Alton Towers聲稱係全英國最大嘅主題樂園，一直都喺我哋嘅To Go List入面，不過佢離倫敦唔近，車程超過兩個鐘，所以一直都停留喺個list，但有朋友陪玩，就一於捨命陪君子，嚟個快閃團喇。
為咗朝早入Alton Towers玩，我哋早一晚上咗Derby住，食埋cosmo自助餐，Derby有個大商場，好多舖頭，可惜6點已閂門，早知早D出發去行商場喇。
https://www.cosmo-restaurants.co.uk/
朝早入Alton Towers條車龍好長，泊好車都仲要行20分鐘先入到場，果然係最大嘅主題樂園。
Alton Towers除咗出名大，佢D過山車都好出名，有14個圈嘅The Smiler，又有超高速嘅Rita，仲有垂直落嘅Oblivion，當然唔止呢幾個喇。
除咗刺激嘅機動遊戲，都仲有BB區嘅，但中刺激程度嘅機動就唔多喇，如果玩唔到激，又唔啱BB區，Alton Towers就應該唔多啱玩喇。
鍾意玩刺激嘅機動遊戲可以考慮買fast pass，因為等候時間真係好長，唔用fast pass係玩唔到幾個多遊戲，全日只會花時間排隊。
如果唔玩機動遊戲，又唔介意畀入場費嘅，園入面有個水族館都幾好行，仲有個大花園The Gardens，入面都有少少郊野公園行山feel㗎。
本來諗住搭吓纜車，睇吓風景，點知纜車又唔開，排隊玩過山車仔，排排吓又話故障，感覺Alton Towers好多機械都突然closed，或者係我哋唔多夾喇，最想玩嘅偏偏玩唔到。
https://www.altontowers.com/
由2023年2月初開始，香港嘅老師可以憑住香港個教師牌，直接轉換英國教師牌，雖然萬母未有打算再執教鞭，但換咗先冇壞嘅。
咁申請換牌需要咩文件同步驟呢？
1. 身份證明文件(例如：護照)
2. 大學學位證明(畢業證書，成績單)
3. 師訓證明(如果同個degree唔同，就要另外交畢業證書，成績單)
4. 英語能力證明(某D英語國家出世/公民/大學畢業可免，否則就要問大學拎Medium of Instruction，如果個學位唔係用全英語授課，就要另外考英文試)
下面條Link有講點拎Medium of Instruction，拎完之後仲可以申請埋永居英文證明。
https://www.facebook.com/permalink.php?story_fbid=443549571114712&id=100063790193107
5. 香港教師證明(呢項萬母覺得最煩)
要證明自己係香港註冊教師，並冇被釘牌，拎住張註冊證係唔夠嘅，咁要點做呢？就係要聯絡香港教育局，煩~
首先要寫封信畀EDB要求提供證明，信入面要寫明自己嘅中英文全名，電郵地址，英國教育局嘅地址同電郵，再交埋香港身份證副本，教師註冊證副本。
呢封信簽好名，再scan埋電郵去EDB，跟住就等EDB直接將證明畀英國教育局，封證明係唔會經我哋手嘅。
(當萬母email咗封信去EDB之後幾日，就收到回覆，話要收實體信，scanned copy唔得，所以要去郵局一轉)
6. 香港教學年資證明
要換英國教師牌，係要有最少1年全職教學經驗，咁點證明呢，呢項相對易好多，只要提供前上司嘅聯絡電郵，英國教育局就會直接聯絡佢，只要人緣唔係太差，實搵到人幫你證明嘅，所以呢項相對係易嘅。
去以下網站，填填填，upload upload upload，之後就係等喇，指引話大約等4個月左右。
https://apply-for-qts-in-england.education.gov.uk/eligibility/start
以下係萬母嘅申請流程：
1/2 唔執輸，嗱嗱臨上網申請，仲email埋畀香港EDB
3/2 EDB回覆，要實體信，萬母即日去咗郵局一轉
19/2 email EDB問有冇收到信，但冇回覆
4/3 再email EDB
6/3 EDB話收到萬母封信，英國教育局都有email話收到萬母嘅Statement of Professional Standing，開始處理申請
21/3 英國教育局話已聯絡萬母嘅諮詢人，證明萬母嘅教學年資
24/3 英國教育局話萬母嘅申請已完成，成功換到英國教師牌
