冇米落肚得唔得架？

由於我哋個電飯煲仍喺船上，所以呢個月都比較少食飯，偶然會喺超級市場買即食飯，如果用微波爐叮都還可以，但用焗爐焗嘅話就會變得好粉，幸好小妹們都唔一定要餐餐有米落肚，我地呢個月試左好多唔同嘅意粉/包類呢。

卡邦尼意粉係小妹們嘅最愛，我哋初初買好多即食卡邦尼意粉，又試過一樽樽嘅卡邦尼醬，然後萬母就挑戰自己整醬。

1. 煲一大煲水煮意粉

2. 將蛋白，蛋黃，加巴馬臣芝士粉撈勻，可以加埋少少忌廉

3. 將煙肉切成細條/塊，煎熟

4. 將煎好嘅煙肉加入蛋黃醬，撈勻

5. 將煮好嘅意粉隔水，加入醬料撈勻

試過用煮麵個煲黎撈，但因為太熱，D蛋黃醬會變一粒粒，用另一個煲/大碗會較滑。

除左卡邦尼意粉，肉醬意粉又係另一試點，估唔到真係幾易煮，連萬母第一次煮都食得入口。

1. 煲一大煲水煮意粉

2. 爆香洋蔥，加入免治牛肉，茄汁煮熟 (試過加埋車厘茄，可惜有人唔識欣賞)

3. 意粉上碟後，淋上肉醬就食得

懶惰嘅萬母除左煮意粉都要試吓懶人餐，就係漢堡包。

1. 用焗爐焗熟漢堡肉扒(兩面各10分鐘)

2. 將肉扒，芝士，生菜夾入包漢堡內，食得

下次可以試吓換成魚柳/雞扒，咁就可以變出魚柳包同雞扒包。

小妹們雖然係同一條腸出黎，但就各走極端，家姐話漢堡包好正，但肉醬意粉就yuck，阿妹唔要塊漢堡肉扒，只肯食包，但肉醬意粉就食完再添，兩條友仔麻麻煩煩，萬母心情靚時就玩一雞兩味，懶惰時只能迫佢地咩都要食D。

超市行情：

Tagliatelle Pasta (扁麵) £0.55/500g

蛋 £2.05/12隻

巴馬臣芝士粉 £1/50g

忌廉 £0.99/300ml

煙肉 £1.5/300g

Farfalle Pasta Bows (蝴蝶粉) £0.55/500g

紅洋蔥 £0.59/1kg

免治牛肉 £2.5/500g

車厘茄 £0.48/250g

茄汁 £2.8/910g

漢堡包 £0.9/4個

漢堡肉扒 £3/454g(4塊)

芝士 £0.9/200g(10塊)

生菜 £0.43/個

大屋搬細屋，唔見一籮穀？

就算唔係搬細屋，總之搬親屋都肯定會唔見籮穀，更加唔好講由香港搬到英國咁遠，究竟萬能家今次搬一搬屋，唔見幾大籮穀呢？計一計數先。

搬遷類(機票/BNB/船運) HK$60K

安居類：

6個月租金連5星期deposit £10000

TV licensing £160

Council Tax £170

電煤費 £70

水費 £160 (3個月)

流動電話費 £20

寬頻 £0 (Black Friday優惠，2年合約，頭3個月免費)

大型家俬電器 £2500

小型家品 £400

超級市場(食物及消耗品) £1000

交通類(買車及相關) £6000

呢度就係萬能家英遷一個月嘅駛費，HK$60000 + £20480 ~ HK$27萬左右

睇落都幾誇張，但有D駛費唔駛個個月俾嘅。如果估計番之後一個月駛費又點呢？

租金 £1400

TV licensing £16

Council Tax £170

電煤費 £150

水費 £55

流動電話費 £20

寬頻 £35

超級市場(食物及消耗品) £1000

交通類(油費+車稅) £150

衣物及家具消耗類 £204

Total: £3200

呢個只係萬能家嘅估計，豐儉由人，數字只供參考。萬能家認為就算籮穀幾大都好，都唔及支免於恐懼嘅豉油珍貴。

喺香港我地收開月薪，但黎到呢度，好多工都係用年薪咁計，重要納稅，望住個數字好難感受到究竟最後有幾多錢拎返屋企，以下網站可以幫到手，只要輸入薪金(以日/星期/月/年計)，再click click click，佢就會幫你計吓要俾幾多薪俸稅，同埋扣稅後嘅收入究竟係幾多，咁樣做預算就容易得多喇。

https://www.gov.uk/estimate-income-tax

外傳：圖為小妹們去超級市場買peppa pig magazine，小妹們細過有睇開peppa pig卡通，後尾嫌幼稚就冇睇，點知過到黎見到peppa pig雜誌又重新愛上，其實佢地係貪隨書附送嘅玩具，仲要mark喺月曆，要求期期追。

