踏雪上學去

香港從來都唔會落雪，倫敦都唔常落雪，但上星期日晚，倫敦落咗場大雪，一覺醒嚟積雪有10厘米厚，嘩，窗外嘅風景靚到聖誕卡咁樣。

未經歷過落雪就會好興奮，好高興，但興奮過後，返回現實，就會焦慮，點出門口返學？

好彩嘅係唔止我哋焦慮，倫敦本地人都一樣唔常面對積雪，所以一大朝早就收到小妹學校停課嘅通知，小妹唔駛返學，咁萬母又點呢？萬母學校照常開放，但就行特別時間表，學生朝早10點先上堂，晏晝2點半就放學，之但係由於兩小妹都留家，萬母都唯有請假唔返工，事後萬母得知當日有四分一員工都返唔到工，主要都係要留家照顧細路。

呢一日停課日就成為小妹嘅戶外學習日，學習砌雪人，Do you want to build a snowman? 唔再係只唱歌仔，係真正實行喇。

到星期二，小妹學校已經照常返學，但路面情況仍未回復正常，因為擔心行車安全，我哋選擇踏雪上學去，一路行簡直覺得自己似溜緊冰，因為地下積雪被踩扁後就會變冰，變得好跣，真係一步一驚心，平日15分鐘嘅路程要行25分鐘先到，不過學校好諒解嘅，會體諒踏雪上學嘅細路，唔會因為遲到而責罰。

到放學時間，council已經出動清理路面，主要係喺馬路灑鹽，行車路面已經安全咗好多，雖然仍有跣呔風險，反而行人路仲有好多積雪，結冰，仍然一步一驚心。

由於成個星期都係低溫，日間只係0度咁上下，半夜更加係冰點以下，所以今次嘅積雪一直都未溶，成個星期都仍然活喺聖誕卡中，小妹學校更加插特別活動，喺放學前畀佢哋出戶外嚟個雪戰。

天寒地凍，電量好快耗盡，唔止係電話電量，人嘅電量都係，英國嘅氣溫將會回暖，但香港就剛剛相反，無論喺英國定香港嘅朋友都要小心保暖，好好享受聖誕假期。