睇牙記

嚟英國之前，專登檢查咗D牙先，所以到步後遲遲都未搵牙醫。

牙醫唔同GP(家庭醫生)，唔一定要喺catchment area入面先收症，只要佢肯收就得，但查實係好多牙醫都唔收新症，特別係NHS新症，萬母問過其他牙醫，有D話等年尾再聯絡，睇吓有冇新症位。

好彩最後都喺屋企附近搵到個牙醫肯收新症，不過就要排個幾月先睇到。

下面個NHS網站輸入postcode就可以搵到附近有咩牙醫，仲可以睇到其他人嘅comments，知道個牙醫多唔多負評。至於收唔收新症，就要自己打電話/寄email去問喇。

https://www.nhs.uk/service-search/find-a-dentist

第一次睇症，其實只係做普通檢查，牙醫主要係數吓有幾隻牙，望吓D牙就檢查完畢，小妹係18歲以下，所以費用全免，牙醫檢查完之後話冇咩大問題，只要keep住早晚刷牙，用大人牙膏，食少D朱古力同糖，一年之後再檢查就得。

萬母已經過咗18歲，又唔屬於其他受資助組別(例如：孕婦/長期病患，詳見附圖)，所以要自費睇牙，數牙仔加兩張X光片，總共£23.8，屬於NHS band 1 course of treatment(最基本)。本來預期會洗埋牙，或者要約下次洗牙，但牙醫話唔駛洗住。可能因為係用NHS patient身份，所以就簡單D，先前已經聽人講過NHS patient同private patient嘅待遇係唔同嘅。

牙醫叔叔問我哋上一次係幾時睇牙，喺邊度睇，我哋答咗"香港"之後，佢就問"香港係咪發生咗咩事？最近收多咗好多香港patient"，親善大使萬能生就同牙醫叔叔講呀講，仲講到去揀學校，考11+添。

下面個網站有列明NHS牙醫嘅3類收費同所包嘅項目，band 1 £23.8 (檢查，口腔護理諮詢等等)，band 2 £65.2 (補牙，剝牙等等)，band 3 £282.8 (假牙，牙橋等等)。

https://www.nhs.uk/nhs-services/dentists/dental-costs/understanding-nhs-dental-charges/

喺英國睇牙真係唔算平呀，用埋私家價睇仲貴，真係要小心保護牙齒先得，by the way，洗牙係搵Hygienist做deep scale/deep clean。