朋友知我哋南下一個星期，驚我哋去得太耐冇景點玩，介紹我哋去呢個Moors Valley Country Park。
呢個話晒係Country Park，即係郊野公園喇，咁有咩玩呢？
首先係有行山徑，有幾條唔同程度嘅行山徑，其中一條係專畀細路嘅Play Trail，邊行邊有遊樂設施，等D細路唔覺唔覺就行咗山，中途仲有一部份係樹頂徑，離地5米，但非常安全。
除咗行山，仲可以租單車踩，或者參加Go Ape，呢個郊野公園仲有蒸氣小火車坐，但因為太"雞"，所以我哋最後冇坐。
呢個郊野公園免費入場，但停車場要收費，一個鐘收£4.5，5個鐘以上就£15。
呢個景點適合一D喜歡大自然嘅人，輕輕鬆鬆親近大自然。
https://moors-valley.co.uk/
南下另一個主打景點係去海灘。
英國嘅海灘好多都係石灘，想搵個水清沙幼嘅沙灘真係有難度㗎。今次既然南下海邊，當然都要去一去沙灘，呢個West Wittering Beach據報係英國最top沙灘嘅第10位，好受歡迎㗎。
https://www.mountainwarehouse.com/community/travelling/top-25-uk-sandy-beaches
由於受歡迎，所以佢嘅停車場係要預早book，特別係夏天嘅周未，夏季平日一日停車費£8.5，周未就要£9.5，無停車位就唔准入㗎喇，所以想去嘅真係要預約。
沙灘停車場開朝6:30至晚8:30，有本事嘅話可以玩足一整日。
一去到West Wittering Beach，小妹就話呢個係blue flag beach，萬母當然唔知咩喇，小妹就話係好野咁解。
以下係維基資料：
//藍旗海灘是環境教育基金會認可的一種海灘或碼頭。其評選標準包括水質、環境教育信息、服務和一般的環境管理標準，藍旗海灘的各項水準都應高於一般的海灘。環境教育基金會每年6月5日都會發佈重新評選藍旗海灘名單，其分佈遍及全球。2013年共有3850個藍旗海灘，分佈於48個國家。//
呢個沙灘有cafe，有得玩水上活動，仲有救生員當值，真係一個水清沙幼嘅靚沙灘，小妹玩咗5個鐘沙先肯走，難為乾煎嘅阿媽，要不停防曬避曬，係沙灘上三點色泳衣中嘅長袖奇葩。
https://www.westwitteringestate.co.uk/
巨石陣只係南下嘅中途景點，今次暑期大旅行嘅主要景點其實係Peppa Pig樂園(Paultons Park)，呢個樂園係小妹初到英國時已經想去，拖咗年幾，終於如願。
Paultons Park 一家四口一日入場費係£159
但如果喺佢網頁訂埋酒店，就可以享受第二日免費入場，呢D package由£300-450不等。
由於萬能家玩得比較慢，所以就join咗2日package，連續2日入樂園玩。
Peppa Pig World其實只係Paultons Park入面其中一部份，入面的確係幾靚嘅，而Peppa Pig World入面嘅機動遊戲都比較適合細嘅小朋友。
Paultons Park其他部份有較刺激嘅機動遊戲，過山車都有幾款，有一種係腳揈揈過山車，萬母起初以為會好激，但實際冇想像咁激，只係會擔心隻腳會踢到野，但其實哈比人點會咁易踢到野吖。
樂園入面仲有個小型water park，天氣好時就好多人玩。
總括嚟講，呢個樂園都值得玩嘅，特別係鍾意Peppa Pig嘅小朋友，點都要到此一遊嘅。
https://paultonspark.co.uk/themed-worlds/peppa-pig-world
久違了嘅暑期大旅行，終於成行喇，今次我哋唔坐飛機，只係road trip。
南下第一站係去巨石陣(Stonehenge)。
老實講，萬母同小妹都對呢個景點興趣不大，巨石陣比想像中多人，天氣又比想像中晴朗，好彩係有shuttle由visitor center搭過去。
可能係暑假期間，有個小攤位畀細路"扮"考古挖掘，呢個係小妹覺得最好玩嘅一part。
以下係維基資料：
//巨石陣也叫做圓形石林。那裡的幾十塊巨石圍成一個大圓圈，其中一些石塊足有六公尺之高。據估計，圓形石林已經在這個一馬平川的平原上矗立了幾千年。//
//巨石陣中幾個重要的位置，似乎都是用來指示太陽在夏至那天升起的位置。而從反方向看剛好就是冬至日太陽降下的位置。除了太陽之外，月亮的起落點似乎也有記載。//
//但是迄今為止，沒有人確切知道當初建造它的目的到底是什麼。一些科學家認為圓形石林是早期英國部落或宗教組織舉行儀式的中心。還有一些專家認為那裡是觀察天文的地方，人們很可能在季節變化之際在那裡舉辦活動。//
//考古學家對巨石陣83塊石頭中的三根石柱進行了局部的雷射掃描。他們預計通過完整的雷射測量能夠提供堅實的證據表明巨石陣是悼念亡靈的紀念物，尤其周圍地區分布著數以百計的古代墓葬更能提供佐證。//
呢堆石究竟係點構造同造嚟做咩，而家仍然係一個迷，鍾意"迷"嘅朋友係值得一去喇，至於嗰D同萬母一樣貪圖享樂嘅，就會覺得呢個景點係"好天曬，落雨淋"喇。