小妹向萬母解釋點解要期期買peppa pig雜誌時係咁講嘅：媽咪，你睇吓，學校而家教緊石器時代同維京人，peppa pig雜誌都係呀，係咪好好呢？

兒童汽車座椅

根據英國法例，12歲以下及矮過135cm就要坐car seat。至於坐邊種car seat就睇個細路嘅體重。

https://www.gov.uk/child-car-seats-the-rules

以上網站有清楚咁列明，仲有寫明應該用邊一group嘅car seat，而喺英國嘅car seat亦會註明自己係咩group，方便家長買。

以小妹們的身高/體重/年齡，佢地坐booster已經夠喇。

曾經我哋諗過船運兩個boosters過黎，但諗諗吓要等運到黎先有得用，未必等到喎。

而且如果打算租車用，租車公司收每個car seat每日£3 ，咁租10日個car seat已經要俾£30，超級唔抵呢。

咁究竟呢邊car seat咩價位呢？以booster為例，見過最平£5，Tesco賣嘅就£7，有背嘅car seat大約£15。

汽車用品公司網站

https://www.halfords.com/

睇埋價錢更加覺得唔需要山長水遠帶個car seat過黎。所以我地最後係喺香港放左兩個car seat，打算過到黎先再買過，但當同朋友傾計時，朋友話佢地啱啱有兩個boosters係spare嘅，就係咁，小妹們到步就即刻有boosters用喇。

其實神好愛萬能家，先前正當萬母猶疑緊駛唔駛買厚羽絨俾小妹們，定著兩件已有嘅薄羽絨時，竟然喺衣櫃頂搵到兩個fit size嘅厚羽絨，應該係多年前人地俾但又未啱著而被萬母收起左嘅。耶和華以勒！

你們看天空的飛鳥，牠們既不種，也不收，又不收積在倉裡，你們的天父尚且養活牠們。你們不比牠們貴重麼？(馬太福音6:26)

買車記~下集

接左chipimunk返黎，係咪可以揸車去遊車河呢?

咪住！仲有野未攪！

首先，要先俾路稅，無錯，又係稅。要交幾多路稅視乎架車用咩燃料同二氧化碳排放量係幾多。我地架車仔要俾£125/年。

https://www.gov.uk/vehicle-tax-rate-tables

交路稅只係依時執，上UK GOV網5分鐘就攪得掂。

買保險先係煩中之最。保險價錢就好似海鮮一樣上下浮動，仲要上落都幾大，今日同聽日唔同價，聽日又同後日唔同價，所以建議觀察多幾日，大約知道底價喺邊先好出手。

用國際牌加唔接受香港嘅NCB一般都要過£1000/年，所以打算買車嘅話，到步就盡快換個英國車牌喇，同埋申請定香港嘅NCB。

https://www.comparethemarket.com/

https://www.confused.com/

https://www.moneysupermarket.com/

以上網站可以比較唔同車保嘅價錢，另外記住去topcashback睇吓有冇得回贈，我地經topcashback可以得到£40 cash back呢。

最後萬能生係買左Aviva，盛惠£799/年，全保，接受香港NCB，所以要交香港文件證明。

但隔左一日，海鮮價竟然回落！！！

海鮮餐A： £799 + £168 (加個學神司機)

海鮮餐B： £572 (已包經驗司機+學神司機)

個海鮮價竟然差咁遠，好彩買保險有14日冷靜期，我地打去保險公司要求由餐A改做餐B，成功左！

攪掂晒，終於可以出車喇，但泊車點計數呀？喺英國嘅大型超級市場通常都有免費停車場，有D免1個鐘，有D2個鐘，商場就要收費，我地曾經去過一個商場收左£2/2小時停車費。

咁泊街又點呢？其實同香港一樣都係睇黃線，有黃線就一定唔泊得。某D屋門口有條driveway(即屋前嘅路面整低左，屋主可以喺屋前泊車)，咁阻住人地driveway當然又係唔得。朋友話council平時做野好慢架，但一提到違例泊車就好快手架喇。

至於條街有時會見到畫好一格格嘅泊車位，千祈唔好太興奮，因為呢D都係有permit先泊得嘅，嗰條街嘅住戶向council申請先有個e-permit，而且個permit有指明邊一區嘅(圖片右面黑左嗰舊本來係區嘅簡稱)。

