Finchingfield Lavender薰衣草園

英國薰衣草嘅花期係暑假，所以呢排好多薰衣草園打卡照，我哋都唔執輸，去翻轉薰衣草園打打卡先。

倫敦附近有幾個比較出名嘅薰衣草園，但我哋今次去呢個就離倫敦遠少少，細少少，呢個薰衣草園每日只賣25張入場券，我哋一行15人已經係majority。

因為要預早book飛，所以預唔到天氣，出發嘅時候落住大雨，大雨到連前路都睇唔清。

去到薰衣草園仍然落住滂沱大雨，由於太大雨，園主提議我哋先去附近嘅農場探動物，等晏晝天氣好D時再入園。幸運哋晏晝真係間唔時有陽光，雖然中間都時不時有雨，園主亦好細心，準備咗個大帳篷畀我哋可以休息，避雨，雖然天氣不似預期，但總算順利去到睇薰衣草園，剪薰衣草。薰衣草園嘅氣味比想像中清淡，絕對冇難受嘅感覺。

我哋去嘅Finchingfield Lavender，大小同價，每人入場費£5.13，呢個價錢已包一袋自剪嘅薰衣草。園主介紹佢哋有兩種薰衣草，一種紫色嘅係觀賞用，另一種比較灰色嘅可以食用，風乾後可以泡花茶或者整蛋糕，而且D香氣可以持續兩年，香氣淡咗只要用手捽一捽又會濃翻。

Finchingfield Lavender

https://www.finchingfieldcamping.co.uk/lavenderfarm

另外兩大薰衣草園

Mayfrield Lavender £4 入場，不能自剪薰衣草，要去舖頭買

https://www.mayfieldlavender.com/mayfield-lavender-farm/

Hitchin Lavender 大人入場 £7.53，細路入場 £5.91，自剪薰衣草 £3/包，要自備剪刀

https://www.hitchinlavender.com/

雖然天氣唔算好好，個田亦都滿地泥濘，但朋友講得啱，唔好畀天氣影響出嚟玩嘅心情。

剪咗4大袋薰衣草返屋企，我哋將佢分畀鄰居同親朋好友，將愛心同香氣傳揚。