焗蕃薯

萬母好鍾意食蕃薯嘅，今次有幸得到愛心蕃薯。

有焗爐想整蕃薯就易過借火。

洗淨蕃薯，放入焗爐，180度焗40-45分鐘。

唔駛點花功夫就有焗蕃薯食喇，同煨蕃薯一樣咁好味㗎。

#愛心蕃薯

學車記(9) - 迴旋處

英國有好多迴旋處，真係好多，大大小小，迷你嘅同超級大嘅都有。要喺英國揸車，唔可以唔識用迴旋處。

迴旋處小貼士：

🕘轉左： 打左燈，行左線

🕛12點或以前出口： 唔打燈，行左線，臨出打左燈

🕒12點以後出口： 打右燈，行右線，臨出打左燈

除咗要知道打咩燈，行咩線外，仲要知道喺迴旋處究竟邊個要讓路，邊個有優先權。

司機要讓路畀右面或對面嘅車。

以上幾點只係概括，有D迴旋處複雜到不能想像。

就算頭腦上明晒所有理論，實際操作時都係會亂，究竟打咩燈呀？行咩線呀？幾時要讓呀？幾時到我出呀？

要解決只有用時間累積經驗，雖然嚟到英國先考車，要等好耐，又要等考筆試，又要等考路試，但都有好處嘅，就係學車期間會累積到好多英國嘅實際路面經驗，咁第時自己揸車時會易處理好多。

下面條youtube有教喺迴旋處究竟幾時可以出，學神們不妨一看。

https://www.youtube.com/watch?v=IqNW0IrOjzE&list=PLnM8RR0dumuZj0Ui1B00ScjTYri5bNVEm&index=10

以下唔係揸車事，純係廣告時間。😬

https://www.youtube.com/watch?v=jhclJ8OH9Pk

大家閨秀學刺繡

暑假期間，為咗令小妹遠離screen，萬母向小妹介紹咗十字繡，點知小妹一試上癮，整完一個又一個，每次去hobbycraft都要求買一個，仲話下次想試真係喺布上面繡。

想細路容易D處理，可以先喺膠片上用marker點好，咁就唔駛一路繡一路數，少D機會出錯喇。

英國小學冇功課，就多咗時間畀細路去發掘唔同嘅hobby，或者有一日可以好似英國跳水王子Tom Daley咁，又或者呢D hobby將來可以幫佢哋搵到餐晏仔。

圖為小妹嘅初級十字繡。

💰💰超市行情：💰💰

膠底十字繡 £1-1.5

M&S朱古力奶

 //如果太多牛奶味，朱古力味冇訂企，等到朱古力味返翻嚟，牛奶味又唔爭氣。//

小妹揀飲擇食，唔飲牛奶，但飲朱古力奶。

先前喺超市買咗朱古力豆奶，小妹飲咗兩啖就唔要，因為嫌棄陣豆奶味。

結果就試咗M&S嘅朱古力奶，講真，萬母自己都係鍾意飲維X牛頭多D，但M&S呢種冇咁甜，食物標籤寫住有92%係semi-skimmed milk，而萬母嘅腸胃都真係feel到佢係真奶實料嘅。

兩種M&S朱古力奶比較，小妹話冇牛頭嗰種好味D，朱古力味濃D。萬母都開心，因為佢平DD。

準備路試(1) - ‘show me, tell me’

要知己知彼，先能百戰百勝，雖然萬母有排都未考得路試，但都要開始了解路試內容。

喺英國考路試有咩考呢？有5大關要考：

1. 驗眼，需要讀出20米外的車牌

2. show me, tell me

3. 普通駕駛能力測試

4. 倒車

5. 獨立駕駛

今次先講‘show me, tell me’ vehicle safety questions，唔係粟米肉粒飯，唔好攪錯呀。

tell me係上車前答問題，例如： tell me how to check the headlights are working. 呢類題目，用口答就得。

show me係一路揸一揸示範，例如： show me how to wash and clean the front windscreen，要一邊控制架車一邊跟指示做

以下官網有例子，列出有咩題目會問，tell me同show me都各自有一題，如果錯咗或錯晒，會當一個minor fault。

https://www.gov.uk/government/publications/car-show-me-tell-me-vehicle-safety-questions/car-show-me-tell-me-vehicle-safety-questions

仲有其他網上資源可供參考。

https://www.1driver.co.uk/show-me-tell-me.html

https://www.youtube.com/watch?v=42aDwWpyX-k&t=5s

萬母覺得呢一part都唔易呀，睇嚟又要下吓苦功去熟讀答案，港式填鴨又要出場喇。

B & Q 裝修材料店

B&Q相信冇咩英國人唔識，特別係男人，真係可以叫佢做"男人的浪漫舖頭"，主要賣DIY裝修材料。

https://www.diy.com/

因為要準備裝修，所以萬母同萬能生去B&Q觀摩吓，主要睇吓地板，廁所，廚房有咩得揀。原來企缸都有好多size，喺B&Q就可以成個人行入去feel吓，究竟咩size先啱，越大當然沖得越舒服喇，但個浴室都要夠大先得。

但其實B&Q真係只供參考，朋友話B&Q嘅價錢的確唔算貴，但質量同價錢成正比，所以睇吓好喇。嚟緊應該仲有大把呢類"男人的浪漫舖頭"要睇，其實女人都係鍾意睇衫，頂多睇家俬，D plumbing零件真係舊舊都差唔多樣。

偽~青紅蘿蔔湯

青紅蘿蔔湯應該冇咩香港人冇飲過，嚟到英國，想搵青蘿蔔真係有D難度，西超搵唔到，中超又貴到傻，好彩有媽媽friend教路，可以用椰菜苗(trimmed brussels sprouts)代替青蘿蔔。

萬能家初到步時，正值聖誕，成個超級市場都係椰菜苗波波，試過貪得意買返嚟炒，但發現唔啱口味，所以之後都冇再買，今次就買嚟煲湯。

材料：

椰菜苗(trimmed brussels sprouts)

紅蘿蔔

雞肉

其實仲可以加粟米，懶惰嘅萬母決定成隻雞槌掉落去煲。煲出嚟嘅湯都似模似樣，如果真係好掛住青紅蘿蔔湯，但又唔捨得買青蘿蔔，可以試吓呢個偽~青紅蘿蔔湯。