英國小學課程-KS2 英文

作為一個書僮，當然想知少主返學學咗咩，但小妹學校冇咩功課做，要等到暑假前先有機會睇到喺學校做嘅堂課，先知究竟學緊咩。

咁樣，萬母當然唔心足喇，所以就上網買咗本小學課程綱要，自己去睇吓，了解吓。

呢本課程綱要，唔係官方出嘅，係出版社出，因為係彩色印刷，所以都幾好睇。佢有分唔同嘅Key stage，兩個小妹都讀緊Key Stage 2 (Year 3-6)，所以萬母就集中睇呢個Key Stage嘅資料喇。

雖然唔係全部睇得明晒，有好多係讀咗咁多年書都冇學過嘅(或者老師教咗，萬母只係左耳入，右耳出咗)，所以都幾多新野學，特別係D修辭手法。

Grammar嗰本(左)主要講grammar，講得都幾詳細；English嗰本(右)全面D，有講寫作同閱讀理解，仲有淺談grammar，如果只買一本，會建議買English嗰本。

除咗萬母自己睇呢本課程綱要之外，當小妹有野唔明時，例如：要學adverbial phrase時，萬母會搵返相關頁數畀佢睇。所以，呢本萬母係當參考書咁用，當自己解釋唔到時，就搵佢幫手喇。

睇完本study book/revision guide之後，萬母覺得香港同英國課程最唔同嘅地方係： 英國除咗學閱讀同寫作之外，d grammer都學得好仔細，特別係D專有名詞，話晒英文都係第一語言，學得仔細D都應該嘅。

香港嘅課程都有學grammar，但就好少會講明畀學生知，"嗱，a/an/the就係determiners喇"，"and/or/but就係conjunction"，香港學生主要學點用。仲有clauses同phrases，萬母到而家都係傻傻分不清，讀咗咁多年書都真係讀屎片。

而家真係做伴讀書僮，伴住小妹一齊學。