"可以hea的話，不會郁"係萬母嘅格言，能夠唔出街就開到戶口，對萬母嚟講簡直係喜訊。
先講香港篇：
萬母後知後覺，舊年暑假先去獅子銀行開premier戶口，去到分行先知要預約，當時職員問萬母"要開XX定YY呀？"，萬母一頭霧水，反問"有咩分別呀？"，職員答"我搵同事幫你"。就係咁，個幫我攪清XX同YY嘅同事唔覺意咁幫我開埋戶口喇。
開到premier就輪到離岸戶口喇，原來獅子銀行個網有得click嘅，咁萬母當然click過暢快喇，之後RM就打嚟，傾左幾句就經email send左個page嚟，入去入曬D資料，就攪掂，唔駛去總行交文件，連見RM簽名都唔駛。
不過click好晒後，足足等左一個半月，先收到張debit card，再等一輪先收埋個PIN，收齊野都未得，張卡要activate嘅，萬母當然想上網攪就算，點知開Online banking要有電話理財密碼，而呢個密碼要打電話去英國先攞到，咁唯有焗住打喇(打去香港premier hotline可要求轉駁去英國premier hotline嘅)，講完一輪雞腸終於成功攪掂喇！
正當萬母好高興以為攪掂晒之際，先發現個戶口只有debit card，冇saving嘅，想自己上網加，又話唔係UK tax resident一定要打電話或去英國分行喎。咁又唯有再打電話，呢通電話就打到萬母好火滾，對方一接電話，萬母已經聽到噴氣聲，本身隔住個電話聽英文已經夠吃力，仲要加埋噴氣聲，簡直聽到耳朵流產了，最慘講完一輪都係話要去分行攪喎。
攪唔成都無法，唯有等到步後再算。不過英國獅子銀行可以好簡單咁喺網上開到currency account，可以直接將港幣轉過去，香港獅子轉去英國獅子唔收手續費。係英磅嘅saving account未開到，麻煩D。
除左開戶口，其實取消其他銀行嘅戶口都係離開前要做嘅，但係就必須親身去分行攪喇。如果有多過1個MPF戶口嘅話，最好整合埋同一個戶口，咁將來提款時就唔需要攪咁多次。
如果有用開八達通自動增值，都要取消埋佢，萬母一直以為係去銀行攪，點知原來係上八達通網站填表，再等佢寄信嚟，然後拎住封信去地鐵站攪，跟手仲可以退埋張八達通，廢事俾佢收手續費。
離港前小貼士：
1. 開離岸戶口
2. 取消其他銀行唔用嘅戶口
3. 整合MPF戶口
4. 取消八達通自動增值同退卡
沒有留言:
發佈留言