地方咁大又人生路不熟，究竟揀邊度落腳好呢？
人人都話去曼徹斯特(Manchester), 係咁真係咁好呢？
萬母從未去過英國，但根據兩個原則揀地點落腳。
1. 萬能生有工作機會
2. 小妹們有心儀學校
根據原則1，我地鎖定倫敦附近地區，方便萬能生去倫敦返工。
根據原則2，曾經睇過唔同地區，排名不分先後。
Richmond, Surrey
Finchley, Barnet
Reading, Berkshire
Kingston upon Thames, Surrey
Slough
Oxford, Oxfordshire
Saint Alban's, Hertfordshire
由於兩小妹已經讀緊小學，過到英國只能插班，而有位俾插班生嘅必定唔係特別受歡迎嘅學校，如果唔明呢個原理，可以試吓咁諗，新移民剛剛黎到香港, 有冇可能有位插入喇叭仔或瑪利女呢? 當然係冇可能喇，咁我地黎到英國想入嘅受歡迎小學亦理所當然地滿晒， 冇位收插班生喇，所以萬母揀學校主力係睇心儀中學，至於小學只能隨緣。
至於點睇學校好唔好，萬母主要睇以下網頁。
學校會有視學報告，有好多人提過，有D報告係10年前，資料未必準確，只能參考。視學報告入面有好多野睇，包括多唔多學生係SEN，多唔多學生受政府資助，少數族裔多唔多，英文非第一語言的學生多唔多，長期缺席嘅學生多唔多，學校有咩特色等等。
呢D資料唔同人有唔同嘅理解：
SEN學生：有人會介意學校多SEN仔，但另一角度就係學校包容性會大D
政府資助：貧窮家庭要花多D時間心力去搵錢，照顧仔女嘅心力順理成章會少D，但屋企冇人理又唔代表個細路一定曳嘅；如果本身唔係富貴，同成班有錢人仔女一齊又可能有另外嘅問題。
少數族裔/英文非第一語言：其實我地黎到英國，自己已經係少數族裔，有人覺得學校多少數族裔，歧視問題會少D，亦有人覺得白種人多D會快D融入。
長期缺席：多學生長期缺席即係學生返學唔多開心，某程度上學校需要負D責任，當然亦可能係家庭問題導致。
英國有個叫11+的升中試，考左先可以報Grammar School(萬母理解為學術較好的中學)，但由於小妹們仲有時間先升中學，而萬母睇過嘅幾間Grammar School，印度人同中國人都特別多，原因係可能呢兩個國家特別多虎媽，萬母又唔想小妹讀書競爭太大，所以暫時都冇特別去考慮Grammar School，或者等安頓左再研究。
另外有家長會問，究竟我仔女去到英國邊咩年級，香港嘅學校係用12月31日出生作分界線，但英國係用8月31日，而英國足5歲就讀Year 1，所以有可能小朋友(年頭/年中出世的中大B)去到英國會跳左班, 而年尾出世的細B就會照舊讀同一級。如果都係唔明，其實好多council嘅webpage都有講。
當揀定左落腳地區，就可以繼續下一步~搵屋喇。
沒有留言:
發佈留言