好物推介：失控的焦慮世代

呢本<<失控的焦慮世代：手機餵養的世代，如何面對心理疾病的瘟疫>>勁hit，所以萬母都忍唔住買咗本嚟睇。

先講吓簡介：

//《失控的焦慮世代》呢本書直擊現代人嘅痛點。作者指出，自從2010年代智能手機同社交媒體普及化之後，後生仔女嘅成長環境發生咗根本性嘅轉變——由以前「喺現實世界一齊玩」，變成「全天候被手機餵養」。

呢種「童年被網絡化」嘅現象，令青少年面對前所未有嘅同儕壓力、資訊過載同睡眠不足，直接引爆全球青少年抑鬱、焦慮同自殘等心理疾病嘅「瘟疫」。

書中唔單止分析咗問題嘅根源，仲為家長、學校同大眾提供咗具體嘅應對方案，教我哋點樣幫下一代擺脫屏幕成癮，重新搵返心理健康同真實世界嘅連結。//

本書比較似研究報告，有好多數據，所以需要時間心機慢慢睇，但亦都係一個好大嘅警惕，究竟我哋應該點樣對待互聯網同教養呢？睇呢本書其實真係會令到父母心慌慌，原來我哋為咗自己嘅方便，餵咗好多電子毒藥畀細路，不過本書都提出咗D建議，例如：

//書中針對家長、學校同大眾，主要提出咗 4 大核心行動建議去扭轉呢個焦慮局面：

1. 家長層面：延遲接觸屏幕

14歲前不使用智能手機： 唔好太早俾小朋友擁有自己嘅智能手機，可以用功能簡單嘅「無網手機」（dumbphone）代替，只作通訊用途。

16歲前遠離社交媒體： 嚴格限制或者禁止 16 歲以下嘅青少年開設社交媒體帳號，減少網絡欺凌同比較壓力。

2. 學校層面：打造無手機環境

返學「禁機」： 學校應該實施「全日無手機政策」，學生返到學校就要將手機鎖入儲物櫃，等佢哋可以專心上堂，小息時亦可以有真正嘅面對面社交。

3. 社會與環境層面：重拾現實世界的自由

還返「無人看管的玩耍時間」： 家長同社會要放手，俾小朋友喺現實世界中有更多無大人睇實、自由探索同冒險嘅玩耍機會，去培養佢哋嘅抗挫折能力（resilience）。

總結： 書本嘅核心觀點係——我哋喺現實世界過度保護小朋友（限制佢哋出街冒險），但喺網絡世界卻過度放任（由得佢哋獨自面對網絡風暴）。 應對方案就係要將呢個現象調轉過來。//

喺呢個世代，要全禁機真係好難，如果由青少年期先開始禁仲難，萬母屋企都有家規，手機只可以喺地下，嚴禁上睡房，廁所同飯檯都禁機，手機們有個"家"喺飯廳，但永遠佢哋都會靜雞雞離家出走，要萬母去搵返佢哋返屋企，tiktok晨早禁咗，係後悔冇禁埋snapchat同instagram，但真心好難，特別係當佢哋身邊個個都用時。

做人父母甚艱難，如果你有好方案，不妨分享，或者圍爐吐吓苦水都可以。

如果唔想睇曬成本書，好多youtube片都有介紹，ming仔講得幾生動有趣，可以都聽吓再考慮買唔買書睇。

https://www.youtube.com/watch?v=NFmKE7ZgeC4