Homesense 家品散貨場

 如果鍾意TK maxx嗰類尋寶店，應該都會鍾意Homesense，因為Homesense其實係TK maxx旗下嘅。

https://www.homesense.com/home

入面會有大型傢具，例如：梳化，但亦會有小型家品，例如：咕𠱸，地毯，鏡，畫，碗碟，水杯，儲物嗰類，仲有好多家品裝飾。如果想幫屋企扮靚靚，Homesense會係好好行嘅舖頭，如果配搭得宜，入面嘅貨品係可以令屋企更有品味嘅。

學車記(8) - 限速50

萬母終於都可以升班，開始練習考試路線喇，師傅帶咗萬母上限速50 mile嘅路，當落堂時，師傅話起初以為萬母會怯，點知又冇咩喎。

模擬考試，炒粉咁炒，低級錯誤出晒嚟，當然最嚴重都係處理hazards嘅反應喇，師傅話萬母係腦腳唔協調，個腦係知道要做反應，但隻腳就反應唔嚟，往往都遲咗，

初學者常見錯誤

https://www.youtube.com/watch?v=VdTJtFLch1w

1. Staring right

2. Looking at oncoming traffic

3. Waiting too close

4. Not slowing down for hazards

5. Rushing

為咗令自己建立信心，train個腦快D有反應，萬母決定上youtube補補習。上面條片講初學者嘅常見錯誤，睇到萬母好有共鳴，知道自己唔係特別遲鈍，只要努力練習就可以進步。希望有一天坐上司機位時就可以好似踏出"虎度門"咁，信心滿滿咁做"司機"呢個角色。

https://www.youtube.com/watch?v=q_JZCUwdDZM

TK Maxx 百貨公司散貨場

成日聽到TK Maxx，終於知道佢究竟係咩類型嘅舖頭，與其話佢係百貨公司，萬母覺得佢似百貨公司嘅散貨場，佢同百貨公司一樣賣好多唔同種類嘅貨，包括男裝，女裝，童裝，鞋，手袋，玩具，碗碟家品，傢俬，但每樣嘅數量都唔多，似係D斷碼貨。

如果搵到D啱用嘅的確係幾抵嘅，但就要花D心機去尋寶，萬母入到去主要睇童裝，好彩畀萬母搵到幾條抵著又啱著嘅褲，一個唔小心就買咗5條褲，又破財了，好彩都係特價貨，唔算貴。

左： 湖水綠運動褲 £4

中： 牛仔貼身褲 £12.99/2條

右： fleece底leggings £6.99/2條

有心機有時間嘅話，TK Maxx會係尋寶好地方，而且佢間間舖嘅貨都有少少唔同，想搵到寶物就要慢慢尋喇。

英國開學日

等咗5個星期暑假，小妹終於都開學喇，萬母興奮到早一晚失眠呀！

今次係小妹第一次參加英國小學嘅開學日，因為舊年做插班生，冇試過正式開學，小妹話係有開學禮(assembly)嘅，佔咗第一堂嘅時間，至於講過D咩，小妹話都係嗰D喇，放學時已經唔記得曬。

今次都係萬母第一次踏入英國小學嘅校園，先前半年家長們都止步於學校門口，今日終於可以入校園參觀參觀喇，可以將小妹送到課室門口。

小妹學校佔地都算好大吓，除咗有個籃球場，仲有個大草地，怪唔知小妹成日放學返嚟，件褸或者鞋入面都搵到草喇。仲有小妹口中嗰個井，萬母終於知道係咩東東喇。

學校環境咁優美，真係喺香港難搵，希望小妹繼續開開心心返學喇。

Card Factory 賀卡店

睇佢個名以為佢只賣賀卡，其實唔止嘅，除咗賀卡，仲有D唔同類嘅禮物，汽球，花紙，紙袋/紙盒賣，而且仲有記事簿，月曆，水杯等等，D貨品都算精美，價錢都相宜，所以舖頭細細但都人頭湧湧，咁萬母就廢事打攪人，所以冇咩影相，只係用眼觀看。

https://www.cardfactory.co.uk/

英國人好重視生日，特別係D整十歲數嘅生日，先前萬母都見附近鄰居開咗個40歲生日會，喺花園開晒咪開晒燈玩到半夜都未收檔。所以生日卡嘅款式多到眼花。

本來純粹八卦走入去貢吓，但點知都有收穫，買咗個掛牆月曆，萬母拎住兩個月曆畀小妹揀，小妹睇完之後揀咗圖中嘅倫敦景點月曆，而拒絕咗另一個食譜月曆，佢話驚佢阿媽睇咗個食譜，受刺激後會亂咁煮野食喎。

💰💰超市行情：💰💰

掛牆月曆 £1.99

安排聖誕活動

暑假都未放完，學都未開，就安排聖誕活動，會唔會快咗D呀？

唔快㗎喇，好多聖誕活動已經開始接受預約，有D仲已經full full哋添呀。

戴返頭盔先，雖然萬能家嚟緊係第二年喺英國過聖誕，但上個聖誕我哋係喺砌傢俬同抹屋中渡過嘅，所以對於喺英國嘅聖誕活動都係冇咩經驗，不過好彩有朋友提點，同埋做吓research。

🎄睇聖誕燈飾 (有收費，有免費)

🎅探訪聖誕老人 (英國人叫Father Christmas)

🎄睇聖誕shows

萬母起初覺得點解見吓聖誕老人都要收咁貴呀？喺香港走入商場就有喇，但朋友話英國嘅聖誕老人好認真㗎，唔係影張相就算數，真係會同細路傾計，問佢哋有咩願望㗎，好喇，既然係咁，就趁小妹仲細細哋，科水去見吓聖誕老人喇。

下面呢個webpage介紹咗好多聖誕親子活動，不過就算個活動幾吸引，幾抵都好，都要留意地點，香港無論去邊一區都可以即日來回，喺英國去咗無雷公咁遠就真係無雷公㗎喇。

https://flashpackingfamily.com/santas-grotto-uk/

下面個網站介紹倫敦附近嘅聖誕show。

https://freetoursbyfoot.com/christmas-shows-in-london/

萬母發現某D show會有家庭場，甚至家庭優惠，買大送細，咁樣就抵好多，又可以吸吓文化氣息，扮吓文青。

如果大家發現D好玩又抵玩嘅聖誕節目，記得講聲呀！

#圖為舊年嘅超迷你聖誕樹

9月1開學日？

 Facebook畀香港嘅開學日相洗晒版，英國呢邊又點呢？小妹開學未呢？

答案係： 未嘅。

雖然官方話9月1日係新學期開始，但大部份學校都設9月1日係教師發展日，小妹學校要9月3日先開學，朋友中學更加係9月6日先開學。

https://www.gov.uk/school-term-holiday-dates

萬母幾個月前已經叮囑小妹，如果對返學鞋唔啱著，記住早D出聲，以免臨急臨忙四圍撲，暑假剛開始時，萬母見到超級市場有促銷，都專登再問小妹，佢當時仲答"啱著"，點知暑假尾拎對鞋出嚟試，就話"迫迫哋"。

結果，撲咗幾日，先搵到對啱嘅。人生就係咁樣，你唔想要時就成日喺眼前出現，當你想要時就全部失蹤晒。

💰💰超市行情：💰💰 黑皮鞋 £9.9