認識萬母嘅人都知萬母係發冷西人，超級怕凍，喺香港11-12度時曾經著過2件羽絨返工，嚇親隔離位嘅同事。
當親友聽見萬母要搬去英國時，第一句係：嗰邊咁凍，你頂唔頂得住架？
um.......萬母都好驚自己頂唔住，仲要趁冬天先出發，個喼結果用晒黎塞厚衫，淨係禦寒衣物同暖貼都塞爆晒喼，結果黎到呢，好多都仲未用得著。
先講吓室內溫度，由於英國室內都有暖氣，喺屋入面係好暖好暖嘅，萬母呢種體質都只係著件薄heattect底衫加套薄搖粒絨家居服就得，比喺香港嘅冬天仲少左。
咁夜晚瞓覺又點呢？萬母好擔心瞓覺唔夠暖，未出發已上IKEA買定被被，揀12 TOG仲未夠，仲要加多張4 TOG，因為萬母喺香港係冚開3/4張被嘅，仲要用毯仔墊底，全虛時期係用埋電暖毯嘅，後尾先戒甩左；初時都擔心得2張被唔夠暖，結果呢2張被夠有餘，有時半夜仲會覺得熱熱地，要伸D手腳出去透涼添。(萬母而家已後悔送左羽絨被上船，早知就送俾香港嘅屋企人喇。)
咁出街又點呢？呢個星期室外都keep住-1至5度，萬母每次出去都會著heattect+衛衣+薄羽絨+厚羽絨，腳就著heattect+厚褲，可能大家覺得好誇張，但其實萬母喺香港都係著到糉咁嘅，唔係特別多左好多，唯獨手指同耳仔真係會覺得凍，所以怕凍嘅萬母係戴埋手套同冷帽嘅。
如果你俾萬母嘅裝備嚇親，請記住萬母係發冷西人，喺香港已經比人著得多，黎到英國其實只係多左手套同冷帽。帶黎嘅厚heattect，暖貼同雪靴都仲力保不失，可知情況並唔係太壞。
身體上嘅凍點都仲易攪過心中嘅寒，身體覺得凍都仲可以著多件衫，睇新聞睇到心寒，萬母真係解決唔到，只能祝大家在亂流下平安。
沒有留言:
發佈留言