咁阿chipmunk住喺邊呀？阿chipmunk係喺一條冇畫泊車位嘅街搵容身之所，而我地屋企樓下就係呢條街喇，每日阿chipmunk瞓嘅位置都唔同，睇吓嗰日近定遠，近的話我地喺窗望出去會見到佢嘅
。

戴返個頭盔先，以上係根據我地住嗰區嘅經驗講，英國咁大，其他區可能唔同架。

以上資訊由萬能生提供。

買車記~上集

喺英國冇車唔係唔得，但一家大細出外掃貨，始終有架車會方便D。

英國主要有3大類汽車： - 電動車(Electric) - 汽油 (Petrol) - 柴油 (Diesel) 但因為ULEZ (Ultra Low Emission Zone) in London，柴油車遲D無咩地方可行，所以萬能家就唔考慮柴油車喇。 網上有好多人話去歐洲緊係揸歐洲車喇，但朋友話日本車可靠，而且維修都唔費，所以萬能生就揀返香港揸開嗰個牌子喇。自動波同七人車喺英國都比較少選擇，棍波5人車比較多，但由於人生路不熟，為左專心應付路面情況，我地最後都係買左自動波5人車。 喺英國主要有3大sources去搵車： 1. 原廠approved used car 2. 賣車網 3. 車場，例如：Cargiant(倫敦大車場) 萬能生主要睇賣車網，因為原廠approved used car比較費(但有12個月保養)，而車場因為lockdown冇得親身睇車，但如果真係想睇車，可以俾訂金要求用zoom睇車，睇唔啱可以退錢，而zoom完又買左嘅話，都仲有30日refund期嘅。 https://www.autotrader.co.uk/ 去以上賣車網站，揀好品牌，車型，價錢，車場距離，就有一大堆車列晒出黎。 揀時要留意係咪private seller(私人賣車，非車行)，呢類保障會少D嘅，但就平D。 仲要留意架車有冇任何Cat(即撞車紀錄) Cat A： suffered severe structural damage (簡單黎講，爛到唔要得) Cat B： suffered severe damage that can't be repaired (個殼爛左，內部某D零件可以用翻) 以上呢兩種照道理都唔應該再喺市場上出現。 Cat S (Cat C)： suffered damage to structural areas of the vehicle such as the chassis or crumple zones (有得整，可以行得番，但要再過inspection, 所以免得過都唔好揀Cat S車) Cat N (Cat D)： suffered non-structural damage and can be repaired (撞到bumpers嗰類算係Cat N) 總之見到有Cat就要留心，特別係Cat S，千祈唔好貪平，買左手尾長就煩喇。 由於英國嘅車牌號碼係跟車而唔係跟司機嘅，所以用車牌可以查到好多野，包括架車以往嘅驗車及維修記錄MOT History(架車滿3歲就要年年驗車)，從中可以睇到以前架車衰過咩，前車主錫唔錫車等等。 https://www.gov.uk/check-mot-history 例如可能會見到架車曾經因為某D原因過唔到check： Offside Rear Stop lamp not working Nearside Front Obligatory mirror seriously damaged, affecting the rear view Nearside Front Tyre tread depth below requirements of 1.6mm Offside Front Brake pad(s) less than 1.5 mm thick 仲要check吓架車達唔達Ultra Low Emission Zone (ULEZ)要求，因為要保護倫敦嘅空氣質素，D車要達到ULEZ standard先可以喺呢個zone揸，去以下網站輸入架車嘅車牌號碼就查到架車達唔達標。 https://tfl.gov.uk/modes/driving/check-your-vehicle-35896 就係咁，萬能生好似揀老婆咁細心揀佢個二奶，終於揀左4個候選佳麗，因為lockdown，車場話要低調D，可以睇車，冇得試車，但就可以5日內refund，一般車行有3-6月主要部分保養(例如：引擎, 波箱, Brake, ...) 萬能生中午就確定邊個佳麗入選，用電話俾左£99訂金(將debit card資料經電話講俾對方知，好唔secure，但呢邊興嘅)，黃昏架車就送到黎屋企樓下，再即場俾埋尾數同簽文件。車行會負責處理過戶，過戶係免費嘅，DLVA唔收錢，大約10個工作天車主證明(Registration Certificate)就會寄到屋企俾新車主。 唔好以為買車嘅故事就咁完結，後續文件可能仲煩，想知點煩，請看下回分解。 以上資訊由萬能生提供。 #小妹們為它起名為chipmunk(花栗鼠)

