先前提到萬能家本來諗住新屋只係小執,油吓牆就住得,點知拎鎖匙後嚇一嚇,攪到要裝修。
咁究竟發生咩事呢?
一,上手業主因為即日搬走,所以走得比較匆忙,變相間屋少不免留低D垃圾,雖然唔係咩大問題,但觀感已經差DD喇。
二,上手業主有養開狗,第一次睇屋時,D狗唔喺屋企,而且間屋點晒香氛蠟燭,到第二次睇屋時,見到狗仔真身,但都冇咩大發現,到最後收樓時,一入屋就聞到間屋有陣狗味,樓梯張地毯係重災區,非換不可。
三,睇屋時見到廚廁都算新淨,係近幾年新裝修,非二三十年歷史文物,咁都覺得唔錯喇,應該可以保留喇,點知當搬走D廚房電器後,發現先前嘅裝修只係整一半唔整一半,後面嘅牆磚係歷史文物,唔知係唔係前業主走得太急,廚櫃都仲有D遺物,更惶論一大堆污漬。
四,睇屋時見到兩個睡房都有入牆衣櫃,覺得係bonus,點知未收樓前聽朋友講佢屋企嘅陳年入牆衣櫃冇背板,直達牆壁,結果D衫俾蟲蛀爛咗,此時萬母已經有D不祥預感,到收樓時打開衣櫃一睇,唉......真係冇背板嘅,而且櫃入面嘅牆身又霉又黃,睇見都唔開胃,再望多兩望,發現櫃底有塊膠地墊,出於八卦,掀起膠地墊嚟睇,底下竟然有一疊報紙,仲要係2002年嘅報紙。到呢刻已經肯定個衣櫃非拆不可。
五,如果要拆入牆衣櫃,就會攪到個地板都要換,牆腳線要換,天花線要換,繼續推論落去,就係牽一髮動全身,由小執變大執。
萬母講到呢度,已經好頭暈,遲吓有機會先再update呢個project。
沒有留言:
發佈留言