陪太子囡讀書

曾經一刻，萬母幻想送左小妹們返學之後，就可以享有半天的自由時間，可以四圍貢去認識社區，可以去試吓搭巴士地鐵，感受吓異國風情，可以去學煮餸學揸車，增值自己，可以去煲吓劇，重溫青春，但而家呢個如意算盤唔止打唔響，仲係粉碎左，皆因一個national lockdown，學校停課直至term break，即係最快2月尾先有學返......

冇得返學，但都要網課，萬母又重回陪太子囡讀書的境況，或者呢個係上天俾萬母認識吓英國嘅小學課程嘅機會喇，祂的安排必有原因。

喺香港我哋用過zoom，用過google meet，但過到黎又再學新野Microsoft Teams，老師好細心，因為lockdown左，我哋連去學校報到都未攪，只靠email同電話聯絡，兩班嘅老師都好詳細咁講解點login，大致上嘅運作係咁，每日要交D咩。

先戴定頭盔，以下分享只係小妹們嘅學校，不代表全英國嘅學校。

每朝早老師會同全班video call，講解當日有咩要做，有咩功課要交，同埋追吓功課(原來追功課呢家野係全球通行嘅)，video call大約20分鐘，跟住小朋友就要自己睇video/ppt(連結由老師提供)，睇完就做功課(worksheet)，功課係要即日喺網上交嘅。

每日大概上3大節，英文，數學同Wider curriculum，wider curriculum我會理解成跨學科，當中包括體育，科學，歷史，視藝，地理同西班牙文。每科都有功課要交，即每日3份功課。

當初小妹們黎英國前，萬母曾經話過佢地知，英國嘅小學係唔駛點做功課嘅，黎到佢地發現咁嘅情況，當然都稍有怨言，萬母唯有解釋：本來呢D係喺學校做嘅classwork，但而家冇得返學，留喺屋企上網課，咪變左homework囉，遲D返番學，就變番classwork架喇，希望係咁喇，其實萬母自己都唔想跟功課。

咁究竟呢D科係教咩嘅呢？

香港學生黎到英國應該覺得數學科係最易掌握嘅，Year 3嘅妹妹學緊睇鐘，Year 4嘅家姐學緊6,7,9嘅乘除數，佢地話係easy job。

至於英文科，第一日上網課，妹妹係學關於食物嘅3個形容詞：

nauseating

inedible

rancid

萬母見到呢3個字，眼都突埋，咩字黎架，見到seating，我以為關座位事架咋喎，點會聯想到同食物有關呢？！

好彩第二日課程變返正常，教receipt，重點係Adverbs of sequence，咁都正常D冇咁驚。

至於家姐嗰班，呢兩個星期都係為左篇scary story做作文準備，由target grammar(fronted adverbial同direct speech)到story plot，每日都做少少，目標係2星期作好一篇文。

wider curriculum有教關於石器時代，維京人，石頭種類，骨頭種類等等，萬母唯有邊陪讀，邊學習。

其實小朋友要適應應該唔難嘅，小妹嘅同學已經喺網上留言，話等復課後會帶小妹去認識學校，仲叫佢唔駛擔心會寂寞，因為班入面先前都有新同學插班，仲有2個香港同學添。咦，攪到萬母都好期待添~~