搬咗嚟英國幾年，基本上年年都有熱浪，2022年嘅40度都捱過，但今年係第一次見到紅色警報，有可能危及生命，真係好誇。
前兩年，年年都話要買冷氣，年年都話等冬天特價時買，年年冬天天氣凍時就唔記得咗件事。
今年5月第一個熱浪，熱足成個星期，熱到hihi，熱到夜晚根本瞓唔到，因為夜晚未退到熱，第二朝又熱過，變相間屋每日都累積D熱，間屋一日比一日熱，所以萬母好任性咁要求買冷氣，但要知道，一開始有熱浪，冷氣就變得一部難求，睇住個網頁話冇貨，已經叫佢notify me，但都要每日昅住，終於買到部移動式冷氣，趕得切喺呢次6月熱浪前收貨。
以往我哋會打開度花園玻璃門，等間屋通吓風，但要知道，通嘅風都係熱風，加上個天窗照頭曬，間屋簡直變咗個焗爐，人喺入面就變咗燒豬，等待焗熟。
今次我哋用另一策略，先搵反光布封咗個天窗(見圖)，的確係令到間屋暗咗，但起碼唔駛照頭曬，跟住就閂曬D門窗，唔畀外面D熱空氣入屋，落曬窗簾，就連平時冇窗簾嘅花園玻璃門，都用反光布封埋，唔畀太陽曬入間屋，間屋黑黑的，有少少basement feel，咁樣封曬，可以令到室內比室外低3幾度，但其實到最曬最熱嗰一刻，屋入面都係成30度，都係難頂嘅。
先前幾次熱浪，去到夜晚8/9點，室外已經會涼返，可以打開門窗通風，但今次去到9點都未係好涼，萬母只好喺朝早返學前，趁住出面係廿零度時，就開曬門窗，吹呀吹，幫間屋降降溫，但老實講，點降都好，去到晏晝，間屋又去返30度。
而部冷氣喺呢刻就大派用場喇，雖然只得一部，只有一間房可以涼，但起碼有個地方可以過冷河，過完冷河再繼續日常工作，係舒暢好多嘅。
而且夜晚間房都成30度，真係好難瞓得好，開咗冷氣，雖然係嘈D，但小妹表示瞓到，阿媽表示呢D錢抵花。
我哋開咗冷氣，間房都只係去到23-25度左右，係一個舒服嘅溫度，不過萬母有D疑惑，究竟大家買咗幾BTU嘅冷氣呢？而開咗冷氣可以令到房間去到最低幾多度呢？
沒有留言:
發佈留言