返工記 ~ Ofsted Inspection

萬母返咗一個學期嘅工，已經遇上十四年難得一見嘅ofsted inspection。

Ofsted Inspection即係類似香港嘅外評視學，相信香港嘅老師唔會陌生。

不過英國呢邊嘅視學，係早一日通知嘅，星期二打電話畀校長，星期三就嚟視學， 一連睇兩日，每日有四個督學嚟觀課，睇文件同埋訪談。

Ofsted inspection主要睇下面幾項：

The quality of education

Behaviour and attitudes

Personal development

Leadership and management

Sixth-form provision

Ofsted評級分為4級，outstanding, good, requires improvement, inadequate

收到電話通知當日，成間學校都好震驚，雖則校長話一早已經準備好，但佢哋都即日開緊急會議，需要被重點視學嘅科頭，更加要加班添。

督學即日已經同管理層開會，但正式結果要一個月後先知。最後揭盅時，萬母學校喺所有項目全得outstanding，佢哋仲因為ofsted inspection得到好成績，專登有日放早嚟慶祝，學生就有pizza食，校長就等放學後請曬全校教職員一齊去食午餐，真係開心到不得了呢。

Ofsted最近都成為新聞熱話，皆因ofsted inspection正進行改革，以往被評為outstanding嘅學校，有好多喺新一輪inspection時被降級，因為以往D學校可以單靠學業成績已經穩取outstanding，而得到outstanding之後可以豁免好多年，所以有D學校單靠食老土已經好多年冇被inspect，但老本都終有食完嘅一日。

去以下網站可以查到每間學校嘅ofsted reports，選校中嘅家長們可以參考一吓。

https://reports.ofsted.gov.uk/

https://www.bbc.co.uk/news/education-63713880

兔年大吉大利

唔經唔覺，數數手指，原來今年係萬能家第三年喺英國過農曆年，由第一年lockdown中傻傻地過，到第二年湊熱鬧去蒸糕bell，今年萬母決定唔再浪費食物喇。

受到家人挑起條筋，決定鈎大吉去，本來打算鈎兩粒吉仔就算，唔知發生咩事，竟然發神經去鈎整盤桔，一邊鈎一邊同小妹講，唔知成唔成功㗎，唔得就拆咗佢整其他野喇。

點知，鈎鈎吓竟然成功咗，今鋪真係大吉大利喇！

萬母係睇呢兩條片學嘅，有興趣嘅朋友都可以試吓。一個週末就攪得掂。

https://www.youtube.com/watch?v=VcFoMMWhyGU

https://www.youtube.com/watch?v=zA3ddj1TO8Q

#兔年大吉

#吐氣揚眉

返工記 ~ 無心工作

放完個聖誕假期，返到公司，萬母收咗份大禮，攪到無心工作。

究竟收咗D咩攪到咁大件事呢？

之唔係一間新office囉。

萬母個職位係今個學年新開嘅，前無古人，所以事前冇人知道究竟實質工作係咩，亦無任何指引去跟，起初阿LM安排咗萬母同社工同事共享一個office，有人照住確係唔錯，有咩唔識唔明都可以問，但因為社工同事時不時都要見學生，仲要傾密計，攪到萬母時不時都要迴避，亦試過兩人同時都要見學生，攪到要去開房(係開課室房門嘅意思)。

所以聖誕假前已經話會裝修office，間多間房仔。本來預計一個聖誕假未必攪得掂，但放完假返去竟然已經裝修好，間房間好咗，仲重新油過曬D牆。

就係咁，萬母有個新office用喇，仲係獨立空間添呀，喺香港返咗咁多年工，從來都冇自己嘅office，嚟到英國竟然又有人生第一次，真係興奮到呢，為咗諗點樣佈置新office攪到萬母成個星期都無心工作，真係有D愧疚添。

