自從放售香港間樓，有人上門睇樓後，兩小妹就開始發現萬能家的搬屋大計，不過佢地都有D擔心，賣左香港間樓，會唔會冇地方住，要瞓街呢？佢地不停咁追問會住邊~~
首先，真係要感恩嘅，係我地成功放售，唔需要擔心喺英國要交稅嘅問題，萬母曾經睇過，如果到埗左半年先賣香港層樓，係要交物業增值稅，自住單位有幾個月免稅，詳情請自行了解，因為我地最後都係決定放左層樓先。
感恩係因為我地趕得切喺離港前完成所有程序，層樓最後喺我地飛前3日交吉俾新業主，真係時間啱到呢~
再感恩係我地離開香港前嗰一星期有娘家收留，都係"有媽的孩子像個寶"，因為疫情期間就算去住酒店都係會擔心嘅，始終都係娘家好。
先前提到揀落腳點嘅原則，最後我地反覆咁思量，終於揀定左，近倫敦(zone 4)，有心儀中學，最緊要係近朋友，有照應的落腳點，揀好落腳點就要認真咁睇樓喇，好彩而家科技發達，睇樓同租樓都可以網上攪掂。以下係兩大睇樓網站，萬母自己就主要用rightmove多，無咩特別原因，只係睇開就睇嗰個。
由於職業關係，萬母對學校都有D要求嘅，所以就主力睇心儀中學附近的盤(先前提過，小學插班，冇得揀咩心儀唔心儀，要有位剩先輪到我地呢D新移民，而中/小學入學派位，主要鬥住得近，所以今次揀近中學的盤)。
英國除左有house，都有apartment嘅，住慣香港蝸居，應該唔會介意住apartment，但當然都會嚮往住花園屋，小妹定左好多要求架，又話要有花園，樓梯，露台。最後通通都達唔到，因為我地只租左間apartment。
以下係流程(係我地嘅例子，只供參考)：
1. 到埗前3個月嘗試聯絡agent，被告之太早喇，遲D先喇
2. 到埗前1.5個月再發功，先喺rightmove睇盤，睇啱心水就直接喺網站按"request details"，入去要剔埋"To view a property"，我地喺message度註明自己的情況，例如：新到埗，未有工作，未有credit check，但願意俾定6個月租金等等。通常d agents 1-2日內都有回覆，仲要多數係電話，由於時差，佢地打黎時，多數已經香港時間晚上11點，所以都曾經miss左call，不過佢地多數都跟手send個email話試過聯絡但冇人接電話，要求回覆嘅，咁我就覆返email話"唔好意思, 因為時差miss左call"，咁佢地通常都好醒，下次會早D打黎，佢地朝早開工即係香港嘅收工時間。
3. 終於啱時間喇，接通電話喇，佢地嘅問題都大同小異，問：
- 心儀地區
- 財政預算
- 住屋要求(要幾房呀，嗰類)
- 幾多人住(細路幾歲都問埋)
- 做咩職業
咁我都喺電話重申一次自己的處境，冇工冇credit check，但願意topup 6個月租金，傾完電話，佢地通常就可以轉用email/whatsapp繼續聯絡
4. 聯絡左幾個agent，終於有我地心儀而仍available嘅租盤，以下係成功經驗的流程，我地真係要感恩，租樓快過打針
9-11 Nov 見到個租盤，即搵朋友代睇樓，睇啱就即日出offer
- Agent要求我地填份表，俾D個人資料(passport 有相頁)，仲要上網站填credit check (要交bank statement)
- 朋友代睇樓時，特別幫我地留意個boiler，係咪即熱式，定要等煲好水先有熱水用
- 窗係咪double glazed
13 Nov Offer Accepted
- 由於我地冇UK job offer，業主要求我地交埋香港嘅職業證明，證明我地所聲稱之職業係真嘅
16 Nov Offer Confirmed
- 簽租約都係網上完成，18頁嘅租約，滿曬雞腸，睇到頭暈暈，但都要認真睇
- 我地交左6個月租金+5星期deposit，再做埋每月自動轉帳，證明我地好有誠意
- 由於我地冇工做，業主有D擔心我地6個月後冇錢交租，所以加左個break clause，過左頭6個月，雙方都可以2個月前通知終止租約，其實都係好事，本身份租約鎖死2年(算係長約)，而家有break clause都方便我地睇啱買盤時可以退租。
個租約喺我地到埗前2星期已生效，有人會覺得我地立2星期空租好唔抵，但定左地址，之後好多野都順利好多，本來我地想請朋友代拎鎖匙，打算早D收傢俬，但agent要見到真人先交得鎖匙，所以我地最後係一到埗，放低行李就去拎鎖匙。
定左地址，下步就有好多野可以做喇~
1. 報Council Tax
2. 水電煤，寬頻
3. 報學校
4. 報ToR，寄家當
5. 訂傢俬
我地一訂左機票就已經租定bnb，因為未租到樓又唔肯定幾時先租到，所以我地book左1星期+1星期，打算睇情況再加碼或取消，結果bnb屋主竟然打黎問我做咩租得咁奇怪，唔係一次過租兩星期，咁我都如實作答，話如果搵到樓就取消架喇，佢又再三confirm第一星期係咪肯定會租嘅，應承得佢我地就唔會反口，所以最後我地住左一星期bnb，用呢個星期打點新屋，之後再正式入伙。
沒有留言:
發佈留言