留我做個垃圾，長留戀於你家

喺香港我地習慣每晚都會清垃圾，掉出垃圾房，但黎到英國就改變左習慣喇，我地喺呢邊住apartment係冇垃圾房嘅，垃圾要自己拎去屋苑嘅垃圾收集站度(見圖)。

先講講我地點發現呢個垃圾收集站，就係某天我地返到屋企樓下，見到有人拎住袋垃圾行去某個方向，轉頭就見佢行返黎，但係手上袋垃圾就冇左喇，所以我地唔駛四圍搵就知道垃圾站喺邊喇，而呢位人兄正正係我地嘅隔離屋。

掉垃圾要自己拎落樓，仲要天寒地凍，所以我地而家唔係日日都掉垃圾，改為隔日出門口時先帶埋垃圾落街，甚至有時幾日唔出街就3日先清一次。

咁屋企個垃圾桶要幾大先夠呢？我地個垃圾桶都係喺Argos買嘅，萬能生好多要求，又話要有蓋，又話要腳踏式，又話要膠質，結果Argos提供嘅選擇係由40L起，攞貨時見到隻40L垃圾桶覺得佢超大隻，仲諗過退貨買過隻細嘅，但原來40L只係剛剛好， 好彩冇拎去退換。

屋企嘅垃圾就由自己決定究竟清得幾密，咁垃圾站嘅又點呢？香港嘅屋苑朝朝都有垃圾車黎清垃圾架喎，喺英國呢邊垃圾車每星期只黎一次，以我地區為例，逢星期二先有垃圾車黎，所以掉垃圾時都要有公德心，要包好垃圾同埋確定個大垃圾桶係閂好蓋嘅。

喺以下網站輸入postcode就知道自己嗰區幾時收垃圾架喇。

https://www.gov.uk/rubbish-collection-day

住apartment就掉去垃圾站，咁住house又點呢？呢度家家戶戶門口都放有兩隻大垃圾桶，一藍(回收桶)一黑(垃圾)，有時仲會見到綠色(花園垃圾)，自己嘅垃圾就掉番自己嘅垃圾桶。

呢D大垃圾桶要經council買，新嘅藍色垃圾桶要£37.92，其他顏色同額外嘅藍桶都要£54.17，由於隻隻同款而價錢都唔平，所以隻隻垃圾桶都寫晒屋號，以免混亂。

我地住bnb時就係將垃圾掉去門口嘅大垃圾桶，有一日垃圾車收完垃圾之後，發現垃圾桶竟然唔見左，周圍搵時發現佢走左去隔離屋同D friends企埋一齊，住house嘅朋友可能每星期都要上演一次尋桶記。

超市行情：

超市有好多唔同大細，唔同款嘅垃圾袋，以下係用45L做例子。

Tie Handle Swing Bin Bags £1.50/20個