萬母喺英國嘅第一份工就係做監考員,當年喺一間"band 3"學校做,仲要專門監D SEN學生,二三十個有特殊需要嘅學生擺曬喺圖書館,得1-2監考員睇住,全部都要考試調適,有D要加時,有D要電腦讀卷,雖然有個大榜列曬邊個有咩調適,但實際操作時就好考功夫,最慘係考Science嗰陣,又要分double science定triple science,仲有high tier同foundation,咁樣已經4款卷,派卷時要小心唔可以派錯,到收卷時又係,因為連埋有/冇加時,同一間房可以有4個考試結束時間,幾時要收邊個份卷,真係要check清楚。
最頂癮係呢班band 3 SEN學生,好多都係無心向學,有電腦畀佢讀卷,佢持住戴住headphone,偷偷開音樂聽,另一個仲離譜,偷偷上網查答案,監考時就好似打地鼠咁,要一眼關七,疲於奔命。
自從萬母轉咗工之後,就冇再返監考喇,但今年因為學校唔夠監考員,而萬母跟開嘅學生又大部份考緊公開試,所以萬母去咗兼任監考員,喺"band 1"學校監考同"band 3"真係差天共地。萬母今年都唔係喺大hall監考,專責一對一嘅個別監考,全程只係坐喺度望住佢寫,間唔時發吓白日夢,最辛苦係要忍住唔好玩電話。
講開考試調適(access arrangements),除咗有特殊需要學生,即係已確診讀寫障礙,過度活躍症或者自閉症嗰D一定可以得到調適(加時/讀卷/電腦代筆等等)之外,呢度其實好人性化,如果個學生有嚴重考試焦慮(exam anxiety),都可以同學校嘅SENCO申請調適,不過就唔係加時嗰類,係可以申請rest breaks,rest breaks即係考試期間可以同監考員要求有小休時間,而呢D小休時間係唔計喺考試時間入面,舉個例,原本考個半鐘嘅學生,由9:00-10:30,考生如果中間小休咗5分鐘,佢個考試結束時間就會順延至10:35,不過要留意,小休期間係唔可以接觸考卷同答題簿嘅。
仲有,如果手字太醜,都可以同學校要求用電腦打答案,但考試時就唔會有spell check/auto correct呢類功能。總言,呢邊考試係盡量幫學生發揮所學,只要係合理嘅要求,學校好多時都會配合。
沒有留言:
發佈留言