香港車牌轉英國車牌

重要資訊：唔駛等185日，BNO holder到步就可以即刻換車牌

需要將香港車牌轉英國車牌，首先，你需要一張DVLA D1 form，呢張form係需要去郵局拎嘅，雖然網上話可以上網拎D form，但只限D2(lorry, minibus or bus)，D1只能去郵局拎，而且入郵局係要排隊嘅。

https://www.gov.uk/exchange-foreign-driving-licence

D1 form上面需要剔"To exchange my non-UK licence for a GB licence"，當然仲有個人資料，申報健康狀況，如果係BNO holder就免卻好多麻煩，例如：唔駛搵人認證你張相同唔駛寄passport正本。

D1 form上面要貼證件相，所以要一早準備好, 同埋要準備埋英國支票去支付£43。

咁除左填表同俾錢，仲有咩文件要交呢？

1. D1 form (可到郵局拎)

2. 證件相 (貼喺D1 form上面)

3. 支票£43

4. 香港有效車牌正本 (會沒收左嘅)

5. 香港駕駛執照細節證明申請書 (TD320) (超過10年牌建議拎埋，咁樣UK車牌就會寫番香港pass嘅日期做valid from date，否則只會寫附件張香港車牌的發出日期)

https://www.info.gov.hk/cgi-bin/forms/cframe.cgi?formnoinput=&keywordinput=&deptinput=TRAND&dept=

寄出文件之後，3星期左右就會收到英國車牌，上面會有相，名，地址，同埋考牌日期嘅，可以作有相嘅身份證明文件。

由於張香港車牌會被沒收，所以建議如果想一到步就租車揸，可以花少少錢拎埋個國際牌 (本身香港車牌可以喺英國揸12個月車)，同埋向保險公司申請定無索償折扣證明文件(NCB)就穩陣喇。

6. 國際牌

7. 無索償折扣證明文件(NCB)

去郵局拎D1 form係連埋回郵信封嘅，不過郵費自付。

最平嘅係2nd class, 郵費£0.66, 2-3個工作天到

其次係1st class, 郵費£0.85，第二日到

想穩陣可以揀Guaranteed next day UK deliver, 有簽收，但郵費就要£6

重申一次重要資訊：唔駛等185日，BNO holder到步就可以即刻換車牌架喇

以上資訊由萬能生提供。

https://www.gov.uk/exchange-foreign-driving-licence

足不出戶開戶口(英國篇)

上回講到萬母喺香港獅子銀行成功開到debit card戶口同外幣(港元)戶口，但就開唔到英磅儲蓄戶口。

咁到步後萬母又繼續解決呢個問題喇，因為獅子實在唔多乖，變左隻狗，所以萬母就研究其他英國銀行喇，上網查到英國最大嘅五間銀行分別係：

1. HSBC

2. Lloyds Banking Group

3. Barclays

4. Royal Bank of Scotland Group (Natwest, Ulster Bank)

5. Standard Chartered

頭4間喺屋企附近嘅high street都有分行，都算方便，咁就再上銀行嘅網站睇吓要開戶口要咩資料/資格，竟然俾萬母發現Barclays可以足不出戶就開到戶口，簡直係為宅人度身訂造呀！

https://www.barclays.co.uk/....../account-opening-and....../

開Barclays戶口嘅步驟：

1. download佢個app

2. 跟指示入個人資料

3. 用app影護照有相頁

4. 用app影自己嘅短片(跟指示讀幾個數字，將個頭擰去右邊再擰返正面)

5. 用app確定自己嘅所在地(地址) (記得開電話嘅"位置")

6. 跟住就要暫停一下，等銀行寄信上黎確認地址正確

7. 將信上嘅code輸入app，繼續入個人資料(做咩工，收入幾多)

8. 申請完成，之後等張debit card同pin寄到就得喇

整個程序，只係一個半星期，係用星期計，唔係用月呀！！！除左debit card，萬母仲成功喺Barclays開埋saving account添，全部都係喺屋企click click click就攪掂，最重要係萬母報稱自己係"homemaker(家庭主婦)"，佢都受我玩。

開到Barclays嘅saving，萬母都未甘心，決意再挑戰獅子仔，今次萬母孤注一擲地將自己declare為uk tax resident，咁樣就成功喺網上開到英磅saving，唔駛去分行，又唔駛打電話喇。

至於將港紙轉為英磅係萬能生負責嘅，佢話佢用TT rate呢個app黎睇匯率，而另有網友推介用transferwise 。萬母就唔多理喇，只負責做豬仔錢罌，同埋堅持我嘅錢即係我嘅錢，老公嘅錢都係我嘅錢呢個金科玉律
。