#圖文不符

#chibird

https://www.facebook.com/ChibirdArt

玻璃窗吸水機

新年第一post，先嚟個好物分享。

英國嘅屋與水好有緣，但可以話係孽緣。漏水，rising damp，condensation，樣樣都同水有關，今日先講吓condensation(冷凝)。

冷凝即係氣體/液體遇冷凝結，最常見嘅就係汽水罐上嘅水珠。

而喺英國冷凝常見於玻璃窗上，特別係一覺醒嚟，成隻窗濕曬。

因為室外溫度低，室內溫度高，所以就有冷凝，如果室內濕度越高，凝結嘅水珠就越多。

咁冷凝又有咩問題呢？之唔係潮濕發霉囉，窗邊位置積曬水，起曬黑色霉點，真係眼都寃。

如果唔理冷凝，太陽入屋時會蒸發返嘅，但問題係D水份仍然留喺空氣中，空氣濕度只會有增無減，冷凝情況只會越嚟越嚴重。

萬母試過每朝拎毛巾抹窗，但條毛巾抹一間房已經濕曬，就算扭乾都冇咁好吸力，除非不停換乾毛巾。

試過上網爬文，學人放貓砂喺窗邊，但都係冇用。

最後萬能生發現呢隻玻璃窗吸水機，原理同吸塵機差唔多，但就係吸水，而個機頭就似抹窗工具個刮。

呢個玻璃窗吸水機有幾個唔同型號，功能大同小異，主要係運作時間同配件有唔同。

萬能生買咗個5 plus，佢話個窄咀比闊咀靈活，係一個加分位，但如果想平平地，其實買1號仔都夠。

https://www.kaercher.com/uk/home-garden/window-vac.html

除咗用玻璃窗吸水機，用埋抽濕機減少空間入面嘅水份訣效果更佳。

另外，減少喺室內晾衫，煮食，沖涼，呼吸都可以減低室內濕度，但似乎減無可減。

2022回顧 ~ 返工記

2022年其中一件大事回顧，當然要數喺英國返工喇。

唔覺唔覺萬母已經返咗一個學期嘅新工，究竟喺英國返學校工係點㗎呢？

首先戴返個頭盔先，呢個只係萬母嘅個人經驗，唔代表全英國都係咁。

萬母嘅職位係SEN助理，咁究竟做咩呢？

1. 整理有關SEN學生文件，例如填吓轉介表，執吓學生嘅個人調適表

2. 聯絡家長

3. 觀學生課

4. 一對一輔導

咁萬母覺得最難適應嘅工作係咩呢？

用英文溝通當然係難喇，好多時都有口難言咁樣。

但仲有一樣野更難，就係認人同記名，本身D人名已經難讀，仲要將人樣配埋人名，簡直就難上加難。

對學生嘅一對一輔導究竟係做咩呢？初中學生就陪做功課，好似補習姐姐咁陪做功課，高中學生就協助佢哋時間管理。

返咗一個學期，萬母發現D中學生係要"走埠"嘅，就連year 7嘅學生都冇一個固定嘅課室上堂，每堂都唔同課室，要揹住個書包轉堂，見到有D細細粒揹住個大書包都幾慘慘。

嚟萬母度做功課輔導嘅學生都異口同聲同萬母講，小學升中學，最難適應係多咗好多功課做，咁又係，如果唔係，佢哋點會要嚟功課輔導吖。

而中六學生就話A-level比GCSE深好多，難讀好多，GCSE時讀10科都輕鬆過A-level讀3科咁話。

睇嚟，每個key stage嘅轉變都唔容易。

面對2023年，無論身處地球邊一處，無論咩年紀嘅人都要面對挑戰。

但願大家新一年都主恩滿溢，繼續恩典不斷。

#圖文不符

鈎聖誕裝飾

放學身痕，手痕，XX痕，所以又拎D冷出嚟鈎野。

小雪人同聖誕樹都分別用咗1日就完成，望落去都似模似樣，起碼唔再似怪獸。

有興趣/有痕癢都可以去下面嘅連結試鈎吓。

雪人

https://www.youtube.com/watch?v=h7pwzEo7YpQ

聖誕樹

https://www.youtube.com/watch?v=S1S7hOd_ljU

祝願大家聖誕平安，快樂！

在至高之處榮耀歸與神！在地上平安歸與他所喜悅的人！(路加福音 2:14)

踏雪上學去

香港從來都唔會落雪，倫敦都唔常落雪，但上星期日晚，倫敦落咗場大雪，一覺醒嚟積雪有10厘米厚，嘩，窗外嘅風景靚到聖誕卡咁樣。

未經歷過落雪就會好興奮，好高興，但興奮過後，返回現實，就會焦慮，點出門口返學？

好彩嘅係唔止我哋焦慮，倫敦本地人都一樣唔常面對積雪，所以一大朝早就收到小妹學校停課嘅通知，小妹唔駛返學，咁萬母又點呢？萬母學校照常開放，但就行特別時間表，學生朝早10點先上堂，晏晝2點半就放學，之但係由於兩小妹都留家，萬母都唯有請假唔返工，事後萬母得知當日有四分一員工都返唔到工，主要都係要留家照顧細路。

呢一日停課日就成為小妹嘅戶外學習日，學習砌雪人，Do you want to build a snowman? 唔再係只唱歌仔，係真正實行喇。

到星期二，小妹學校已經照常返學，但路面情況仍未回復正常，因為擔心行車安全，我哋選擇踏雪上學去，一路行簡直覺得自己似溜緊冰，因為地下積雪被踩扁後就會變冰，變得好跣，真係一步一驚心，平日15分鐘嘅路程要行25分鐘先到，不過學校好諒解嘅，會體諒踏雪上學嘅細路，唔會因為遲到而責罰。

到放學時間，council已經出動清理路面，主要係喺馬路灑鹽，行車路面已經安全咗好多，雖然仍有跣呔風險，反而行人路仲有好多積雪，結冰，仍然一步一驚心。

由於成個星期都係低溫，日間只係0度咁上下，半夜更加係冰點以下，所以今次嘅積雪一直都未溶，成個星期都仍然活喺聖誕卡中，小妹學校更加插特別活動，喺放學前畀佢哋出戶外嚟個雪戰。

天寒地凍，電量好快耗盡，唔止係電話電量，人嘅電量都係，英國嘅氣溫將會回暖，但香港就剛剛相反，無論喺英國定香港嘅朋友都要小心保暖，好好享受聖誕假期。