胡桃夾子芭蕾舞劇 The Nutcracker

呢場芭蕾舞，本來應該兩年前睇嘅，但當年因為剛剛covid解封，大家都仲好關注個疫情，當年就係因為隊crew太多人中招而取消表演。

其實胡桃夾子芭蕾舞每年聖誕期間都會上演，而且總會有一場係家庭show，買大人飛送細路飛，萬母兩次都係等呢個優惠先買飛睇嘅。

如果想收到優惠資料，可以去Royal Opera House嘅網站登記收newsletter，咁有節目出時就會收到通知，啱心水嘅就可以去買飛。

https://www.roh.org.uk/

講返場芭蕾舞，胡桃夾子係柴可夫斯基嘅作品，故事背景係平安夜嘅聖誕party，有個女仔收咗份胡桃鉗嘅聖誕禮物，之後就進入咗奇幻世界，胡桃鉗同老鼠王大戰，仲帶埋女主角進入糖果王國，仲有世界各地嘅民族舞表演。

萬母都係完場後做功課先知套劇講咩，下次都係乖乖哋入場前溫好書先，睇咗套柴可夫斯基，突然覺得自己嘅文化水平高咗DD添。