豆漿津白

呢味餸係可以當湯又當菜，能夠一雞兩味，絕對係懶人恩寵。

1. 將蝦乾浸至軟身

2. 津白洗淨切片，煙肉切片

3. 爆香蒜蓉，加入煙肉，津白炒勻

4. 加入蝦乾，倒入豆漿煮6-8分鐘

5. 加入半粒濃湯寶，攪勻食得

雖然個賣樣麻麻哋，但味道OK嘅，值得懶惰時一試。

裝修記(15) - 揀splashback

停咗幾星期冇寫裝修記，皆因唔止BB會小器，好多野都會小器，個worktop攪咗個幾月，一時又話𠝹爛咗塊石，一時又話配唔返同色石，最後要揀過另外一款石，真係波折重重，個軟水機又送漏咗installation kit，等了又等，份野遊完個大運先到步。

所以一日未整好，一日都唔可以咁嘈，或者要每日㩒多幾次touchwood apps先可以甩除惡運。

今次終於等到另一個項目攪掂喇，就係個splashback。

splashback即係防濺擋板，喺香港好少見，因為香港嘅廚房同廁所絕大部份都鋪晒磚。但英國嘅廚房係油漆，甚至係貼牆紙。

想易D清潔，唯有喺爐頭，sink盆後面安裝splashback，傳統D嘅會整塊不鏽鋼或膠片，高檔D嘅就整塊玻璃，甚至將worktop嘅石延伸上牆。

有D廚房只喺爐頭位鋪splashback，其他位置就會鋪upstand(見圖2)，upstand係細細塊，垂直於個worktop嘅，作用都係擋水，但擋少少咁喇。

睇完一大輪示範單位，網上圖片，發現用石或者玻璃，的確好靚仔，但就好貴，用不鏽鋼配upstand又覺得太老土，最後我哋揀咗用磚，不過就唔係細細塊嗰D，係大大塊磚鋪上去，一來化算DD，二來又大塊磚少D隙縫易D清潔。

萬能生話完成品有D似玻璃splashback，感恩，總算攪掂多一樣。

蒜蓉粉絲蒸蝦

1. 先用水將粉絲浸軟

2. 將粉絲瀝乾水鋪喺碟上

3. 將蝦仁鋪喺粉絲上

4. 加幾匙蒜蓉

5. 蒸5-6分鐘，加豉油，食得

呢個版本係手殘版，啱晒處理唔到海鮮嘅地獄廚神。

小妹好滿意呢味餸，粉絲被搶食一空，原來唔止痰伯鍾意食粉絲，小妹都鍾意㗎。

貼牆紙披口

而家租屋個廚房貼咗牆紙，老實講，都唔明點解會喺廚房貼牆紙，不過#是但喇，人地間屋嚟嘅，#我都冇say

幅牆紙披咗口好耐，仲越披越大，直至過年前終於忍唔住出手。

喺B&Q買咗支大白膠漿，用埋舊濕海棉，結果有目共睹。

大面積嘅披口係救得番，但邊邊嘅披口點攪都係貼唔實。

#有D野努力咗都係冇用，下次#唔好搞咁多野啦

雖則唔係完全成功，但都算靚仔咗嘅，叫做為過年做咗少少野㗎喇。

🖐五福臨門 ☝️一帆風順

都話失敗乃成功之後母，失敗年糕嘅背後就係愛心蘿蔔糕。

萬能家祝大家🖐五福臨門 ☝️一帆風順！

#愛心蘿蔔糕

#愛心角仔

失敗乃成功之後母 ~ 年糕篇

其實除咗焗椰汁年糕同傳統年糕之外，萬母今年都試咗焗朱古力年糕，但加咗朱古力粉之後，成舊野硬咗好多，由煙煙韌韌變咗掟死狗咁款。

玩得蒸糕bell，當然唔少得瘋狂洗版嘅蘿蔔糕，因為明知自己唔多掂，所以都冇買咩貴料，索性整無料扮四條嘅齋蘿蔔糕，整呢舊糕期間真係有D混亂，最後加咗幾多粉同幾多水都唔係好記得，但最後萬能生竟然話OK喎，下次考慮就咁開粉漿蒸畀佢食就算喇。

就係咁，年糕之亂就告一段落喇，下年再見喇。

#如果生活將你擊倒 #那就先躺下

#失敗乃成功之後母

#樂觀地悲觀係我嘅價值觀

傳統年糕

先前整咗個焗年糕，既然屋企仲有材料剩，就試埋傳統年糕。

1. 煲125毫升水，煮溶125克brown sugar，倒入40毫升椰汁同15克菜油攪勻，攤涼備用。

2. 將100克糯米粉同35克澄麵粉撈勻，過篩，逐少加入糖水中，一邊加粉一邊攪勻，直至完全混合。

3. 將麵糊倒入糕盤中，隔水蒸60分鐘。

4. 攤涼後放雪櫃。

5. 切片蘸蛋汁落鑊煎至軟身。

呢種傳統年糕其實都唔算難整，只係將材料混合再加熱，有D似讀書時做化學實驗咁。

出嚟嘅成果都算成功，煎到軟軟，幾好食，可惜屋企冇咩人識欣賞，所以應該每年出一底，節日限定。