鈎聖誕裝飾

放學身痕，手痕，XX痕，所以又拎D冷出嚟鈎野。

小雪人同聖誕樹都分別用咗1日就完成，望落去都似模似樣，起碼唔再似怪獸。

有興趣/有痕癢都可以去下面嘅連結試鈎吓。

雪人

https://www.youtube.com/watch?v=h7pwzEo7YpQ

聖誕樹

https://www.youtube.com/watch?v=S1S7hOd_ljU

祝願大家聖誕平安，快樂！

在至高之處榮耀歸與神！在地上平安歸與他所喜悅的人！(路加福音 2:14)

踏雪上學去

香港從來都唔會落雪，倫敦都唔常落雪，但上星期日晚，倫敦落咗場大雪，一覺醒嚟積雪有10厘米厚，嘩，窗外嘅風景靚到聖誕卡咁樣。

未經歷過落雪就會好興奮，好高興，但興奮過後，返回現實，就會焦慮，點出門口返學？

好彩嘅係唔止我哋焦慮，倫敦本地人都一樣唔常面對積雪，所以一大朝早就收到小妹學校停課嘅通知，小妹唔駛返學，咁萬母又點呢？萬母學校照常開放，但就行特別時間表，學生朝早10點先上堂，晏晝2點半就放學，之但係由於兩小妹都留家，萬母都唯有請假唔返工，事後萬母得知當日有四分一員工都返唔到工，主要都係要留家照顧細路。

呢一日停課日就成為小妹嘅戶外學習日，學習砌雪人，Do you want to build a snowman? 唔再係只唱歌仔，係真正實行喇。

到星期二，小妹學校已經照常返學，但路面情況仍未回復正常，因為擔心行車安全，我哋選擇踏雪上學去，一路行簡直覺得自己似溜緊冰，因為地下積雪被踩扁後就會變冰，變得好跣，真係一步一驚心，平日15分鐘嘅路程要行25分鐘先到，不過學校好諒解嘅，會體諒踏雪上學嘅細路，唔會因為遲到而責罰。

到放學時間，council已經出動清理路面，主要係喺馬路灑鹽，行車路面已經安全咗好多，雖然仍有跣呔風險，反而行人路仲有好多積雪，結冰，仍然一步一驚心。

由於成個星期都係低溫，日間只係0度咁上下，半夜更加係冰點以下，所以今次嘅積雪一直都未溶，成個星期都仍然活喺聖誕卡中，小妹學校更加插特別活動，喺放學前畀佢哋出戶外嚟個雪戰。

天寒地凍，電量好快耗盡，唔止係電話電量，人嘅電量都係，英國嘅氣溫將會回暖，但香港就剛剛相反，無論喺英國定香港嘅朋友都要小心保暖，好好享受聖誕假期。

申請oyster card

 小妹滿咗11歲，唔能夠再抆衫尾搭tube搭巴士，要申請一張個人oyster card，有咗張呢卡仍然可以免費搭巴士，但tube就要畀小童價。

要申請唔難嘅，都係上網㩒㩒㩒就得，準備定一張證件相，細路護照嘅有相頁，同debit card。

https://tfl.gov.uk/fares/free-and-discounted-travel/11-15-zip-oyster-photocard

首先用家長名義開個oyster戶口，然後就可以喺網上為細路申請oyster card，如果本護照夠新潮，可以machine-readable，就真係足不出戶就攪得掂，否則就要去郵局一轉。

入好晒資料，上載埋相同護照頁，交埋£15行政費之後就係等。

一個星期左右，張卡就寄到上門喇。

小妹收到佢自己嘅oyster card，難掩興奮心情，因為佢覺得自己大個喇，終於要畀車費喇，而阿媽就覺得...搭車冇咁抵喇。

張oyster card係零餘額嘅，想增值就要去tube station嘅售票機，拍一拍卡，揀增值額，入錢，再拍卡就攪掂喇。

呢張11-15歲嘅oyster card可以用到個細路16歲之後嗰個9月底，跟住就要換16+ oyster card喇。

綠豆~兩邊走走

不解釋，純推薦。

每星期必追。

https://www.youtube.com/watch?v=ypJlms-7uo8

Matlida音樂劇

先前去咗Roald Dalh Museum，引咗小妹睇Matlida本書，咁既然睇完本書，就順理成章去睇埋音樂劇喇。

平時聽英文已經聽到頭暈暈，睇音樂劇唔止係英文對白，仲要加埋英文歌，真係聽到傻傻吓，好彩小妹話佢哋明。

睇咗咁多套劇，萬母覺得"獅子，女王，魔衣櫥"最精彩，萬能生就鍾意"Matlida"，話冇咁科幻，易明D，而小妹當然就揀Harry Potter喇。

但就算各有所好，每一套都真係精彩，值回票價嘅。

Kitty Cafe @ Nottingham

呢個景點，係Nottingham之旅嘅重頭戲，亦係小妹話最好玩嘅一個。

簡單嚟講，就係一間貓Cafe，入去可以食野飲野，亦可以玩貓。

但小妹之意不在食，在乎貓也，所以佢哋入去(無錯，係佢哋，萬母選擇自我放逐去shopping)並無叫野食，只係玩貓。

無論叫唔叫野食，都要收入場費嘅，大人£7，細路£5，可玩一個鐘貓。

呢間kitty cafe其實都係一個救貓機構，係收留一D流浪貓，病貓，照顧好佢哋之後，就幫佢哋搵個好歸宿。佢哋嘅網站都係一D貓待領養。

Kitty Cafe總共有3間分店，分別喺Nottingham, Leeds同Birmingham，有理由相信如果我哋去Leeds/Birmingham嘅話，小妹都會去玩貓。

https://www.kittycafe.co.uk/

Fun Station @ Nottingham

平時去旅行都係萬母揀好景點，編好行程就出發，今次萬能生為自己揀咗呢個Fun Station。

Fun Station係咩？即係冒險樂園！燒錢咣地方。

玩咗兩個幾鐘，燒咗廿幾磅，抵唔抵玩就見人見智喇，但嚟咗英國咁耐，佢哋真係好掛住冒險樂園囉。

Fun Station全英國只有6間，分別喺Birmingham, Braehead, Castleford, Edinburgh, Hull, Milton Keynes, Nottingham, Sheffield。

https://www.funstationuk.com/