今次實在比萬母想像中快，起初諗住要等到6月，點知4月未到就攪掂喇，而且轉牌完全免費，只係畀咗一封信嘅郵費，感恩感恩，了結咗一件心事。
喺香港時，萬母好鍾意幫襯美芯美勞同學生勞作呢類公司，買一D手工材料包，一pack pack齊曬料，唔駛樣樣自己執，好方便。
喺英國都有呢類公司，就係Baker Ross，佢除咗好似Hobby Craft咁賣手工材料，仲有一包包材料包，唔駛買曬一大堆料，用唔曬又要儲起佢，掉咗佢又可惜。
除咗手工材料包，Baker Ross仲有party supplies，即係D裝飾旗呀，紙杯紙碟呀，小禮物袋呀，同回禮小禮物咁，如果要幫細路開party，一站式可以買齊野。
除咗收錢賣野，Baker Ross仲有D免費資源，好似係craft ideas，填色紙咁，攞咗靈感再用自己嘅料做都得。
萬母覺得呢D勞作材料包同免費填色紙最適合係聚會時畀細路kill time，咁大人就可以自由咁吹水，唔駛畀D細路煩住喇。
https://www.bakerross.co.uk/
英國通貨膨漲嚴重，物價飆升，上曬新聞。
估唔到council竟然對學校support staff提供一次過嘅生活津貼，每人有£150，呢個數話多唔多，話少唔少，但對於某D人嚟講就係久旱逢甘雨。
既然講到錢，就講吓返學校工做support staff究竟搵到幾多錢，英國咁大，個個區嘅人工都有唔同，倫敦會比其他地區人工多DD，而倫敦又分內倫敦同外倫敦，所以係好複雜。
簡單D咁講，做學校support staff書面上嘅年薪大約係£20-25K，點解話係書面上呢，因為support staff嘅合約好多時都係term time only，即係學校放假，你都要被迫放假冇人工出，咁英國學校嘅假期又真係唔少㗎喎，扣曬學校假大約只係返39個星期工，即係為咗扣學校假期，個年薪先要打個83折(約數)。
跟住英國嘅full time job預你一星期返36個鐘嘅，但好多學校工其實一星期冇返咁長，頂盡都係30個鐘，有D更少，即係因為返唔足時數，個人工又再打個83折(約數)。
最後實出嘅人工就係£20-25K嘅83折再83折，即係比7折仲少。所以好多時D job adv除咗寫年薪幾多之後，仲會標明Pro-Rata/Actual人工係幾多。如果想搵學校工養家嘅朋友真係要留意呢點。
不過返學校工都有好處嘅，就係學校假期可以放假，好似萬母咁，逢親D term break就唔駛返工，可以留家陪小妹，萬母覺得呢點好重要，所以接受到佢人工低。但家家本經都唔同，真係要自己好好考慮。
喺英國返工同喺香港返工有咩文化差異呢？分享以下情境。
喺每週例會，阿line manager交帶萬母為十幾個學生準備轉介表，LM話呢D文件趕住要，問萬母放工前攪唔攪得掂，萬母答盡做喇，之後阿LM竟然話做唔曬唔緊要，講聲佢知，等佢執埋D手尾，呢刻萬母又係有D驚喜，香港老闆只會叫你做完先好收工，做唔曬等佢執手尾，真係發夢都唔駛諗，但喺英國竟然會發生。
嗰十幾份轉介表，雖然每份表有十幾頁，但其實要填嘅資料大約一頁紙，萬母喺食晏前已經攪掂曬，阿LM當然好高興喇，唔駛佢執手尾。
到臨放工前一個鐘，LM寄咗封email吩咐萬母砌份一頁紙嘅文件，臨放工前15分鐘，當萬母已經執好書包，成個勢準備好放工之際，阿LM突然殺到，見到萬母成個放工樣，佢第一句竟然係咁講......
"份文件你留返下星期先做喇"
佢見到萬母成個放工樣，竟然唔係問萬母做好曬D野未，而係叫留返下星期做？？？！！！
不過萬母都唔係懶蛇嚟嘅，份文件其實已經攪掂，仲send埋畀LM，只係佢未睇到，咁呢刻，萬母即場show畀佢睇，佢就開開心心咁離開喇。而萬母就準備衝閘放工喇。
#圖文不符
#chibird
https://www.facebook.com/ChibirdArt
暑假除咗本地遊，其實我哋都有出走嘅，地點係葡萄牙南部。 行程前半部係resort hea遊，後半部就去吓景點遊，其中一個就係Benagil Cave(貝納吉爾海蝕洞) //Benagil Cave 的中文名稱為貝納吉爾海蝕洞，也有人稱它為貝納吉爾洞穴或浪漫地稱為「上帝之眼」、「天...
