲可以打電話問朋友。

我地甚至將個溫度(圖1)較到上30度，但感覺仍一樣，朋友話我地傻，呢個溫度係指示個暖氣系統去到咩室溫時可以停，如果較到30度，個暖氣系統就唔識停(因為間屋冇可能去到30度)，咁樣做只會嘥GAS，月尾張GAS單會好甘。朋友建議呢個溫度較到20-21度就夠架喇。

咁咩原因間屋一直唔夠暖呢？問題可能喺個radiator(散熱器)度，每個radiator都有個獨立開關(圖4)，要先check check究竟開左未，廳嗰個有刻度好易睇，房嗰D冇只能擰完憑感覺去估。

仲有就係個boiler本身都有得較嘅，圖2最左嘅圈圈係暖氣系統嘅溫度，可調較，但如果較得太高溫，boiler嘅壓力都會大左，圈圈上面粒燈係表示當刻有冇用緊，有燈著即燒緊GAS，圖2左二嘅圈圈係代表水喉水嘅溫度，同樣如果著燈即當刻有加熱水喉水，最右面個錶係boiler嘅壓力，太高太低都唔好，當晚去到2.3已經算高，所以朋友叫我地唔好亂攪喇。

咁究竟咩事間屋唔暖呀？朋友話可能係太耐冇開，有D空氣儲左喺radiator入面，影響左佢散熱，咁點攪呢？有條匙(圖3)可以開到radiator上面嘅孔(圖5)，如果入面有空氣，擰開時會有氣同水噴出黎嘅。

當晚因為太夜，我地都冇去朋友度拎條匙，自自然然地過左1晚，成間屋就暖返喇，boiler嘅壓力錶都落返去1.45，可能真係太耐冇用未warm up，感恩我地可以過暖笠笠嘅冬天，更感恩有朋友為我地解疑難。