買屋記(8) - Completion 拎鎖匙

當exchange咗contracts，買咗保險之後，最後一樣就係等Completion，拎鎖匙。

呢度交吉唔似香港咁，冇得早3日上去驗收，所有野都係等交易日去做。

咁當然喇，你都可以同業主協議，交易前再上去睇屋嘅，但係就會見到一片混亂，唔會見到交吉狀況。

交易日前，萬母先同律師確認過數時間，跟手再同agent約時間拎鎖匙。

交易當日，我哋係晏晝兩點去拎鎖匙，跟住去到新屋度就見到前業主搬緊屋，冇錯，英國人真係直接喺交易日搬屋，佢哋喺一日內拎新屋鎖匙，再由舊屋搬去新屋，呢樣野萬母到而家都諗唔明嘅，新屋唔駛清潔就住得人㗎喇？

咁由於前業主係即日搬遷，可以想像到有幾匆忙，亦可以想像到佢哋走咗之後間屋嘅狀況，咪就係有D頹垣敗瓦feel囉。

本來我哋只諗住油吓牆，小執就住得，點知收樓後，嚇一嚇，變咗計畫不似預期。有機會再分享吓呢個180度轉變嘅心路歷程。

就係咁，歷時三個月(計埋睇屋，其實唔止)嘅買屋過程都叫做完成，仲成功追到個stamp duty holiday添，都真係算好彩。萬母身邊有唔少朋友，都因為中途有唔同問題而要pull out，買唔成屋，所以雖然我哋嘅計畫不似預期，但仍要感恩。

https://hoa.org.uk/advice/guides-for-homeowners/i-am-buying/completion-what-to-expect/

若不是耶和華建造房屋、建造的人就枉然勞力．若不是耶和華看守城池、看守的人就枉然儆醒。(詩篇 127:1)

https://www.youtube.com/watch?v=l_xTymMbV-8