World Book Day

以往喺香港都跟國際閱讀日(4月23日)，但英國呢邊有D唔同，係計3月第一個星期四，今年係3月4日。

呢個World Book Day似乎都幾大件事，老師half-term break前專登講3月4日要dress up as a book character，如果我哋D家當到齊，大把characters有得揀，淨係公主裙都一堆，但而家手上冇咩材料，又想少主投入活動，唯有上網揀costume喇。

揀左一輪，小妹們分別揀左美人魚同Miss Hatter，Miss Hatter係咩水？佢係Alice's Adventures in Wonderland其中一個角色，係邀請Alice去tea party嘅。

英國嘅World Book Day非常鼓勵閱讀，老師經email send左張World Book Day嘅token俾全班同學，呢張token去買書可當£1用，指定嘅13本書仲可以憑token免費換領添。小妹們都各自揀左自己鍾意嘅書，其實呢批書就算唔用token換，都只係賣£1本，超抵。

下面係World Book Day係網站，仲有好多其他活動。

https://www.worldbookday.com/

萬母都幾欣賞英國咁樣鼓勵閱讀，送token俾你買書，甚至免費送書俾你睇，唔似香港咁，個閱讀日係要做閱讀報告，試問做閱讀報告點樣可以鼓勵閱讀呢，你叫我睇完本八卦雜誌要寫閱讀報告，我情願唔睇喇，係咪？

希望小文盲嘅英國嘅閱讀氣氛浸淫下會越嚟越鍾意睇書喇。

圖為小妹們dress up嘅角色，同佢地揀左嘅免費書。

去UKVCAS打指模

非80年代心急人喺1月底急不及待咁上網申請，之後約時間打指模都攪咗兩日，最後發現逢半夜12點就會放28日後嘅收費timeslot，第二朝9點就放免費timeslot，所以如果想免費打指模，就要準時9點上網搶位喇。但一book已經係28日後嘅事，要等到3月先有得打指模。

曾經後悔太心急，後悔冇等apps，但原來小妹們嘅護照都太舊，屬於用apps都scan唔到嘅類別。所以，原來冥冥之中，自有安排。

由屋企去visa centre要個半鐘車程，好耐冇試過坐咁耐車喇，平時最多只係去吓超級市場或者附近嘅公園，今次出短trip，要準備糧水，又要想辦法叫小妹們自娛。

離開屋企嗰區，去到倫敦其他地區，發現景色同感覺都有唔同，有D區感覺悠閒D，有D區感覺繁華D，有D區感覺雜D，如果未揀定落腳點嘅話，真係值得花時間去四圍感受吓。

沿途經過大街小巷都見到好多好靚嘅花，桃花，櫻花，水仙花，唔知咩花，開始感覺到寒冬已過，春天來了。

我哋比預約嘅時間早咗半個鐘到達，好彩門口嘅職員都俾我哋入去，但要先檢查預約嘅QR code，呢張QR code都幾重要，唔同嘅職員都睇左/scan左好多次，所以最好印定hard copy出嚟。

由於我哋一家四口都約左同一時間，所以可以一齊進入中心。上咗樓後，我哋被安排於同一間房，分開兩個櫃位(間房只得兩個櫃位，其他房就有其他櫃位)，一個細路同一個大人一組，職員又再一次檢查QR code同埋護照，其他文件一律都冇睇。

職員將護照從頭到尾scan一次，影相(要露耳仔，露眉毛，唔准笑)，再打10隻手指嘅指模。我哋坐定定，聽指示去做，大約40分鐘就攪掂，職員最後會問是否贊成submit application，因為我哋已經upload好晒D文件，當然𦧲飯應喇。

當中有小插曲，小妹因為細時熱愛食手指，食到拇指嘅指模淺左，結果要職員填張exception form去解釋指模不清嘅原因，職員仲幫我哋諗埋原因(dry skin)添，臨走時佢仲祝福我哋一切順利，希望承佢貴言喇。

#圖文不符

#圖為公園一景

睇屋記 (5)

呢間1531呎嘅4房3廁semi-detached house可以話合晒我哋合尺(河車)。

地下有廚房，客廁，客飯廳已打通，一樓有3間房，1個浴室，二樓有1間套房(連浴室)，每層樓都有廁所，唔怕起身痾夜尿要行樓梯。

閣樓已做loft conversion, 所以二樓有個套房，地下可以再extend，但本身已夠大，郁唔郁都得。

花園冇梯田，平坦而寬闊，足夠小妹們踢沙灘波，花園有後門，唔怕整污糟室內。

屋內裝修雖然唔係全新，但新淨企理，而且夠簡約，啱我哋口味。

門口有driveway，可泊車，但係石仔路，萬能生形容為香港嘅爛地停車場。

呢間屋唯一缺點係~~貴~~，但估價又估到足架喎。

價錢，面積，位置，裝修，間隔，好多野要平衡。又想平，又想大，又想新，又想近，又想實用，簡直係接近不可能嘅任務。由於太揀擇，結果仍然得個吉。

圖1係花園，花園嘅角落有間shed，應該係裝花園工具嘅，如果有需要更多空間，應該夠位整間大D嘅summerhouse。

圖2係一樓樓梯嘅landing位，朋友曾經提過，如果未做loft conversion嘅屋，要留意個landing夠唔夠長去延伸條樓梯，而圖中係成功例子，如果萬一唔夠長嘅話，就要喺房入面(圖片右面)先開始上樓梯，咁間房就會嘥左喇。

