稅~呢家野，應該都冇咩幾個人好樂意去交，但點都好，為左免除後顧之憂，離港前都要去清稅。
要清稅，有份表好重要，就係IR56G，呢份表可以喺稅局網站得到，呢份表係由僱主填嘅，所以遞左辭職信後，就要提老闆/老闆個秘書去填IR56G，僱主填完會直接交去稅局，但都要俾番份副本僱員(即我地呢D小薯)。
咁我地呢D小薯要做咩呢？
揀好last day，因為未清稅嘅話，僱主係會扣起最後一期糧唔出住嘅，所以如果月尾last day嘅話，就會成個月嘅糧被扣起，如果月頭last day就只扣幾日糧；擔心僱主唔出糧或者唔想俾人扣住咁多錢就最好揀月頭last day喇。
拎到份IR56G副本，就要通知稅局你要清稅，可以打電話，email，fax，寄信，甚至剷上去稅局。萬母當時懶，諗住send email就可以上少次稅局，點知第一個email好快有回覆，要求補番D文件，但補回文件的email就石沉了大海，直至萬能生親身上稅局清稅，順便問阿稅務主任我個case做咩攪咁耐時，先發現中途失聯了。
咁萬母唯有打電話搵稅務主任講清楚，原來佢漏左我份回覆冇處理，好彩佢都好快手寄番份新稅表俾我。填好新稅表，萬母決定唔再坐以待斃，直接剷上稅局。
當日上去交新稅表，交IR56G(呢份副本俾佢收左就冇，所以最好scan留底)，連埋其他文件(如果要申請免稅額或捐款/進修開支，全部都要有單，冇單嘅話就唯有刪左去唔計數喇)，稅局職員會安排入房仔，一齊睇番上年的稅表，檢查單據，再睇埋剛交嘅新稅表，仲會即刻計數，話你知究竟有稅可退定要補多D錢。
萬母起初以為即日可以攪掂，但阿職員話要3個工作天先出到正式稅單，所以萬母又要上去稅局第二次，結果萬母係冇得退稅嘅，仲要補交多D，咁就即刻衝去稅務大樓1樓嘅郵局交錢喇(準備好現金/用EPS都得)，交左錢故事都仲未完架，仲要拎番收據上7樓拎份"同意釋款書"，呢份野非常超級重要，一定要交番去公司，咁就可以拎番被扣嘅最後一期糧喇。
清稅小貼士：
1. 揀好last day
2. 主動出擊，因為點都要去稅局2次，直接剷上去快D攪掂佢
3. keep好文件/單據
4. 清稅係唔駛等last day後，辭左職有IR56G就清得，唔好等得太忟水
沒有留言:
發佈留言