買傢俬

我地租嘅apartment係partly furnished，即係包左少少傢俬，包左咩呢？就係廚房嘅廚櫃，煮食爐，焗爐，雪櫃，冰櫃，洗衣機，洗碗碟機，熱水爐，主人房嘅入牆衣櫃，客廳嘅入牆書櫃同梳化一大張。

因為想到埗後盡快入伙，我地就決定越洋買傢俬，呢個時候當然就諗起IKEA，先去香港嘅IKEA試好D床褥枕頭，記低型號就上UK IKEA網購。

UK IKEA真係令萬母有好多驚嚇，首先我地想到埗後頭幾日可以收傢俬，床鋪，而IKEA嘅大傢俬(床，床褥，餐檯櫈，書檯)同細家品(枕頭，棉被)係分開送貨嘅，而且日子未必相同，咁萬母就日日mon住睇吓幾時兩種貨可以同日送貨喇，D送貨期又變得好快架喎，明明幾個鐘前有期，幾個鐘後冇左，但再隔幾個鐘又出現番，簡直估佢唔到，終於等到同日出貨喇，但睇中左嘅雙人床冇貨喎，咁唯有放棄佢喇~

小妹們又特別指明要某種款嘅碌架床，咁萬母又幫佢地喺其他網站搜購，最終皇天不負有心人，終於三種貨就到同日送。

1. 碌架床+雙人床

2. IKEA枕頭被被

3. IKEA床褥，餐檯櫈，大人書檯(本來細人都睇中IKEA書檯，但佢地又要求多多，話要白色+藍色，但又唔知點解，HK IKEA有呢種色，UK IKEA冇，咁就算喇，諗住到埗後先再算，點知又係另一驚嚇)

明明定晒D貨係到埗後第三日到，連埋router, printer都同一日出貨，計畫好一日係收貨日，諗住好完美喇，點知人算不如天算，一落機就收到email話IKEA準備送貨喇，唔係馬.......我地連鎖匙都未拎，咁唯有嗱嗱臨上網叫佢change delivery date喇，router又係早左幾日到，摸門釘後要再安排取貨/送貨，amazon買嘅printer又係，連續送左3日貨先收到，仲要個amazon戶口要用香港電話號碼先認證到，但又收幾十個SMS都攪唔掂，想再約期都約唔到，幾驚佢發脾四掉左個printer喺街，唔再送貨。

終於到左送貨日喇，朝早6:30收到email話IKEA 9點前會送貨，好彩萬母係早起鳥兒，亦好彩我地bnb同租嘅樓好近，當朝萬能生有zoom meeting，萬母就單人匹馬去新屋收貨。

點知去到大閘發現D鎖匙開唔到嘅，原來兩抽鎖匙只有一條開到大閘，攪左一輪，拎番兩抽鎖匙黎試，有D鎖匙只係虛有其表，根本冇用嘅，大門其中一個鎖又係得一條鎖匙開到，鎖匙呢家野我地都仲同agent追究中。

終於入到屋喇，對講機即響，貨已到，一早都知因為疫情，D貨只會送到門口，唔入屋嘅，4個人嘅枕頭被鋪分左兩個大紙皮箱，送貨員送左一個到門口，跟住話仲有一個喺downstair，咁萬母以為佢會落去拎埋上黎，咪答OK囉，點知過左2分鐘冇晒動淨，沿樓梯望落地下，樓下只有一個箱，個人已經走左佬，唔係馬.......萬母望住樓下個箱，心裡諗左好多野.......點算好？等萬能生開完會過黎搬？但塞住個出入口喎，因為唔想未入伙已經變得乞人憎，萬母唯有出手，將個箱搬上2樓，上到樓先發現個箱寫住10.3kg，平時連包米都搬唔到，竟然搬到個10kg嘅箱上2樓？！簡直係大奇蹟，可能當時有天使喺旁邊扶住，只係睇唔到。

等左一輪，終於又等到第二輪IKEA貨到，今次係傢俬，好彩今次件件都送到門口，但萬母都要將佢地由門口搬入屋。收貨日，最後都收齊要收嘅貨，連printer都順利收埋。

英國買傢俬係唔包安裝嘅，呢個咁重要嘅任務當然交俾萬能生喇。砌傢俬都砌足幾日，終於喺入伙日前砌好D床，有床瞓喇。張碌架床配件奇多，相中只係砌好個框，有得瞓先。

先前提到小妹們嘅書檯，UK IKEA真係冇佢地要嘅白+藍，咁佢地最後都退而求其次，要純白色，但IKEA送貨要收服務費£40，當初越洋買傢俬就焗俾佢賺，到左埗就當然想慳番呢筆，揀click and collect喇，由於一到埗就Tier 4，就算網購自取都係要分流，想揀附近分店取貨唔係日日有，要同人搶，終於有晚俾萬母等到最近分店有time slot喇，咪嗱嗱臨俾錢囉，因為車尾箱唔夠位，仲要分開幾張單，書檯一張，書檯上架一張，書檯櫈一張，諗住雖然煩，總算settle左，點知.........怪事就發生喇。

喺我地原定取貨嘅前一日，正前往超級市場入貨嘅途中，收到email通知書檯可取貨，咁我地打算入左貨食埋lunch先去喇，點知仲係超級市場未掃完貨嘅時候，又收到email話貨已取！邊個取左我D貨呀？

想send email去問，又冇email address，customer support又話放緊聖誕假，咁我地唯有直接去分店喇，呢度click and collect好得意，到左停車場就打電話提供貨單號碼，跟住就等SMS通知埋去取貨，我地打完電話等左20分鐘都冇消息，落車諗住去搵真人問時，未鎖車就電話響喇，話張單已取貨，咁我地就講番根本未取貨喇，佢又話要再查查，叫我地繼續等，結果前前後後等左一個鐘，最後被告之D貨係已取，仲問係咪我地email被人盜用左，分店幫我地唔到，叫我地去搵customer support，但customer support可能要Tier 3先開工喎。

結果喺執筆呢刻，我地都未聯絡得上customer support，兩張書檯都仍然失左蹤。