食包包食飽

由於萬母太懶惰，所以決定每星期三日嘅午餐食漢堡包~~

但為左俾小妹們有新鮮感，漢堡包有時會變成火雞堡，麥樂雞包，魚柳包。

萬母覺得傳統漢堡最有肉味，火雞堡就好特別，魚柳就偏淋，配包麻麻地。小妹們最鍾意麥樂雞包，因為有超大舊麥樂雞。

下星期小妹們就正式返學喇，可以正正經經食學校營養午餐，唔駛再食萬母嘅劣食喇。其實學校可唔可以多個人加雙筷，等萬母都去吸收吓營養，快高長大呢？

超市行情：

漢堡包 £ 0.70/4個

牛肉漢堡扒 £ 2.50/4塊

火雞漢堡扒 £ 2.50/4塊

炸雞扒 £ 2.00/4塊

炸魚柳 £ 3.00/4塊

芝士 £ 1.75/10塊

遊公園 - 賞櫻花，餵松鼠

英國嘅公園真係可以用風景如畫嚟形容，大草地有大草地嘅青翠，天鵝湖有天鵝湖嘅優美，仲要有好多會郁嘅動物。D動物完全唔怕人，可能係俾人餵慣，D鴿係咁圍住人轉，嚇到萬母好驚驚，小妹們卻好開心，話下次要帶提子去餵鵝咁話喎。

唔覺意路過賞左櫻，松鼠為食到唔驚人。

廢話少講，去相。

#這是天父世界

#天佑義人

#萬母英遷

#英遷生活點滴

睇屋記 (4)

呢間又係新裝修嘅盤，3房4廁，面積1152呎嘅semi-detached house，已做晒extension，全新裝修。

地下有廚房同客廳，再加客廁。一樓係兩房兩廁(其中一間係套房)，二樓全層係套房(連埋浴室)，呢間屋嘅水缸收左喺二樓嘅儲物室。呢間屋同先前嗰間豪裝builder屋都一樣有天窗，但就因為日久失修，生晒青苔。(見圖2)

呢間屋嘅格局同大細非常啱我哋心水，每層都有廁所，而且價錢非常實惠，平過晒先前睇過嗰D。

但一到現場就明白點解咁正咁平都賣唔出，首先佢係喺一個大迴旋處旁邊，雖然隔離仲有一間建築物擋一擋，但條馬路交通都好繁忙吓，有細路仔真係要諗清楚，一出門口就係大馬路，其實都好危險吓。

間屋有driveway嘅，但driveway前有棵大樹，要泊車先要同大樹玩個氹氹轉先，真係有driveway都冇咩作為。

呢間屋仲有個死穴，係隔離間建築物其實係個類似波樓嘅娛樂場所，可以想像如果唔係lockdown嘅話，人流都會幾雜吓，而且個主人房嘅窗仲要對正人哋嘅出入口，拎黎監視就啱晒，但拎黎住就麻麻喇。或者喜愛熱鬧嘅人會好鍾意呢度。

間屋嘅花園都算幾細，不過佢就有後門(見圖1中間)，呢樣未必間間屋有，特別係排屋，花園後門有咩用呢？就係萬一花園要做工程，所有物資都可以經後門出入，唔需要經過室內地方，唔駛攪到室內污糟晒。

就係咁，我哋又學左野喇，真係要實地考察先得，始終自住嘅地方要求要高D。不過我哋亦開始明白自己對floor plan嘅要求係點。

睇屋記 (3)

呢間屋係為左學嘢而去睇嘅，呢間係1117呎嘅semi-detached house，4房2廁，已做extension。

地下有一個開放式廚房連客飯廳，另外有一間睡房同浴室，一樓有兩間睡房同一間浴室，二樓係由閣樓改建而成嘅睡房。

呢間屋我哋主要係去睇佢個閣樓睡房，呢間閣樓睡房係冇門嘅，一上樓梯已經係間房嘅中心，好開放咁，而且上二樓嘅樓梯好直好斜，唔好話剛剛瞓醒好易叉錯腳，就算清醒地行都覺得一步一驚心，再者二樓又冇廁所，所以呢間閣仔房頂多可以當書房用，睡房真係唔多合適，但現手業主放咗好多張床喺度。

呢間屋係冇driveway嘅，即係門口冇泊車位，本來某D屋都仲可以向council申請將門前花園改做driveway，但呢間直情係冇門前嘅空間，所以有車嘅話只能泊街，呢個又係另一concern。

我哋去睇呢間屋其實係想預計一吓如果要自己整loft conversion有咩要留意，朋友提醒過要留意吓個樓梯點攪，睇完呢間屋發現原來閣仔房未必可以整到想像中咁理想，仲有個樓梯位都要計過數先得，失敗左就會好似呢間屋咁，見過某D floorplan係要犧牲一樓一間房先開到個樓梯上二樓，如果係咁嘅話，錢就用左，但其實實用面積唔係多左好多，唔多化算，所以最後我哋都唔敢自己攪loft conversion，怕花錢買難受同失望。

圖為閣仔房同樓梯，因為廢事公開人哋屋企嘅傢俬，所以做左特別效果。

#萬母英遷

#尋找安樂窩