先前分享過交水費原來係一次出一年單,所以張單貴到嚇親萬母。
今次就分享吓電氣費,即係電費+煤氣費。
長文一篇,如果怕頭暈,可直接跳去小總結。🏃🏃♀️🏃♂️
電氣費係逐月收嘅,可以揀自己報錶,亦可以裝smart meter自動報錶,因為係租屋住,所以我哋唔敢自己決定轉smart meter,搵agent問業主又一路冇回音,所以我哋都係自己不定期報錶。個電錶喺屋入面大門頂,個氣錶就喺街出面,廚房樓下,我哋都要搵咗一輪先搵到自己個錶。報錶好簡單,上網頁輸入數字就得,所以我哋隔2個星期左右就報一報,希望佢收電氣費時收得準D。
雖然佢跟錶出單,但電氣公司又實行定額收費,係咪聽到一舊雲咁呢,又要報錶,但又收定額。
當初開account時,佢會問間屋幾大,幾間睡房,幾間浴室,幾多人住,跟住就會建議每月交一個額,每月自動喺銀行戶口扣錢,我哋當初係每月交£66。
但其實電氣公司每月都會根據報讀嘅錶數/估計嘅錶數去出單,如果用得多過交嘅數就會in debit,有剩就credit。
咁萬能家又點呢?附圖係我哋呢幾個月嘅電氣費,1月時因為喪開暖氣,所以煤氣費貴到喊,好明顯第1個月我哋已經in debit,欠電氣公司錢。
到第2個月,因為boiler壞咗10日,所以煤氣費平咗好多,但開暖風機令到電費貴番,仍然都係欠電氣公司一大條數。
到第3個月,我哋慳住開暖氣,但又遇著漏煤氣,結果條數係細咗D,但仍然作唔到準。亦因為我哋in debit太多,喺呢個月,電氣公司send email叫我哋改為每月交£120。
到第4個月,我哋嘅電氣費合共£105.48,仍然欠緊電氣公司錢,但就開始慢慢還緊債喇。
呢個定額收費,應該係希望D人每個月固定咁交費,唔會因為冬天突然開多咗暖氣,張單貴咗而俾唔起。
俗語話: 好天斬埋落雨柴,但而家應該係夏天交埋冬天費。
🏃🏃♀️🏃♂️小總結: 4人家庭,2房1廁,每月電氣費大約£120。
沒有留言:
發佈留言