偽~青紅蘿蔔湯v2

得到網友指點，萬母又去試煲偽~青紅蘿蔔湯。

今次用swedes扮青蘿蔔。

swedes即係咩呢？

//蕪菁甘藍（學名：Brassica napobrassica），又名蔓菁甘藍、瑞典蕪菁，是源自於捲心菜及蕪菁的一種根莖類蔬菜。根可以有多種煮法，葉子當為葉菜類般食用。//

https://zh.wikipedia.org/wiki/%E8%95%AA%E8%8F%81%E7%94%98%E8%97%8D

買咗個swede返屋企，煲湯前要做嘅就係破開佢，由於未熟嘅swede都幾硬，又幾肥大，而萬母嘅刀工又雞手鴨腳，結果劈到劈柴咁款，仲攪到bang bang聲，下次都係等返學日子先劈swede，等小妹同鄰居老師都返咗學，咁就唔怕嘈親人或者被誤會為虐兒喇。

呢種湯好易煲，將swede同紅蘿蔔切舊，掉埋肉入去煲就得。

味道如何呢？比青紅蘿蔔湯更好味，因為swede有少少甜味，D湯飲落甜甜哋，而舊swede食落似薯仔同蕃薯中間點，似少甜蕃薯。

如果比較椰菜苗波波同swede兩種煲嘅湯，椰菜苗波波湯比較似青紅蘿蔔湯，而swede湯就易入口D。

但swede處理步驟比椰菜苗波波麻煩，真係有好有唔好。

課後興趣班

先前曾經介紹過學校嘅課後興趣班，好抵玩，£10/6堂。

咁街外嘅興趣班又點呢？

新學年萬母都幫小妹四圍睇興趣班，當然喇，有D只係睇咗，小妹唔係所有都報晒，所以千祈唔好舉報萬母虐兒，小妹長時間留喺屋企只會有虐母問題。

跳舞班 £110/14堂 (45分鐘)

畫班 £210/13堂 (105分鐘)

琴班 £22/30分鐘

網球班 £12/90分鐘

羽毛球 £6/60分鐘

體操班 £11/55分鐘

啦啦隊班 £200/14堂 (60分鐘)

英國嘅興趣班同香港有一樣好唔同，香港嘅通常都係交月費，逐月交，但英國嘅好多都要一交交成個學期(即4個月)，所以畀錢前真係要諗清楚，傾清楚，萬一交咗成期學費，而個細路唔肯學就真係揼心喇。

圖為畢家妹畫作。

羅宋湯

小妹喺人地屋企試過羅宋湯之後話正，萬母當然要廿四孝上身，努力學習喇。

網上嘅食譜都好複雜，萬母最鍾意複雜簡單化。

1. 將紅蘿蔔，西芹，薯仔，蕃茄，洋蔥切粒。

2. 將碎牛肉同洋蔥爆香。

3. 所有材料放入湯煲，加茄醬。

4. 煲呀煲

煲羅宋湯最煩就係將材料切粒粒，但羅宋湯其實好抵飲，一碗湯加湯渣就可以解決一餐晏仔，抵！

ScS 梳化店

ScS解sofa carpet specialist嘅意思，呢間主要賣梳化，亦有賣地毯同餐檯。

萬能家遲D搬屋，需要買張新梳化，小妹要求要L型，萬母就想要張梳化床，但似乎呢兩個要求都幾難夾到，所以呢，我哋要預早D慢慢搵，搵搵吓可能會突然出現一張能夠滿足到幾個願望嘅梳化。

呢間ScS嘅梳化望落去都幾四正，有D仲好豪華添，當然個價錢都好豪喇。

https://www.scs.co.uk/

焗蕃薯

萬母好鍾意食蕃薯嘅，今次有幸得到愛心蕃薯。

有焗爐想整蕃薯就易過借火。

洗淨蕃薯，放入焗爐，180度焗40-45分鐘。

唔駛點花功夫就有焗蕃薯食喇，同煨蕃薯一樣咁好味㗎。

#愛心蕃薯

學車記(9) - 迴旋處

英國有好多迴旋處，真係好多，大大小小，迷你嘅同超級大嘅都有。要喺英國揸車，唔可以唔識用迴旋處。

迴旋處小貼士：

🕘轉左： 打左燈，行左線

🕛12點或以前出口： 唔打燈，行左線，臨出打左燈

🕒12點以後出口： 打右燈，行右線，臨出打左燈

除咗要知道打咩燈，行咩線外，仲要知道喺迴旋處究竟邊個要讓路，邊個有優先權。

司機要讓路畀右面或對面嘅車。

以上幾點只係概括，有D迴旋處複雜到不能想像。

就算頭腦上明晒所有理論，實際操作時都係會亂，究竟打咩燈呀？行咩線呀？幾時要讓呀？幾時到我出呀？

要解決只有用時間累積經驗，雖然嚟到英國先考車，要等好耐，又要等考筆試，又要等考路試，但都有好處嘅，就係學車期間會累積到好多英國嘅實際路面經驗，咁第時自己揸車時會易處理好多。

下面條youtube有教喺迴旋處究竟幾時可以出，學神們不妨一看。

https://www.youtube.com/watch?v=IqNW0IrOjzE&list=PLnM8RR0dumuZj0Ui1B00ScjTYri5bNVEm&index=10

以下唔係揸車事，純係廣告時間。😬

https://www.youtube.com/watch?v=jhclJ8OH9Pk

大家閨秀學刺繡

暑假期間，為咗令小妹遠離screen，萬母向小妹介紹咗十字繡，點知小妹一試上癮，整完一個又一個，每次去hobbycraft都要求買一個，仲話下次想試真係喺布上面繡。

想細路容易D處理，可以先喺膠片上用marker點好，咁就唔駛一路繡一路數，少D機會出錯喇。

英國小學冇功課，就多咗時間畀細路去發掘唔同嘅hobby，或者有一日可以好似英國跳水王子Tom Daley咁，又或者呢D hobby將來可以幫佢哋搵到餐晏仔。

圖為小妹嘅初級十字繡。

💰💰超市行情：💰💰

膠底十字繡 £1-1.5