喺巨石陣幾分鐘車程之外有一個巨木陣，同樣係唔知點整，唔知做咩嘅，但由於木頭會腐爛，而家只剩低石屎陣。
https://www.english-heritage.org.uk/visit/places/stonehenge/
家庭入場(2大3小) £56.6
放成6星期暑假，為咗唔好畀細路喺屋企狂打機，萬母幫小妹報咗summer camp。
返summer camp要自己pack lunch，無飯煮婦要煮晚餐已經好頭痕，仲要pack埋lunch簡直係頭都大埋。起初諗住去超級市場買meal deal解決，但後尾記起好多人介紹嘅Too good to go app，就去睇吓有咩好執喇。
萬母屋企附近多數得cafe嘅magic bag(食物福袋)，畀£2.5-3.5就可以有一袋食物，雖然唔係每樣自己揀，但樣樣都有得試吓，都幾好玩。如果唔係非常揀飲擇食，其實買呢D福袋好抵嘅，一來買家可以慳D錢，賣家又可以減少浪費食物。
試咗附近幾間，有D食物量好多，唔同舖頭有唔同食物，小妹們搵到心頭好，下次學校出trip要pack lunch，萬母都會繼續買福袋，咁就唔駛晨早起身煮野喇，呢個APP簡直係懶媽恩物。
https://toogoodtogo.co.uk/en-gb
又到增添文化氣息時間，趁住暑假Kids Week，細路免費睇劇(其實係買大送細)，又去扮吓文青。
今次睇"獅子女皇魔衣櫥"，上次去Oxford嘅The Story Museum，小妹見到個魔衣櫥之後，就上釣睇咗本書，所以今次佢一邊睇一邊解釋畀萬母聽。
真係冇咩邊套劇係唔好睇嘅，D佈景，服裝，道具，全部都好正，只係正價真係好貴，趁特價睇就感覺非常良好。
Kids Week係每年8月，17歲以下嘅細路只要跟個付全費嘅大人，都可以免費入場，但係D特價飛數量有限，係要搶嘅。6月中開賣時，萬母都嘗試去搶，但虛擬隊都排幾萬人，結果就搶唔到最想睇嘅Disney’s Beauty And The Beast喇。
但The Lion, The Witch and The Wardrobe都一樣正，全場拍爛手掌。
下面係Kids week嘅連結，仲有飛賣，有興趣都可以標個尾會。
https://officiallondontheatre.com/kids-week/
上上上回講到我哋向agent退租，遇著個思覺失調嘅agent，攪咗一輪終於成功還鎖匙。
之後等咗3星期左右，就收到agent嘅check out report，呢D check out/check in reports雖則話由獨立人士負責，但其實都係bias業主嘅，我哋收屋時，明明污糟邋遢，個洗衣機同雪櫃臭崩崩嘅，但個report都話已professional clean，到我哋還屋時，明明經agent搵咗公司清潔，個report都話只係domestic clean，呢樣都算喇，佢冇因為清潔程度而扣deposit，反而係因其餘兩樣野。
1. 個report話我哋整唔見咗窗簾棍個尾，要求扣£5，之但係我哋睇返report嘅相，明明個inventory clerk影相時兩邊個尾尾都仲齊全，點解無啦啦話整唔見咗要扣錢呢，所以萬母就將張相send返畀agent，問佢究竟唔見咗咩要扣錢，結果呢單就好快打甩咗。
2. 第二樣就係話有隻窗壞咗，click實咗，開唔到又閂唔到，呢度就要扣£100。但其實呢間屋有好多窗都係開唔到嘅，我哋入伙無耐已經發現，報咗畀agent聽，可惜個agent成年都冇處理，等到我哋退租時就扣錢，我哋當然唔忿氣喇，所以又同agent拗，但agent又拋個波畀業主，話等業主決定，等咗兩個月都冇回音，萬母決定將行動升級，交畀deposit dispute，呢個deposit dispute係我哋deposit protection scheme嘅一部份，唔肯定係咪間間agent都一樣，但我哋提出dispute係免費嘅，只係要上網填好多表，交好多證明(包括租約，同agent嘅交流紀錄，check in/check out reports等等)，交齊晒資料就係等，等咗4個月左右，終於等到結果。
訂金審裁官判我哋得直，可以拎返晒D deposit，詳細理據見附圖，攪咗咁多個月，終於可以close file喇。
今次嘅經驗話畀我哋知，同agent交流，真係要有白紙黑字紀錄，就算電話講完，都要跟手有email/online conversation，有文字留底，否則最後有咩爭拗就好難去攪。
繼續暑假遊記，暑假期間，除咗入咗城之外，其實我哋都去咗海邊玩。 Southend-On-Sea(濱海紹森德)雖然係叫south end，但其實佢喺倫敦東面，揸車大約個零鐘可到。係一個海邊旅遊區，有好多arcades同fish & chips店，如果鐘意去冒險樂園嘅大小朋友...
